ភ្នំពេញ: បន្ទាប់ពីប្រឡូកក្នុងវិស័យសារព័ត៌មានអស់រយៈជិត ៥ឆ្នាំ លោក រ៉ឹម ភារី អតីតអ្នកសារព័ត៌មានកម្ពុជាមួយរូបបានងាកមកលក់ស្បែកជើងកង់ឡានវិញ ដោយចង់រំឮកការចងចាំគ្រាដែលចាស់ៗធ្លាប់ពាក់វានៅក្នុងរបបប៉ុលពត ខណៈលោកបានទទួលចំណូលហួសពីការរំពឹងទុក។
លោក រ៉ឹម ភារី ដែលធ្លាប់បម្រើការងារនៅក្នុងអង្គភាពសារព័ត៌មានក្នុងស្រុកមួយចំនួននាពេលកន្លងមកបានថ្លែងប្រាប់ The Plus News ថា ក្រោយពីប្រឡូកក្នុងសមរភូមិស្លាបប៉ាកាអស់៤ឆ្នាំ លោកក៏បានលាឈប់មកចាប់របរជាអ្នកលក់ស្បែកជើងកង់ឡានវិញ ព្រោះរបរថ្មីនេះបានដំណើរការរលូនដោយមានអតិថិជនគាំទ្រ និងជាវជាបន្តបន្ទាប់។
លោកថា«អតិថិជនខ្លះរបស់ខ្ញុំ គឺជាអ្នកដែលធ្លាប់ឆ្លងកាត់នៅក្នុងសម័យខ្មែរក្រហម ហើយពួកគេទិញស្បែកជើងកង់ឡាន ដើម្បីទុកជាអនុស្សាវរីយ៍ និងរំឮកការចងចាំគ្រាដែលពួកគាត់ធ្លាប់ពាក់វានៅក្នុងរបបប៉ុលពត»។
លោកបន្តថា លោកងាកមកចាប់យកអាជីពនេះវិញ ដោយមិនមានការអៀនខ្មាសនឹងមិត្តភក្ដិរួមអាជីព និងអ្នកទាំងឡាយដែលគិតថា វាជាមុខរបរតូចតាចឡើយ ព្រោះមួយជីវិតរបស់លោកធ្លាប់បានឆ្លងកាត់ជីវិតអ្នកលក់ដូរតាមចិញ្ចើមផ្លូវជាហូរហែរកន្លងមកនេះ។
អតីតអ្នកកាសែតរូបនេះបានបន្តថា ដំបូងលោកបានទិញស្បែកជើងកង់ឡានពីលោកតាម្នាក់ដែលគាត់បានដើរលក់តាមផ្លូវ ហើយពិតជាមានគុណភាពល្អ ជាប់បានយូ ក្រោយមកលោកមានគំនិតចង់ទិញបន្តពីគាត់ ហើយប្រកាសដាក់លក់នៅតាមអនឡាញ (Online) ប៉ុន្ដែការលក់របស់លោកបានទទួលការគាំទ្រជាបន្តបន្ទាប់។ លោកបានស្នើឲ្យបុរសចំណាស់អ្នកផលិតស្បែកជើងស្វែងរកឆ្នៃម៉ូតថ្មី ដើម្បីតម្រូវតាមចំណូលចិត្តអតិថិជន ហើយបញ្ជាទិញយកទៅលក់បន្ត។
លោកបន្តថា ការបញ្ជាទិញបន្ថែមនេះ ដោយចង់ឲ្យបុរសចំណាស់រួបនេះ មានការងារធ្វើ ព្រមទាំងឲ្យគាត់រកពលរដ្ឋទុរគត់ជនផ្សេងៗទៀតមកជួយគាត់ដែរ ដើម្បីឲ្យពួកគាត់មានចំណូលប្រចាំថ្ងៃដែរ។ លោកចង់បានកន្លែងលក់សមរម្យមួយ និងចង់បង្កើតម៉ូតខ្មែរ (Brand) និងស្នាដៃរបស់ខ្មែរ។
លោកបានបញ្ជាក់ថា៖«ការពិតទៅ ខ្ញុំនៅស្រលាញ់អាជីពអ្នកសារព័ត៌មាន ប៉ុន្ដែខ្ញុំចង់សាកល្បងមើលពីទីផ្សារស្បែកជើងកង់ឡាននេះ ទើបខ្ញុំសម្រាក់មួយរយៈសិន ហើយទោះយ៉ាងណា ខ្ញុំនឹងបន្តទៅរកអាជីពដើមវិញនៅពេលណាមួយ ព្រោះខ្ញុំនៅស្រលាញ់វា តែការលក់ស្បែកជើងតាមអនឡាញនេះ ក៏កំពុងដាច់គួរសមដែរ»។
វត្ថុធាតុដើមជាសំបកកង់ឡានចាស់ៗដែលគេច្រើនតែរកប្រមូលទិញនៅតាមភូមិ ហើយស្បែកជើងកង់ឡាន ត្រូវបានពលរដ្ឋខ្មែរដែលធ្លាប់ឆ្លងកាត់របបកម្ពុជាប្រជាធិបតេយ្យស្គាល់ថា ជាស្បែកជើងរបស់មេដឹកនាំរបបខ្មែរក្រហមធ្លាប់ប្រើប្រាស់នាសម័យនោះ ប៉ុន្តែស្បែកជើងប្រភេទនេះ ត្រូវបានចាប់ផ្តើម និងបន្តទីផ្សាររហូតដល់បច្ចុប្បន្ន ដោយបុរសវ័យចំណាស់ៗមួយចំនួនតូចជិះកង់ចែកចាយដាក់ឱ្យម៉ូយ និងលក់នៅតាមជាយទីក្រុង និងនៅក្នុងក្រុងភ្នំពញ៕
អតិថិជនអាចទាក់ទងតាមរយៈ https://www.facebook.com/%E1%9E%A0%E1%9E%B6%E1%9E%84%E1%9E%9B% ឬលេខទូរស័ព្ទ: 093 95 99 83/061 64 33 28
