ត្បូងឃ្មុំ៖ បន្ទាប់ពីសម្ដេចនាយករដ្ឋមន្ត្រី ហ៊ុន សែន បានបើកការដ្ឋានសាងសង់ឡើងវិញផ្លូវជាតិលេខ ១១ ដែលមានប្រវែង៩៦.៤៨គីឡូម៉ែត្រពីអ្នកលឿងទៅដល់ខេត្តត្បូងឃ្មុំនោះ ពលរដ្ឋដែលរស់នៅតាមបណ្ដោយផ្លូវជាតិបានត្អូញត្អែរពីបញ្ហាដីហុយ និងគ្មានអាជ្ញាធរជួយបាញ់ទឹក ខណៈពួកគេជំរុញពន្លឿនការសាងសង់។
ផ្លូវជាតិលេខ១១នេះ ត្រូវបានចំណាយទឹកប្រាក់ជាង ៩៤លានដុល្លារ ដើម្បីជួយដល់ប្រជាពលរដ្ឋខេត្តព្រៃវែង និងត្បូងឃ្មុំ ហើយនិងបណ្តាខេត្តផ្សេងៗទៀតដែលត្រូវធ្វើដំណើរឆ្លងកាត់ និងអ្នកធ្វើដំណើររបស់ប្រជាពលរដ្ឋទូទៅផងដែរ។
ទទឹមនឹងនេះ ពលរដ្ឋម្នាក់សុំមិនបញ្ចេញឈ្មោះបានថ្លែងថា មន្ត្រីជំនាញបានបើកការដ្ឋានសាងសង់ និងស្ថាបនាជាយូឆ្នាំមកហើយ ប៉ុន្ដែការសាងសង់នេះ ហាក់បីដូចជាមានការពន្យាពីមួយថ្ងៃទៅមួយថ្ងៃ ដែលបណ្ដាលឲ្យមានដីហុយឡើងងងឹតមេឃ ខណៈមានរថយន្តធំៗមកម្ដង។
លោកបន្តថា ប្រជាពលរដ្ឋដែលរស់នៅក្បែរនោះ បានត្រឹមតែរអ៊ូរទាំ ដោយមិនមានអាជ្ញាធរជួយដោះស្រាយ ឬជួយបាញ់ទឹកកុំឲ្យដីហុយទេ«ខ្ញុំមិនដឹងថា មិចទេក្មួយ បើដីហុយពីមួយថ្ងៃទៅមួយថ្ងៃ គឺហុយនោះ ហុយ គ្មានអ្នកជួយដោះស្រាយទេ។ ខ្ញុំសូមឲ្យអាជ្ញាធរជួយដោះស្រាយផង»។
ពលរដ្ឋម្នាក់អាយុ ៥០ឆ្នាំ នៅស្រុកអូររាំងឱក៏សុំមិនបញ្ចេញឈ្មោះដែរបានលើកឡើងថា រថយន្តធំៗគ្រប់ប្រភេទបានធ្វើដំណើរតាមផ្លូវជាតិលេខ១១នេះ បណ្ដាលឲ្យហុយមើលផ្លូវមិនឃើញ«សូមមន្ត្រីជំនាញជួយដោះស្រាយផង ពលរដ្ឋដែលអមតាមបណ្ដោយផ្លូវនេះ មានអ្នកខ្លះកំពុងមានជំងឺផ្លូវដង្ហើម និងអ្នកខ្លះឈឺគ្មានពេលទំនេរទេ ជាពិសេសខ្ញុំអាណិតក្មេងៗ គឺពួកគេឈឺរហូត»។
មន្ត្រីមន្ទីរសាធារណៈការ និងដឹកជញ្ជូនខេត្តត្បូងឃ្មុំ មិនទាន់អាចទាក់ទងសុំការបញ្ជាក់បានទេ ជុំវិញករណីនេះ។
តាមរយៈទំព័រហ្វេសប៊ុករបស់សម្ដេច ហ៊ុន សែន បានសរសេរថា ប្រមុខរាជរដ្ឋាភិបាលកម្ពុជា អរគុណរដ្ឋាភិបាលចិន ដែលតែងតែជួយដល់ការអភិវឌ្ឍហេដ្ឋារចនាសម្ព័ន្ធក្នុងប្រទេសកម្ពុជា។ ដោយថា៖«មិនត្រឹមតែអភិវឌ្ឍខ្លួនឯងឲ្យបានរីកចម្រើនប៉ុណ្ណោះទេ មិត្តចិនបាន ចូលរួមចំណែកជួយអភិវឌ្ឍប្រទេសជិតខាងមួយចំនួនទៀតផងដែរ ជាក់ស្តែង ប្រទេសកម្ពុជាជាដើម»។
បើតាមទំព័រហ្វេសប៊ុករបស់សម្ដេចនាយរដ្ឋមន្ត្រី រដ្ឋាភិបាលចិនបានផ្តល់ជំនួយក្នុងការសាងសងស្ពានចំនួន៧ ដល់កម្ពុជា ដោយចំណាយថវិកាប្រមាណ ២១៦លានដុល្លារ៕
