រាជធានីភ្នំពេញ៖ ព្រឹកថ្ងៃទី ១៤ ខែកុម្ភៈ ឆ្នាំ ២០១៩ នេះ ក្រុមហ៊ុន រ៉ូយ៉ាល់ គ្រុប បានបោះទុនរួមគ្នាជាមួយអ្នកវិនិយោគមកពីចិនតៃវ៉ាន់ សាងសង់ជាផ្លូវការអគារពាណិជ្ជកម្មភ្លោះ Royal One ក្រោម ទំហំទឹកប្រាក់ ២៣០ លានដុល្លារ។
អគារអន្តរជាតិ Royal One មានកម្ពស់សរុប ៦៨ ជាន់ ក្នុងនោះ ៦ ជាន់នៅក្រោមដី និង ៦២ជាន់នៅលើអាកាស ដែលចំណាយពេលសាងសង់ ៥ ឆ្នាំ។ អាគារភ្លោះកម្ពស់ខ្ពស់ដាច់គេ ដែលបានជ្រើសរើសទីតាំងដ៏ល្អបំផុតនៅចំកណ្តាលរាជធានីភ្នំពេញ និងមានទីតាំងស្ថិតនៅកែងគ្នារវាងមហាវិថីសហព័ន្ធរុស្សី និង មហាវិថីព្រះមុនីវង្ស ជាអគារពាណិជ្ជកម្មសម្បូរបែប រួមមាន ខុនដូរ ផ្សារទំនើប សណ្ឋាគារ ក្លិបកំសាន្ត ក្លិបហាត់ប្រាណ ភោជនីយដ្ឋាន និង មជ្ឈមណ្ឌលកំសាន្តផ្សេងៗ ។ ជាពិសេស អគារភ្លោះនេះ នឹងផុសលរូបរាងឡើងក្នុងតំបន់ពាណិជ្ជកម្ម ដែលប្រជុំទៅដោយអគារខ្ពស់ៗ ដូចជា អគារកាណាឌីយ៉ា អគារវឌ្ឍនៈ និង អគារ Exchange Square ជាដើម សាងសង់លើផ្ទៃដីទំហំ ៤០៣៦ ម៉ែត្រការ៉េ ។
តំណាងក្រុមហ៊ុន រ៉ូយ៉ាល់ គ្រុប បានបង្ហាញភាពជឿជាក់យ៉ាងមុតមាំថា ក្រោយមានវត្តមានអគារភ្លោះដ៏ប្រណិតនេះផុសចេញជារូបរាងឡើង នឹងក្លាយជាចំណែកនៃមោទនភាពជាតិរបស់កម្ពុជា ដែលបង្ហាញអោយឃើញពីសមត្ថភាព និង ភាពរីកចំរើនរបស់ប្រទេស នៅលើឆាកអន្តរជាតិ។ អាគារអន្តរជាតិ Royal One នឹងត្រូវសាងសង់ដោយក្រុមហ៊ុនសំណង់ចិន Huashi Group ដែលជាក្រុមហ៊ុនសំណង់លំដាប់កំពូលនៅប្រទេសចិន មានបទពិសោធន៍ខ្ពស់ក្នុងការសាងសង់អាគារអន្តរជាតិ ។
មន្ត្រីជាន់ខ្ពស់នៃរាជរដ្ឋាភិបាលកម្ពុជា បានលើកឡើងថាគម្រោងនេះ ពិតជាបានចូលរួមចំណែកលើកកម្ពស់សោភ័ណភាព និងការអភិវឌ្ឍន៍រាជធានីភ្នំពេញ ផ្ដល់បទពិសោធន៍ល្អៗ ផ្នែកវិស្វកម្ម និងស្ថាបត្យកម្មដល់កម្ពុជា ។ គម្រោងអាគារអន្តរជាតិ Royal One នេះ ពិតជាកើតឡើងចំពេល ដែលកម្ពុជា កំពុងមានស្ថានភាពសេដ្ឋកិច្ចល្អ ស្ថេរភាពនយោបាយល្អ និងគោលនយោបាយ គាំទ្រពីរាជរដ្ឋភិបាលដល់អាជីវកម្ម។
វិស័យសំណង់នៅកម្ពុជា បានរីកដុះដាលយ៉ាងឆាប់រហ័ស ក្នុងរយៈពេលជិត២ទសវត្សរ៍កន្លងមកនេះ ។ រាជរដ្ឋាភិបាល តាមរយៈក្រសួងរៀបចំដែនដី បានសម្រេចអនុញ្ញាតឲ្យមានការសាងសង់សំណង់នៅទូទាំងប្រទេស ប្រមាណ ៤ម៉ឺន គម្រោង មានតម្លៃទុនវិនិយោគសរុបជាង ៤៣ពាន់លានដុល្លារអាមេរិក ក្នុងនោះ គម្រោងអគារខ្ពស់ៗ ចាប់ពី៥ជាន់ឡើងទៅមានចំនួនជាង ១.២០០ អគារ និង លំនៅដ្ឋានលក្ខណៈបុរី មានចំនួន ២៣៥ ទីតាំង ៕
