ភ្នំពេញ: អគ្គនាយករដ្ឋាករទឹកស្វយ័តក្រុងភ្នំពេញលោក ស៊ឹម ស៊ីថា បានបញ្ជាក់ថា រោងចក្រផលិតទឹកស្អាតតម្លៃជាង២៥លានដុល្លារ ត្រូវបានរដ្ឋាករទឹកស្វយ័តក្រុងភ្នំពេញនឹងដាក់ឲ្យដំណើរការរោងចក្រប្រព្រឹត្តកម្មទឹកស្អាតចំការមនគ្រោងនឹងដាក់ឲ្យប្រើប្រាស់នៅខែតុលា ឆ្នាំ២០១៩ខាងមុខនេះ ដើម្បីរួមចំណែកបង្កើនបរិមាណផ្គត់ផ្គង់ទឹកស្អាតជូនប្រជាពលរដ្ឋ។
ការលើកឡើងនេះ ក្នុងឱកាសលោកអញ្ជើញដឹកនាំប្រតិភូមកពីក្រសួងសេដ្ឋកិច្ច និងហិរញ្ញវត្ថុ, តំណាងទីភ្នាក់ងារ AFD និងក្រុមហ៊ុនទទួលសិទ្ធិម៉ៅការសាងសង់ VINCI (វ៉ាងស៊ី)របស់ប្រទេសបារាំង ចុះពិនិត្យការដ្ឋានសាងសង់ រោងចក្រប្រព្រឹត្តកម្មទឹកស្អាតចំការមននៅព្រឹកថ្ងៃទី២៧ ខែកុម្ភៈនេះ។
លោក ស៊ឹម ស៊ីថា បានបញ្ជាក់ថា គិតមកដល់ពេលនេះ ការសាងសង់រោងចក្រ ប្រព្រឹត្តកម្មទឹកស្អាតចំការមននេះ សម្រេចបានជាង៦០ភាគរយហើយ។ ដោយកំពុងជំរុញឲ្យដំណើរការសាងសង់ចប់តាមគម្រោង ហើយអាចនឹងដាក់ដំណើរការសាកល្បងនៅខែតុលា ឆ្នាំ២០១៩ខាងមុខនេះ។
លោកបន្តថា វាមានសមត្ថភាពផលិតទឹក ៥២,០០០ម៉ែត្រគូបក្នុង១ថ្ងៃ ដែលបានការគាំទ្រហិរញ្ញប្បទាន ពីទីភ្នាក់ងារបារាំងសម្រាប់ការអភិវឌ្ឍន៍ (AFD) និងថវិកាបដិភាគរបស់រដ្ឋាករទឹកស្វយ័តក្រុងភ្នំពេញ សរុបប្រមាណ២៥លានដុល្លារអាមេរិក។
បច្ចុប្បន្នរដ្ឋាករទឹកស្វយ័តក្រុងភ្នំពេញកំពុងដំណើការរោងចក្រផលិតទឹកស្អាតចំនួន៣ទីតាំង គឺរោងចក្រផលិតទឹកស្អាតនិរោធ ដែលមានសមត្ថភាពផលិតទឹកបាន២៦ម៉ឺនម៉ែត្រគូបក្នុង១ថ្ងៃ, រោងចក្រផលិតទឹកស្អាតជ្រោចង្វារ ផលិតទឹកស្អាតបាន១៤ម៉ឺនម៉ែត្រគូបក្នុង១ថ្ងៃ និងរោងចក្រផលិតទឹកស្អាតភូមិព្រែក ក្នុងសង្កាត់ស្រះចក ខណ្ឌដូនពេញ មានសមត្ថភាពផលិតទឹកបាន១៧ម៉ឺនម៉ែត្រគូបក្នុង១ថ្ងៃ។ ប្រសិនបើរោងចក្រផលិតទឹកស្អាតចំការមន ដាក់ដំណើរការទៀតនោះ រដ្ឋាករទឹកស្វយ័តក្រុងភ្នំពេញ នឹងអាចផលិតទឹកស្អាតកើនឡើងជាង៦២ម៉ឺនម៉ែត្រគូបក្នុង១ថ្ងៃ។
បើគិតត្រឹមដើមឆ្នាំ២០១៩នេះ រដ្ឋាករទឹកបានតភ្ជាប់បណ្តាញទឹកសរុបចំនួន៣,១១០គីឡូម៉ែត្រ និងមានអតិថិជនតភ្ជាប់បណ្តាញប្រើប្រាស់ទឹកចំនួន ៣៦៤,១៥០បណ្តាញនៅរាជធានីភ្នំពេញ និងខេត្តកណ្តាល៕
