ហ្វីលីពីននឹងភ្ជាប់ជើងហោះហើរត្រង់ម៉ានីល-ភ្នំពេញលើកដំបូងនាដើមខែមេសា

ភ្នំពេញ៖ ក្រុមហ៊ុន​អាកាសចរ Philippines Airline នឹង​ត​ភ្ជាប់​ជើងហោះហើរ​ត្រង់​លើកដំបូង​ពី​រដ្ឋធានី​ម៉ានីល-រាជធានី​ភ្នំពេញ​នា​ដើមខែ​មេសា ឆ្នាំ២០១៩ ខាងមុខឆាប់ៗនេះ ដោយ​កម្ពុជា​សង្ឃឹមថា នឹង​ទទួលបាន​កំណើន​ភ្ញៀវទេសចរ​បន្ថែម​តាមរយៈ​ការហោះហើរ​ត្រង់នេះ។

ការលើកឡើង​នេះ ក្នុងអំឡុងពេល​ប្រតិភូ​ក្រុមហ៊ុន​អាកាសចរ Philippines Airline ដឹកនាំ​ដោយ​លោក Jaime J. Bautista ប្រធាន​ក្រុមហ៊ុន បានមក​ជួបពិភាក្សា​ជាមួយ​លោក ថោង ខុន រដ្ឋមន្ត្រី​ក្រសួងទេសចរណ៍ នៅ​ទីស្ដីការ​ក្រសួងទេសចរណ៍ នៅ​ថ្ងៃទី០៥ ខែមីនា ឆ្នាំ២០១៩នេះ។

ក្រោយ​បញ្ចប់​កិច្ចប្រជុំ លោក តុ​ប សុភ័ក អនុរដ្ឋលេខាធិការ និង​ជា​អ្នកនាំពាក្យ​ក្រសួងទេសចរណ៍ បាន​ថ្លែងប្រាប់​ក្រុម​អ្នកសារព័ត៌មាន​ថា ក្រុមហ៊ុន​អាកាសចរ Philippines Airline នឹង​ចាប់ផ្ដើម​ហោះហើរ​ត្រង់​ពី​រដ្ឋធានី​ម៉ានីល ទៅមក​រាជធានី​ភ្នំពេញ។ លោក​ថា តាម​ការរំពឹងទុក គឺ​ក្រុមហ៊ុន​នេះ​នឹង​បើក​ការហោះហើរ​ត្រង់នា​ដើមខែ​មេសា ឆ្នាំ២០១៩ខាងមុខ ហើយ​ការហោះហើរ​ត្រង់នេះ​ប្រើពេល​តែ​ជាង ២ម៉ោង​ប៉ុណ្ណោះ។

លោក​បន្តថា ក្រសួងទេសចរណ៍​មាន​សុទិដ្ឋិនិយម​ថា តាមរយៈ​ការតភ្ជាប់​ជើងហោះហើរ​ត្រង់នេះ គឺ​នឹង​ជួយ​ជំរុញ​កំណើន​ទេសចរ​ពី​ហ្វីលីពីន និង​ប្រទេស​ទី៣ មកកាន់​កម្ពុជា​កាន់តែ​ច្រើន ខណៈ​បច្ចុប្បន្ន ភ្ញៀវទេសចរ​ហ្វីលីពីន​ដែល​មក​ទស្សនា​កម្ពុជា​ក្នុង​ឆ្នាំ២០១៨ ប្រមាណ​តែ​ជាង ៩ម៉ឺន​នាក់​ប៉ុណ្ណោះ។

លោក តុ​ប សុភ័ក បាន​លើកឡើងថា តាម​ប្រសាសន៍​របស់លោក​រដ្ឋមន្ត្រី ថោង ខុន ការតភ្ជាប់​ជើងហោះហើរ​ត្រង់​ម៉ានីល-ភ្នំពេញ​នេះ ជា​ប្រវត្តិសាស្ត្រ​លើកដំបូង​របស់​កម្ពុជា ពីព្រោះ​តាំងពី​ឆ្នាំ១៩៧០មក កម្ពុជា​មិនទាន់មាន​ជើងហោះហើរ​ត្រង់​ណាមួយ ពី​ភ្នំពេញ​ទៅមក​ម៉ានីល​ឡើយ ប៉ុន្តែ​ដោយសារ​កម្ពុជា​បច្ចុប្បន្ន​មាន​សន្តិភាព ស្ថិរភាព និង​ការអភិវឌ្ឍ ទើប​ក្រុមហ៊ុន​អាកាសចរ Philippines Airline ក៏ដូចជា​ក្រុមហ៊ុន​អាកាសចរ​ក្រៅប្រទេស​ដទៃទៀត ពង្រីក​ការតភ្ជាប់​ជើងហោះហើរ​ត្រង់​បែបនេះ។ ម្យ៉ាងទៀត កត្តា​ដែល​ជំរុញឱ្យមាន​ការហោះហើរ​ត្រង់នេះ ដោយសារ​និ​ន្ន​នា​ការ​របស់​ភ្ញៀវទេសចរ​បច្ចុប្បន្ន ពោលគឺ​ពួកគេ​និយម​ចូលចិត្ត​ការហោះហើរ​ត្រង់​ងាយស្រួល និង​ប្រើពេល​ខ្លី​ឆាប់​ដល់​គោលដៅ។

គួរ​ជម្រាប​ថា បច្ចុប្បន្ន ក្រុមហ៊ុន​អាកាសចរ​មួយ​របស់​ហ្វីលីពីន ក៏បាន​ហោះហើរ​ត្រង់​ពី​ទីក្រុង​សេ​ប៊ូ (ទីក្រុង​មួយ​នៅលើ​កោះ​សេ​ប៊ូ នៃ​ប្រទេស​ហ្វីលីពីន) មក​ក្រុង​សៀមរាប ដោយ​ក្នុង​មួយ​សប្ដាហ៍​ហោះហើរ​បាន​ចំនួន៤ជើង៕