ភ្នំពេញ: ក្រុមហ៊ុនចិនមួយឈ្មោះ China Machinery Engineering Corporation ចាប់អារម្មណ៍វិនិយោគលើវិស័យថាមពលកកើតឡើងវិញ និងការសាងសង់ខ្សែបញ្ជូនអគ្គិសនី។ នេះតាមក្រសួងរ៉ែ និងថាមពលចេញផ្សាយនៅថ្ងៃនេះ។
តាមហ្វេសប៊ុករបស់ក្រសួងរ៉ែ និងថាមពលបានបង្ហាញថា លោក ស៊ុយ សែម រដ្ឋមន្ត្រីក្រសួងរ៉ែនិងថាមពលបានអនុញ្ញាតឲ្យលោក Zhang Chun ប្រធានក្រុមហ៊ុន China Machinery Engineering Corporation ដែលជាក្រុមហ៊ុនរដ្ឋចិន និងសហការីចូលជួបសម្ដែងការគួរសម និងពិភាក្សាការងារ។
ក្នុងឱកាសនោះ លោកប្រធានបានជម្រាបជូននូវចំណាប់អារម្មណ៍លើការវិនិយោគវិស័យថាមពលជាពិសេសថាមពលកកើតឡើងវិញមានថាមពលខ្យល់ ថាមពលអគ្គិសនីដើរដោយពន្លឺព្រះអាទិត្យ និងការកសាងខ្សែបញ្ជូនអគ្គិសនីជាដើម។
ជាការឆ្លើយតប លោករដ្ឋមន្ត្រីមបានស្វាគមន៍ ចំពោះគោលបំណងរបស់ក្រុមហ៊ុន និងបានផ្តល់អនុសាសន៍មួយចំនួនពាក់ព័ន្ធនឹងការវិនិយោគលើវិស័យថាមពលនៅកម្ពុជា៕
