ភ្នំពេញ: តំណាងក្រុមហ៊ុន NIKE លំដាប់ពិភពលោកអះអាងថា ខ្លួនកំពុងពិចារណាឈានទៅស្វែងរកការពង្រីកទីផ្សារបន្ថែមនៅកម្ពុជា ខណៈវិស័យវាយភណ្ឌក្នុងប្រទេសកម្ពុជា មានរីកចម្រើនខ្លាំងគួរឱ្យកត់សម្គាល់។
ការលើកឡើងនេះ ក្នុងជំនួបពិភាក្សាការងាររវាងលោក ប៉ាន សូរស័ក្ដិ រដ្ឋមន្រ្ដីក្រសួងពាណិជ្ជកម្មកម្ពុជា និងលោក Chris Helzer តំណាង និងជាអនុប្រធានក្រុមហ៊ុន NIKE ទទួលបន្ទុកពាណិជ្ជកម្មសកល និងកិច្ចការរដ្ឋាភិបាល នៅថ្ងៃទី០៦មីនានេះ នៅទីស្ដីការក្រសួងពាណិជ្ជកម្ម។
លោក Chris Helzer បានបង្ហាញចំណាប់អារម្មណ៍ខ្លួនថា ក្រុមហ៊ុនអាចនឹង បង្កើតការងារជូនប្រជាជនកម្ពុជាបានចំនួន ៤៥.០០០នាក់ តាមរយៈការបញ្ជាទិញសម្លៀកបំពាក់ និងស្បែកជើងរោងចក្រដៃគូចំនួន៧នេះ។
លោកបន្ដថា បច្ចុប្បន្នក្រុមហ៊ុនកំពុងស្វែងរកឱកាសពង្រីកនៅក្នុងប្រទេសកម្ពុជាបន្ថែមទៀត ដើម្បីនាំភាពជោគជ័យជូនប្រជាជនកម្ពុជា។
ចំណែកលោក ប៉ាន សូរស័ក្តិ រដ្ឋមន្រ្ដីក្រសួងពាណិជ្ជកម្មបានស្វាគមន៍ក្រុមហ៊ុន NIKE ដែលបានធ្វើការវិនិយោគនៅក្នុងប្រទេសកម្ពុជា។ លោកលើកឡើងអំពីកិច្ចប្រឹងប្រែងរបស់ក្រសួងពាណិជ្ជកម្ម ក្នុងការចូលរួមអនុវត្តន៍កម្មវិធីកំណែទម្រង់របស់រាជរដ្ឋាភិបាល, ការចរចាធ្វើពិពិធកម្មទីផ្សារ, ការចូលរួមបង្កើតប្លុកពាណិជ្ជកម្ម សេរី និងការចុះកិច្ចព្រមព្រៀង ជាមួយបណ្តាប្រទេសដៃគូអាស៊ាន។
លោករដ្ឋមន្ត្រីបញ្ជាក់ជូនតំណាងក្រុមហ៊ុន NIKE អំពីចក្ខុវិស័យរបស់រាជរដ្ឋាភិបាលក្នុងការបន្ត លើកស្ទួយឧត្តមភាពប្រកួតប្រជែងរបស់កម្ពុជាដូចជាការកសាងហេដ្ឋារចនាសម្ព័ន្ធរូបវន្ត, ការកាត់បន្ថយការិយាធិ បតេយ្យ, ការជំរុញតភ្ជាប់ផ្នែកដឹកជញ្ជូនថាមពល និងឌីជីថល, ការកាត់ បន្ថយតម្លៃអគ្គិសនី និងការបណ្តុះបណ្តាលធនធានមនុស្ស ដើម្បីឆ្លើយតបគម្រោងវិនិយោគ ធំៗជាដើម។
គួរបញ្ជាក់ថា សហរដ្ឋអាមេរិក និងអឺរ៉ុប គឺជាទីផ្សារនាំចេញធំជាងគេរបស់កម្ពុជាក្នុងវិស័យវាយនភណ្ឌកាត់ដេរសម្លៀកបំពាក់ និងស្បែកជើង ហើយការនាំចេញផលិតផលកាត់ដេរសម្លៀកបំពាក់ និងស្បែកជើងក្នុងរយៈពេល៦ខែឆ្នាំ២០១៨នេះមានកំណើនប្រមាណ ១១.១ ភាគរយ ខ្ពស់ជាងឆមាសទី១ ឆ្នាំ២០១៧ ដែលមានត្រឹមតែ៧ភាគរយ៕
