ភ្នំពេញ: រដ្ឋាភិបាលកូរ៉េខាងត្បូងសម្រេចបន្តផ្ដល់ឥណទានសម្បទានសរុបចំនួន៧០០លានដុល្លារអាមេរិកដល់រដ្ឋាភិបាលកម្ពុជាសម្រាប់ឆ្នាំ២០១៩-២០២។ ការបង្ហាញនេះ ក្នុងពិធីពិសាអាហារថ្ងៃត្រង់នៃវេទិកាធុរកិច្ចកម្ពុជា-កូរ៉េ នៅថ្ងៃទី១៥ ខែមីនា ជាមួយសម្តេច ហ៊ុន សែន និងលោក មូន ចេអ៊ីន (Moon Jae-in) ប្រធានាធិបតីសាធារណរដ្ឋកូរ៉េខាងត្បូង។
សម្តេច ហ៊ុន សែន បានបញ្ជាក់ថា៖«សម្រាប់ឆ្នាំ២០១៩-២០២៣ សាធារណរដ្ឋកូរ៉េ បានបន្តផ្ដល់ឥណទានសម្បទានសរុបចំនួន ៧០០លានដុល្លារអាមេរិក ដែលរដ្ឋាភិបាលយើងទាំងពីរ ទើបតែបានចុះហត្ថលេខា លើកិច្ចសម្របសម្រួលក្របខណ្ឌស្ដីពីការផ្ដល់ឥណទានសម្បទាន នៃមូលនិធិសហប្រតិបត្តិការអភិវឌ្ឍន៍សេដ្ឋកិច្ចមុននេះបន្តិច»។
នាយករដ្ឋមន្ត្រីនៃកម្ពុជាបានបន្ថែមថា ហិរញ្ញប្បទានសហប្រតិបត្តិការរបស់សាធារណរដ្ឋកូរ៉េ បានផ្ដោតលើវិស័យហេដ្ឋារចនាសម្ព័ន្ធ, វិស័យធនធានទឹក និងសុខុមាលភាពសាធារណៈ, វិស័យអប់រំ និងបណ្ដុះបណ្ដាល ធនធានមនុស្ស, និងវិស័យអភិវឌ្ឍន៍ជនបទ មានជាអាទិ៍ គម្រោងបង្កើតមជ្ឈមណ្ឌលបណ្ដុះបណ្ដាល អាកាសចរណ៍ស៊ីវិល គម្រោងស្ដារផ្លូវជាតិលេខ២ និងផ្លូវជាតិលេខ២២ជាដើម។
សម្ដេចបានបន្តថា ទំនាក់ទំនងការទូតនេះត្រូវបានតភ្ជាប់ឡើងវិញ នៅថ្ងៃទី៣០ ខែតុលា ឆ្នាំ១៩៩៧ បន្ទាប់ពីសម្ដេចបានធ្វើទស្សនកិច្ចផ្លូវរដ្ឋនៅសាធារណរដ្ឋកូរ៉េ នាខែកក្កដា ឆ្នាំ១៩៩៦ និងសម្រេចឲ្យមានការចាប់ផ្ដើមឡើងវិញនូវទំនាក់ទំនងការទូតរវាងប្រទេសទាំងពីរ។
សម្ដេចបានថ្លែងថា ផ្ដើមចេញពីការភ្ជាប់ទំនាក់ទំនងឡើងវិញនេះ មិត្តភាព និងកិច្ចសហប្រតិបត្តិការទ្វេភាគីរវាងប្រទេសទាំងពីរកាន់តែមានការរីកចម្រើនជាបន្តបន្ទាប់ទាំងផ្នែកនយោបាយ សេដ្ឋកិច្ច និងសង្គម ដែលត្រូវបានឆ្លុះបញ្ចាំងតាមរយៈដំណើរទស្សនកិច្ចទៅវិញទៅមករបស់ថ្នាក់ដឹកនាំនៃប្រទេសទាំងពីរ, កំណើននៃការប្រាស្រ័យទាក់ទងរវាងប្រជាជន និងប្រជាជន, និងកំណើនពាណិជ្ជកម្ម វិនិយោគ និងទេសចរណ៍
គួរបញ្ជាក់ថា ក្នុងក្របខណ្ឌហិរញ្ញប្បទានសហប្រតិបត្តិការគិតពីឆ្នាំ១៩៩៦ ដល់ឆ្នាំ២០១៨ រដ្ឋាភិបាលសាធារណរដ្ឋកូរ៉េខាងត្បូងបានផ្តល់ហិរញ្ញប្បទានប្រមាណ ៦៣២លានដុល្លារអាមេរិក ក្នុងនោះហិរញ្ញប្បទានឥតសំណងមានប្រមាណ ៣០០លានដុល្លារអាមេរិក៕
