ភ្នំពេញ: លោកនាយករដ្ឋមន្រ្តី ហ៊ុន សែន នៅថ្ងៃទី ២២មីនានេះបានថ្លែងថា ទំហំទឹកប្រាក់ប្រមាណ ៧០ភាគរយ ដែលស្នើសុំពីចិន មិនមែនយកមកទិញរថយន្ត ឬយន្តហោះមកជិះផ្ទាល់ខ្លួនទេ គឺយកមកធ្វើផ្លូវថ្នល់ ស្ពាន ប្រឡាយទឹក និងប្រព័ន្ធធារាសាស្រ្តនានា បន្ទាប់ពីមានអ្នករិះគន់ថា កម្ពុជាខ្ចីលុយពីចិនយ៉ាងគំហុក។
ការថ្លែងនេះ ក្នុងកម្មពិធីបើកការដ្ឋានសាងសង់ផ្លូវល្បឿនលឿនជាលើកដំបូងនៅប្រទេសកម្ពុជា ក្នុងភូមិស្លា ឃុំវល្លិ៍សរ ស្រុកសំរោងទង ខេត្តកំពង់ស្ពឺ នៅថ្ងៃទី ២២ មីនានេះ។ ក្រោមអធិបតីភាពលោក ហ៊ុន សែន នាយករដ្ឋមន្ត្រីកម្ពុជា និងលោក ខុង សៀនយ៉ូវ (KONG XUANYOU) អនុរដ្ឋមន្ត្រីក្រសួងការបរទេសចិន រួមទាំងមន្រ្តីរាជការ ប្រជាពលរដ្ឋ និងបុគ្គលិកក្រុមហ៊ុនប្រមាណជិត ១ពាន់នាក់។
លោកនាយករដ្ឋមន្រ្តី ហ៊ុន សែន បានថ្លែងថា លោកបានធ្វើការជាមួយរដ្ឋាភិបាលចិនចាប់តាំងពីឆ្នាំ ១៩៩៦ ដោយលោកបានស្នើសុំថវិកាពីចិនប្រមាណ ៧០ភាគរយ សម្រាប់យកមកធ្វើផ្លូវថ្នល់ ស្ពាន ប្រឡាយទឹក និងប្រព័ន្ធធារាស្រ្តជាច្រើនប្រភេទទៀត ប៉ុន្ដែលោកមិនបានខ្ចីលុយពីចិនមកទិញរថយន្ត ឬយន្តហោះជិះផ្ទាល់ខ្លួនទេ។
លោកបានបញ្ជាក់ថា៖«ខ្ញុំបានធ្វើការជាមួយមិត្តចិនតាំងពីឆ្នាំ១៩៩៦មក ហើយសួរមិត្តចិនមើលថា តើខ្ញុំដែលបានសុំមិត្តចិន ដើម្បីយកលុយមកទិញឡាន ឬទិញយន្តហោះជិះ ឬអត់? ក្នុងនោះ ៧០ភាគរយនៃការដែលខ្ញុំស្នើសុំទៅមិត្តចិន គឺទាក់ទងនឹងផ្លូវថ្នល់ ស្ពាន ហើយមួយភាគទៀត គឺទាក់ទងនឹងប្រឡាយទឹក។ អ៊ីចឹងបានជាទុនដែលកំពុងគំហុកធំមកកាន់កម្ពុជាពីមិត្តចិន នោះ គឺសំដៅទៅលើស្ពាន ផ្លូវ ថ្នល់ និងប្រព័ន្ធធារាស្រ្តនោះហើយ»។
លោក Sam Parker និងលោកស្រី Gabrielle Chefitz ដែលរៀនចប់ថ្នាក់អនុបណ្ឌិតពីសាកលវិទ្យាល័យ Harvard Kennedy School និងជាអ្នកសរសេររបាយការណ៍ ដែលចេញផ្សាយនៅលើគេហទំព័រ SHARE AMERICA កាលពីថ្ងៃទី១២ ខែកក្កដាឆ្នាំ២០១៨នេះ បានរកឃើញថា៖«នៅក្នុងទសវត្សកន្លងទៅនេះ ប្រទេសចិនបានផ្តល់ប្រាក់កម្ចីរាប់រយពាន់លានដុល្លារ ដល់រដ្ឋបរទេសជាច្រើន ដែលជារឿយៗ ប្រទេសទាំងនោះ គ្មានលទ្ធភាពសងចិនវិញបាននោះទេ»។ ការណ៍ដែលគ្មានលទ្ធភាពសងវិញនេះ ដែលធ្វើឲ្យជំនួយបរទេសខ្លះ ក្លាយទៅជាអន្ទាក់បំណុល ព្រោះប្រទេសជំពាក់បំណុល ត្រូវលុះក្រោមឥទ្ធិពលក្នុងកិច្ចការកាទូត ដោយសារតែរឿងបំណុលវ័ណ្ឌកនេះ៕
