ឯកឧត្តម វេង សាខុន រដ្ឋមន្ត្រីក្រសួង កសិកម្ម រុក្ខាប្រមាញ់ និងនេសាទ នៅព្រឹកថ្ងៃពុធ ទី០៤ ខែកក្កដា ឆ្នាំ២០១៨ បានឲ្យដឹងថាប្រទេសកម្ពុជាយើងត្រូវការនាំចូលបន្លែប្រមាណ ២០០ ទៅ ៤០០ តោនក្នុងមួយថ្ងៃ ហើយជារៀងរាល់ត្រូវចំណាយទឹកប្រាក់ប្រមាណពី ១៥០ ទៅ ៤០០ លានដុល្លារ លើការនាំចូលបន្លែពីបរទេស។
ថ្លែងក្នុងពិធីបើកផ្សារណាត់បន្លែសុវត្ថិភាព និងផលិតផលសុវត្ថិភាពនៅក្រុងកំពង់ចាម ក្រោមការចូលរួមដោយសហគមន៍បន្លែសុវត្ថិភាព និងផលិតផលសុវត្ថិភាពក្នុងខេត្តកពង់ចាម ឯកឧត្តម បានបញ្ជាក់ថា កំណើនរបស់ប្រជាពលរដ្ឋ ធ្វើឲ្យតម្រូវការ និងសេចក្តីត្រូវការបន្លែបង្ការមានកំណើនខ្ពស់ ដែលត្រូវនាំចូលពីបរទេស ព្រោះផលិតផលក្នុងស្រុកមិនឆ្លើយតបទៅនឹងតម្រូវការរបស់ប្រជាពលរដ្ឋ។
ឯកឧត្តម វេង សាខុន បន្តថា ការរៀបចំផ្សារណាត់ បន្លែសុវត្ថិភាព និងផលិតផលសុវត្ថិភាព ដើម្បីបង្កើនការយល់ដឹងអំពីបន្លែសុវត្ថិភាព និងផលិតផលសុវត្ថិភាពជាសកម្មភាពមួយជំរុញផលិតកម្មស្បៀង បង្កើនការយល់ដឹងអំពីសុវត្ថិភាពក្នុងចំណោមមហាជន អ្នកលក់ អ្នកទិញ និងអ្នកបរិភោគបន្លែទូទៅនិងជួយផ្សារភ្ជាប់ទំនាក់ទំនងទីផ្សាររវាងអ្នកផលិតនិងខ្សែសង្វាក់អ្នកផលិត និងព័ត៌មានទីផ្សារនៃបន្លែសុវត្ថិភាព និងផលិតផលសុវត្ថិភាព។
ជាមួយតម្រូវដ៏ខ្ពស់នេះ ឯកឧត្តម វេង សាខុន ក៏បានជំរុញដល់កសិករអ្នកផលិតឲ្យមានជួបជុំជជែកគ្នាពីតម្រូវការ ការផ្គត់ផ្គង់នៃផលិតផល ដើម្បីទទួលបានផលប្រយោជន៍ទាំងអស់គ្នា ទាំងសេដ្ឋកិច្ចនិងសុខភាពក្នុងក្របខ័ណ្ឌធានាទីផ្សាររយៈពេលវែង ប្រយោជន៍សម្រាប់កសិករ លើកទឹកចិត្តក្នុងការផលិត លើកស្ទួយផលិតផលកសិកម្ម របស់ជាតិ ពិសេសការចូលរួមការកាត់បន្ថយភាពក្រីក្ររបស់ប្រជាពលរដ្ឋ យើងតាមរយៈគោលការណ៍ទីផ្សារនៃបន្លែសុវត្ថិភាពនិងផលិតផលសុវត្ថិភាពនេះស្របតាមគោលនយោបាយរបស់រាជរដ្ឋាភិបាលយើង៕
