ភ្នំពេញ: ប្រមុខរដ្ឋាភិបាលបានសម្រេចអនុញ្ញាតឲ្យមានការវិនិយោគលើការសង់ស្ថានីយវារីអគ្គិសនីចំនួន៣កន្លែងបន្ថែមទៀត ដោយគម្រោងនៅស្ទឹងពោធិ៍សាត់១មានកម្លាំង ៨០MW ខណៈគម្រោងស្ថានីយអគ្គិសនីដើរដោយពន្លឺព្រះអាទិត្យ ០២ កន្លែងនៅខេត្តពោធិ៍សាត់ ដោយ១ កន្លែងមានកម្លាំង ៦០MW និងនៅកំពង់ឆ្នាំង ០១កន្លែងមានកម្លាំង ៦០MW ក្រោមទុនវិនិយោគសរុប ២៣១,១០លានដុល្លារអាមេរិក។
ក្នុងកិច្ចប្រជុំពេញអង្គគណៈរដ្ឋមន្រ្តី ក្រោមអធិបតីភាពរបស់សម្តេច ហ៊ុន សែន នាយករដ្ឋមន្រ្តីកម្ពុជា បានពិភាក្សាលើរបៀបវារៈស្តីពី“សំណើសុំការពិនិត្យសម្រេចលើគម្រោងវិនិយោគសាងសង់ស្ថានីយវារីអគ្គិសនីស្ទឹងពោធិ៍សាត់ និងខេត្តកំពង់ឆ្នាំង”។
អង្គពិធីបានបង្ហាញថា៖ វិស័យអគ្គិសនីថ្មីចំនួន០២ គឺទី១ គម្រោងវិនិយោគសាងសង់ស្ថានីយវារីអគ្គិសនីស្ទឹងពោធិ៍សាត់១ អានុភាព ៨០មេហ្កាវ៉ាត នៅឃុំប្រមោយ ស្រុកវាលវែង ខេត្តពោធិ៍សាត់ និងទី២ គម្រោងវិនិយោគស្ថានីយអគ្គិសនីដើរដោយពន្លឺព្រះអាទិត្យ ០២ កន្លែងនៅពោធិ៍សាត់ ០១កន្លែង ៦០MW និងនៅកំពង់ឆ្នាំង ០១កន្លែង ៦០MW ដើម្បីផលិតអគ្គិសនីលក់ឲ្យអជ្ញាធរអគ្គិសនីកម្ពុជាវិញ។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានបង្ហាញថា គម្រោងវារីអគ្គិសនីស្ទឹងពោធិ៍សាត់១ គឺជាគម្រោងអាទិភាពមួយដែលរាជរដ្ឋាភិបាលបានបញ្ចូលក្នុងផែនការមេអភិវឌ្ឍនវិស័យអគ្គិសនីដែលត្រូវដាក់ឲ្យដំណើរការនៅឆ្នាំ២០២៣ ដែលវិនិយោគដោយក្រុមហ៊ុន KTC Cable Co.,Ltd និងក្រុមហ៊ុនជាដៃគូរវិនិយោគធ្វើការសិក្សាបុរេសមិទ្ធិលទ្ធភាពចាប់តាំងពីឆ្នាំ២០១១មក។
លោកបន្តថា ភាគីរដ្ឋាភិបាលនិងក្រុមហ៊ុនបានចុះកិច្ចព្រមព្រៀងវិនិយោគក្រោមរូបភាពវិនិយោគសាងសង់-ដំណើរការ-ផេ្ទរ (BOT) ទុនវិនិយោគសរុប ២៣១,១០លានដុល្លារអាមេរិក ទំហំការងារដែលក្រុមហ៊ុនត្រូវសាងសង់រួមមាន៖ ទំនប់ទឹក បំពង់បង្ហូរទឹកផ្លូវថ្នល់ សា្ថនីយវារី អគ្គិសនី អានុភាព ៨០ MW ខែ្សបញ្ជូនតង់ស្យុងខ្ពស់ ២៣០ គីឡូវ៉ុល ប្រវែង ៥គីឡូម៉ែត្រ ពីស្ថានីយវារីអគ្គិសនីស្ទឹងពោធិ៍សាត់១ ទៅភ្ជាប់ជាមួយខែ្សបញ្ជូនតង់ស្យុងខ្ពស់ ២៣០ គីឡូវ៉ុលដែលមានស្រាប់ពីអនុស្ថានីយអូរសោមទៅអនុស្ថានីយពោធិ៍សាត់ និងហេដ្ឋារចនាសម្ព័ន្ធបន្ទាប់បន្សំដទៃទៀត។
លោកបន្តថា គម្រោងនេះ ប្រើរយៈពេលសម្បទាន ៣៩ឆ្នាំ ក្នុងនោះ ៤ឆ្នាំ សម្រាប់ការសាងសង់ និង៣៥ឆ្នាំ សម្រាប់ការធ្វើអាជីវកម្ម លើកលែងពន្ធនាំចូលគ្រឿងចក្រ គ្រឿងម៉ាស៊ីន បរិក្ខាឧបករណ៍ និងសំភារៈនានា សម្រាប់ការសាងសង់ លើកលែងតែប្រេងឥន្ធនៈ ដែលក្រុមហ៊ុនត្រូវតែបង់ពន្ធជាធម្មតាស្របតាមច្បាប់ជាធរមាន និងរយៈពេលលើកលែងពន្ធលើប្រាក់ចំណេញ គឺ០៩ ឆ្នាំ ចាប់ពីថ្ងៃប្រតិបត្តិការអាជីវកម្ម (ពន្ធដទៃទៀតត្រូវបង់ធម្មតា)។
ចំណែក គម្រោងស្ថានីយវារីអគ្គិសនីដោយថាមពលពន្លឺព្រះអាទិត្យ ០២ កន្លែង នៅស្រុកក្រគរ ខេត្តពោធិ៍សាត់ ១ កន្លែង និងនៅស្រុកទឹកផុស ខេត្តកំពង់ឆ្នាំ ១ កន្លែង។ ទីតាំងទី១ អានុភាព ៦០ MW នៅតាមបណ្តោយផ្លូវលេខ៥ ស្រុកក្រគរ ខេត្តពោធិ៍សាត់ និងទីតាំងទី២ អានុភាព ៦០MW នៅតាមបណ្តោយផ្លូវលេខ៥៣ ស្រុកទឹកផុស ខេត្តកំពង់ឆ្នាំង ដោយអនុញ្ញាតឲ្យគណៈកម្មការអន្តរក្រសួងធ្វើការចរចាផ្ទាល់ជាមួយក្រុមហ៊ុន ក្នុងលក្ខខណ្ឌដាក់ឲ្យដំណើរការបន្ទាន់នៅឆ្នាំ២០២១នេះ។
លោក ផៃ ស៊ីផាន ថ្លែងថា ផលប្រយោជន៍ពីការអភិវឌ្ឍគម្រោង គឺកម្ពុជានឹងទទួលបានអគ្គិសនីពីប្រភពថាមពលកកើតឡើងវិញ ដែលមានអានុភាពធំ កាត់បន្ថយការប្រើប្រាស់ឥន្ធនៈដែលមានថ្លៃខ្ពស់។ បន្ថែមបរិមាណផលិត ដែលធានាបាននូវសន្តិសុខថាមពលក្នុងការផ្គង់អគ្គិសនី មានគុណភាព និងមានថ្លៃសមរម្យ។
លោកបន្ថែមថា វាជួយបំពេញកង្វះអគ្គិសនីក្នុងរដូវប្រាំង ផ្តល់ការងារជូនប្រជាពលរដ្ឋក្នុងតំបន់ នៅក្នុងដំណាក់កាលសាងសង់ និងដំណើរការដែលនាំមកនូវបច្ចេកវិទ្យាទំនើប។ បន្ថែមលើនេះ រាជរដ្ឋាភិបាលនឹងទទួលបានចំណូលពន្ធសរុបជាមធ្យមប្រមាណ ៥៦៨ ៣៧៤ ដុល្លារអាមេរិកក្នុង១ឆ្នាំ នេះមិនទាន់គិតដល់ពន្ធដទៃទៀតដែលអគ្គិសនីកម្ពុជា និងអ្នកចែកចាយអគ្គិសនីដទៃទៀតត្រូវបង់ជូនរដ្ឋក្នុងការចែកចាយលក់បន្តឲ្យអ្នកប្រើបា្រស់៕
