ភ្នំពេញ៖ រដ្ឋមន្ត្រីក្រសួងទេសចរណ៍លោកបណ្ឌិត ថោង ខុន បានអះអាងថា រាជរដ្ឋាភិបាលបានសម្រេចឲ្យក្រសួងទេសចរណ៍ដឹកនាំការសិក្សាអំពីការរៀបចំផែនការមេអភិវឌ្ឍន៍ខេត្តកែប ដែលជាខេត្តជាប់ឆ្នេរសមុទ្រមួយរបស់កម្ពុជាឲ្យក្លាយទៅជា «តំបន់ទេសចរណ៍សម្រាកលំហែកម្រិតខ្ពស់» ប៉ុន្តែអាចនឹងមិនមានការបង្កើតឲ្យមាន «កាស៊ីណូ» និងរោងចក្រសហគ្រាសឡើយ។
លោកបណ្ឌិតរដ្ឋមន្ត្រីបានបញ្ជាក់ថា ការសម្រេចរបស់រាជរដ្ឋាភិបាលយ៉ាងដូច្នេះ ត្រូវបានធ្វើឡើងក្នុងកិច្ចប្រជុំ «គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ» ដែលបានធ្វើឡើងកាលពីថ្ងៃទី១៨ ខែមេសានេះ ក្រោមអធិបតីភាពលោកបណ្ឌិត អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
លោកបន្តថា ការអភិវឌ្ឍខេត្តកែបឱ្យក្លាយទៅជាតំបន់ទេសចរណ៍សម្រាកលំហែកម្រិតខ្ពស់នេះ គឺរាប់បញ្ចូលទាំងទីក្រុង ឆ្នេរខ្សាច់ កោះ ផ្សារ កំពង់ផែទេសចរណ៍ ភូមិដ្ឋានប្រជាពលរដ្ឋ មូលដ្ឋានអាជីវកម្មសេវាកម្មទេសចរណ៍ ក៏ដូចជារមណីដ្ឋានទេសចរណ៍នានាផងដែរ ប៉ុន្តែអាចនឹងមិនមានការបង្កើតឱ្យមាន «កាស៊ីណូ» និងរោងចក្រសហគ្រាសឡើយ។
ក្រសួងទេសចរណ៍ក៏បានលើកទឹកចិត្តឱ្យមានការបង្កើតលំនៅដ្ឋានទី២ សម្រាប់ភ្ញៀវទេសចរវ័យចំណាស់ ឬចូលនិវត្តន៍នៅខេត្តកែបនេះផងដែរ ដើម្បីឱ្យពួកគេពន្យារពេលក្នុងការទស្សនា និងស្នាក់នៅក្នុងរយៈពេលយូរក្នុងប្រទេសកម្ពុជា ដែលជំរុញឱ្យពួកគេមានការចំណាយច្រើន។
ជាការពិតណាស់ ថ្វីដ្បិតខេត្តកែបជាខេត្តតូចជាងគេមួយក៏ពិតមែន ប៉ុន្តែខេត្តនេះមានសក្ដានុពលខាងវិស័យទេសចរណ៍មួយដែរ ពិសេសគុណភាពខ្យល់សមុទ្រ កោះទន្សាយ ផ្សារក្តាម ហើយនាពេលខាងមុខនេះ ក៏អាចនឹងមានកំពង់ផែទេសចរណ៍អន្តរជាតិតូចមួយទៀត។
បើតាមលោក ថោង ខុន ក្រៅពីគម្រោងអភិវឌ្ឍន៍ខេត្តកែបទៅជាតំបន់ទេសចរណ៍សម្រាកលំហែកម្រិតខ្ពស់ រាជរដ្ឋាភិបាលក៏បានសម្រេចលើការសិក្សារៀបចំ «ខេត្តកំពតទៅជាតំបន់ទេសចរណ៍វប្បធម៌បេតិកភណ្ឌ និងកសិទេសចរណ៍» ក្នុងពេលដែលរាជរដ្ឋាភិបាលបាននិងកំពុងសាងសង់កំពង់ផែទេសចរណ៍អន្តរជាតិមួយ ក្នុងគម្រោងកិច្ចសហប្រតិបត្តិការមហាអនុតំបន់ទន្លេមេគង្គ ដែលអាចនឹងបញ្ចប់នៅដើមឆ្នាំ២០២០ ខាងមុខ។
មួយទៀត ក៏មានគម្រោងរៀបចំខេត្តកោះកុងទៅជា «តំបន់អេកូទេសចរណ៍» ខណៈខេត្តព្រះសីហនុបានក្លាយជាតំបន់ទេសចរណ៍ និងសេដ្ឋកិច្ចពហុបំណងរួចហើយ ពោលគឺខេត្តជាប់ឆ្នេរសមុទ្រទាំង៤របស់កម្ពុជានេះ សុទ្ធតែមានលក្ខណៈពិសេសរៀងៗខ្លួន ដែលផ្ដល់ផលចំណេញយ៉ាងច្រើនដល់សេដ្ឋកិច្ចជាតិ៕
