ភ្នំពេញ៖ រដ្ឋាភិបាលកម្ពុជា-ចិន បានឯកភាពគ្នាលើអនុស្សារណៈយោគយល់គ្នាមួយ ពាក់ព័ន្ធនឹងការទិញអង្ករ ៤០ម៉ឺនតោនពីកម្ពុជា តាមរយៈក្រុមហ៊ុនសាជីវកម្ម COFCO នៃសាធារណរដ្ឋប្រជាមានិតចិន។ នេះបើតាមការប្រកាសរបស់ក្រសួងពាណិជ្ជកម្មនៅថ្ងៃទី ២៥មេសានេះ។
តាមសេចក្តីប្រកាសរបស់ក្រសួងពាណិជ្ជកម្ម បានបង្ហាញថា ដើម្បីជំរុញការនាំចេញអង្ករទៅកាន់ទីផ្សារអន្តរជាតិ ស្របតាមគោលនយោបាយរបស់រាជរដ្ឋាភិបាល និងពង្រឹងកិច្ចសហប្រតិបត្តិការពាណិជ្ជកម្មទ្វេភាគីកម្ពុជា-ចិន ក្រសួងពាណិជ្ជកម្ម តាមរយៈក្រុមហ៊ុន ហ្គ្រីន ត្រេដ ដែលជាសេនាធិការ បានធ្វើការពិភាក្សាជាមួយក្រុមហ៊ុនសាជីវកម្ម COFCO នៃសាធារណរដ្ឋប្រជាមានិតចិន កាលពីថ្ងៃទី១២ ខែមេសា ឆ្នាំ២០១៩ លើការរៀបចំអនុស្សារណៈនៃការយោគយល់គ្នា (MoU) សម្រាប់ពាណិជ្ជកម្មទំនិញអង្ករកម្ពុជា ចូលទៅកាន់ទីផ្សារប្រទេសចិន។
ក្រសួងបានបន្តថា ជាលទ្ធផលភាគីទាំងពីរ បានឯកភាពគ្នាលើសេចក្តីព្រាងអនុស្សារណៈ ដើម្បីចុះហត្ថលេខានៅក្នុងវេទិកាខ្សែក្រវ៉ាត់ និងផ្លូវ លើកទី២ ដែលដឹកនាំដោយ សម្តេច ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅទីក្រុងប៉េកាំង នៃសាធារណៈរដ្ឋប្រជាមានិតចិន នៅថ្ងៃទី២៧ ខែមេសា ឆ្នាំ២០១៩ ខាងមុខនេះ។
សម្រាប់ចំណុចសំខាន់ៗ នៅក្នុងអនុស្សារណៈដែលភាគីទាំងពីរបានឯកភាពគ្នារួមមាន ភាគីចិនយល់ព្រមទិញអង្ករ ផ្កាម្លិះ អង្ករក្រអូប អង្ករស និងចុងអង្ករ របស់ប្រទេសកម្ពុជា ក្នុងបរិមាណ៤០ម៉ឺនតោន ចាប់ពីខែសីហា ឆ្នាំ២០១៩ រហូតដល់ចុងខែធ្នូ ឆ្នាំ២០២០នេះ។ អនុស្សរណៈនេះនឹងចូលជាធរមានភ្លាម បន្ទាប់ពីគូភាគីទាំងពីរ អនុវត្តបញ្ចប់ដោយជោគជ័យនូវអនុស្សារណៈដំបូង ដែលបានចុះហត្ថលេខា កាលពីថ្ងៃទី១១ ខែមករា ឆ្នាំ២០១៨ ស្តីពីការចូលអង្ករចំនួន ៣០ម៉ឺនតោន។
សេចក្ដីប្រកាសបន្តថា យន្តការត្រួតពិនិត្យធុរកិច្ច៖ គូភាគី នឹងបង្កើតយន្តការត្រួតពិនិត្យធុរកិច្ចរួម ដើម្បីតាមដានការអនុវត្តអនុស្សរណៈរៀងរាល់ត្រីមាស ដើម្បីដោះស្រាយបញ្ហាប្រឈមនានា ដែលកើតឡើងជាយថាហេតុប្រសិនបើកើតឡើងក្នុងកំឡុងពេលអនុវត្តអនុស្សរណៈនៃការយោគយល់គ្នានេះ។
ការប្រកាសទិញអង្ករពីកម្ពុជាកើនដល់៤០ម៉ឺនតោនក្នុង១ឆ្នាំរបស់ចិននេះ បានធ្វើឡើងដោយលោកប្រធានាធិបតី ស៊ី ជិនពីង នៅក្នុងជំនួបជាមួយសម្តេច ហ៊ុន សែន នាទីក្រុងប៉េកាំង កាលពីខែមករា ឆ្នាំ២០១៩ កន្លងទៅ ស្របពេលដែលអឺរ៉ុបបានប្រកាសយកពន្ធអង្ករពីកម្ពុជា។ ជាមួយគ្នានេះ ចិននឹងប្រឹងប្រែងជំរុញទំហំពាណិជ្ជកម្មរវាងកម្ពុជា-ចិនឲ្យកើនឡើងដល់១០ពាន់លានដុល្លារនៅឆ្នាំ ២០២៣ ខណៈបច្ចុប្បន្នទំហំពាណិជ្ជកម្មរវាងប្រទេសទាំងពីរបានកើនឡើងដល់ ៥,៦ពាន់លានដុល្លារ៕
