ភ្នំពេញ: អាជ្ញាធរចំណីអាហារ និងថ្នាំពេទ្យសហរដ្ឋអាមេរិក (U.S.FDA) បានសម្រេចលុបឈ្មោះ ក្រុមហ៊ុននាំចេញផលិតផលចំណីអាហាររបស់កម្ពុជាចំនួន ២០ ចេញពីប្រព័ន្ធគ្រប់គ្រងទិន្នន័យរបស់ខ្លួនសម្រាប់ឆ្នាំ ២០១៩នេះ។ នេះបើតាមសេចក្តីជូនដំណឹងរបស់ក្រសួងពាណិជ្ជកម្មកម្ពុជា កាលពីថ្ងៃទី៦ ខែឧសភា។
ក្រសួងពាណិជ្ជកម្មបានលើកឡើងថា ដោយសារតែក្រុមហ៊ុនទាំងនោះមិនបានជូនដំណឹងពីការចុះបញ្ជីឡើងវិញឲ្យបានត្រឹមត្រូវ នៅត្រឹមដំណាច់ឆ្នាំ ២០។ ក្រុមហ៊ុនពីប្រទេសកម្ពុជាបានធ្លាក់ចុះពីចំនួន ៥៦ មកនៅត្រឹម ៣៦ ក្រុមហ៊ុននៅដើមឆ្នាំ ២០១៩នេះ។ ប៉ុន្តែមិនបានបញ្ជាក់ឈ្មោះក្រុមហ៊ុនទាំងនោះនៅឡើយទេ។
ក្រសួងពាណិជ្ជកម្មកម្ពុជាបានបន្តស្នើឲ្យក្រុមហ៊ុននានាទាក់ទងនឹងតំណាងនៅសហរដ្ឋអាមេរិក គឺក្រុមហ៊ុន Registrar Corp ដើម្បីជួយសម្រួលក្នុងការចុះបញ្ជីជាថ្មី។ ក្រសួងពាណិជ្ជកម្មបានបន្តថា៖«ដើម្បីជៀសវាងនូវការឃាត់ឃាំង ឬសកម្មភាពនិយ័តកម្មផ្សេងៗ ក្រុមហ៊ុន Registrar Corp សហរដ្ឋអាមេរិកនឹងសម្របសម្រួលផ្តល់សេវាផ្ទៀងផ្ទាត់ដោយឥតគិតថ្លៃចំពោះការចុះបញ្ជីទីតាំងផលិតចំណីអាហារឡើងវិញសម្រាប់សុពលភាពឆ្នាំ ២០១៩ ជាមួយ U.S FDA ទើបអាចអនុញ្ញាតឱ្យធ្វើការនាំចូលនិងចែកចាយនៅសហរដ្ឋអាមេរិកបាន»។
ការលុបឈ្មោះក្រុមហ៊ុនបរទេសចេញពីបញ្ជីរបស់អាជ្ញាធរចំណីអាហារ និងថ្នាំពេទ្យរបស់សហរដ្ឋអាមេរិកគឺមិនមែនតែលើប្រទេសកម្ពុជាមួយទេ។ មានក្រុមហ៊ុនចំនួន ៤៧.៦៣៥ ត្រូវបានលុបចេញដែលត្រូវជា ២០ ភាគរយនៃក្រុមហ៊ុនទាំងអស់ ដែលបានចុះបញ្ជីក្នុងឆ្នាំ ២០។ នេះបើតាមការបញ្ជាក់នៅលើគេហទំព័ររបស់ការិយាល័យក្រុមហ៊ុន Registrar Corp ។
សហរដ្ឋអាមេរិកទទួលទិញទំនិញពីប្រទេសកម្ពុជាចំនួន ៣,៨ ពាន់លានដុល្លារក្នុងឆ្នាំ ២០១៨ ក្នុងនោះផលិតផលកសិកម្មមានចំនួន ២៤ លានដុល្លារ។ ផលិតផលកសិកម្មរបស់កម្ពុជាមានស្រូវ កៅស៊ូ អាហារសម្រន់ បន្លែនិងគ្រឿងទេស។ នេះបើតាមការបញ្ជាក់របស់គេហទំព័រនៃការិយាល័យតំណាងពាណិជ្ជកម្មសហរដ្ឋអាមេរិក៕
