ភ្នំពេញ: កម្ពុជាបាននាំចេញផ្លែចេកអំបូងលឿងចំនួន១០០ តោនទៅកាន់ទីផ្សារចិនជាលើកដំបូងហើយ ខណៈមានក្រុមហ៊ុននាំចេញចំនួន ១០ បានដាក់ពាក្យស្នើសុំគោលការណ៍អនុញ្ញាតនាំចេញចេកអំបូងលឿងស្រស់ទៅកាន់ប្រទេសចិន ប៉ុន្ដែមាននតែក្រុមហ៊ុនចំនួន ៥ប៉ុណ្ណោះ ដែលគោរពបានតាមលក្ខខណ្ឌច្បាប់នឹងបច្ចេកទេសនាំចេញ។ នេះបើតាមសេចក្ដីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ។
តាមក្រសួងកសិកម្ម រុក្ខាប្រមាញ់ និងនេសាទបានបង្ហាញថា នៅថ្ងៃទី០៩ ខែ ឧសភានេះ នៅទីស្នាក់ការរបស់ក្រុមហ៊ុន ហ៊ុន ទី ស្ថិតនៅខណ្ឌសែន សុខ មានរៀបចំពិធីសម្ភោធការនាំចេញផ្លែចេកអំបូងលឿងស្រស់កម្ពុជាទៅកាន់ទីផ្សារប្រទេសចិន ក្រោមអធិបតីភាពលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោក លី អាន ទីប្រឹក្សាសេដ្ឋកិច្ចប្រចាំស្ថានទូតសាធារណរដ្ឋប្រជាមានិតចិន ហើយក៏មានភ្ញៀវជាតិ និងអន្តរជាតិបានចូលរួមជាសក្ខីភាព។
លោក ងិន ឆាយ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្មបានឡើងថា កម្ពុជាបានចរចារជាមួយភាគីចិនអំពីនីតិវិធី បែបបទ ឯកសារចាំបាច់សំខាន់ៗទាំងច្បាប់ និងបច្ចេកទេស ជាពិសេសឯកសារអនាម័យ និងភូតគាមអនាម័យមុនឈានទៅចុះហត្ថលេខាលើអនុស្សរណ:នៃការយោគយល់គ្នា កាលពីថ្ងៃទី០២ ខែសីហា ឆ្នាំ២០១៨ស្តីពីការនាំចេកស្រស់ចេញទៅកាន់ទីផ្សារចិនរួចរាល់ហើយ។
លោក លី អាន បានឡើងថា ការអនុវត្តតាមផែនការយុទ្ធសាស្ត្រអភិវឌ្ឍវិស័យកសិកម្ម ២០១៩-២០២៣ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល អគ្គនាយកដ្ឋានកសិកម្មជាសេនាធិការបានខិតខំពុះពារគ្រប់បែបយ៉ាងក្នុងឆន្ទ:ច្បាស់លាស់គឺធ្វើយ៉ាងណានាំកសិផលកម្ពុជាឲ្យបានចូលក្នុងទីផ្សារអន្តរជាតិ ហើយការខិតខំប្រឹងប្រែងរបស់ថ្នាក់ដឹកនាំក្រសួង អគ្គនាយកដ្ឋានកសិកម្ម និងគ្រប់ភាគីពាក់ព័ន្ធបានទទួលលទ្ធផលគួរជាទីមោទនៈ ជាក់ស្តែងគឺថ្ងៃនេះ។
លោកបន្តថា លទ្ធផលនេះមិនអាចកាត់ផ្តាច់បានពីកិច្ចសហប្រតិបត្តិការយ៉ាងល្អប្រសើររវាងភាគីទាំងពីរក្នុងការចរចារ ការឧបត្ថម្ភ គាំទ្រទាំងច្បាប់ និងបច្ចេកទេសពីភាគីចិនធ្វើយ៉ាងណាដើម្បីនាំផ្លែចេកស្រស់កម្ពុជាចូលទៅក្នុងទីផ្សារចិន ហើយទីបំផុតក្រសួងកសិកម្ម រុក្ខាប្រមាញ់ និងនេសាទ និងលោកអគ្គរដ្ឋទូតសាធារណរដ្ឋប្រជាមានិតចិនប្រចាំនៅកម្ពុជាបានឈានដល់ការចុះពិធីសារស្តីពីការអនុញ្ញាតឲ្យកម្ពុជាអាចនាំចេកអំបូងលឿនទៅកាន់ប្រទេសចិន។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានថ្លែងថា ក្នុងចំណោម១០ ក្រុមហ៊ុន ដែលបានដាក់ពាក្យស្នើសុំគោការណ៍អនុញ្ញាតនាំចេញផ្លែចេកអំបូងលឿងស្រស់ មានតែក្រុមហ៊ុនចំនួន ០៥ មានក្រុមហ៊ុន សុវណ្ណ រាជសី, ឡុងស្រេង ហ៊ុយជៀន, ហ្គែនឡែន, ហ្គ្រីនអាយឡែន និងក្រុមហ៊ុនឡងមេត ដែលគោរពបានតាមលក្ខខណ្ឌច្បាប់ និងបច្ចេកទេស ហើយអាចធ្វើការនាំចេញចេកស្រស់ទៅកាន់ទីផ្សារចិនលើកទី១ បានចំនួនជាង១០០តោននាថ្ងៃនេះ។
លោករដ្ឋមន្ត្រីបានថ្លែងថា ពិធីនាថ្ងៃនេះស្របពេលដែលប្រទេសទាំងពីរត្រៀមរៀបចំពិធីរំលឹកខួបលើទី ៦១ឆ្នាំនៃថ្ងៃបង្កើតទំនាក់ទំនងការទូតដែលភាគីទាំងពីរបានកំណត់ថា “ឆ្នាំមិត្តភាពកម្ពុជា-ចិន” ព្រមទាំងកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុង ជ្រោយកម្ពុជា-ចិន ដែលភាគីទាំងពីរបានចុះហត្ថលេខាតាំងពីនៅថ្ងៃទី០៨ ខែមេសា ឆ្នាំ២០១៣ នៅទីក្រុងប៉េកាំង៕
