សហរដ្ឋអាមេរិកបានវាយតម្លៃខ្ពស់ចំពោះផលវិបាកនៃការវាយប្រហារទៅលើក្រុមហ៊ុនទូរគមនាគមន៍ដ៏ធំរបស់ចិនឈ្មោះថា Huawei ខណៈវាបានបង្ហាញសញ្ញាដ៏អាក្រក់មួយប្រាប់ដល់ពិភពលោក ត្រូវចៀសវាងការធ្វើពាណិជ្ជកម្ម ឬដៃគូរដោះដូរទំនិញជាមួយសហរដ្ឋអាមេរិក។ នេះតាមលោក Richard Wolff សាស្ត្រាចារ្យផ្នែកសេដ្ឋកិច្ចនៃសាកលវិទ្យាល័យ Massachusetts។
លោក Richard Wolff ត្រូវបានសារព័ត៌មានរុស្ស៊ី RT ដកស្រង់សំដីកាលពីពេលថ្មីៗនេះថា ការធ្វើសង្គ្រាមពាណិជ្ជកម្មជាមួយប្រទេសចិនបានវិវត្តទៅជាបច្ចេកវិទ្យាមួយរួចទៅហើយ ខណៈទីក្រុងវ៉ាស៊ីនតោនបានហាមឃាត់ក្រុមហ៊ុនអាមេរិក (Google) មិនឲ្យផ្គត់ផ្គង់គ្រឿងបន្លាស់ ឬបច្ចេកវិទ្យាលក់ឲ្យក្រុមហ៊ុន Huawei នេះ។ ការផ្លាស់ប្តូរនេះនឹងធ្វើមិនឲ្យក្រុមហ៊ុនសាជីវកម្មរបស់ប្រទេសចិនអាចចូលប្រើកម្មវិធី និងសេវាកម្មរបស់ Google ក៏ដូចជាបន្ទះឈីបរបស់ក្រុមហ៊ុន Intel និង Qualcomm នៅពេលដែលវិធានការនេះចូលជាធរមាន។
លោកសាស្ត្រាចារ្យរូបនេះបាននិយាយថា៖«វានឹងធ្វើឲ្យសេដ្ឋកិច្ចអាមេរិកមានផលប៉ះពាល់រាប់មិនអស់ រហូតដល់រាប់ឆ្នាំទៀត។ វានឹងធ្វើប៉ះពាល់សេដ្ឋកិច្ចអាមេរិក ហើយមានគំរូគួរឲ្យភ្ញាក់ផ្អើលមួយនៃសង្គ្រាមសេដ្ឋកិច្ចនេះ»។
លោកបានពន្យល់ថា រដ្ឋបាល Trump កំពុងធ្វើទុក្ខបុកម្នេញក្រុមហ៊ុន Huawei អាចនឹងធ្វើជាគំរូអាក្រក់ដល់ក្រុមហ៊ុនបរទេសដទៃទៀត ដែលកំពុងចាប់ដៃធ្វើជំនួញជាមួយអាមេរិក ហើយវាក៏ជាសញ្ញាមួយរំលឹកដល់ក្រុមហ៊ុនដទៃទៀតឲ្យមានការប្រុងប្រយ័ត្ន។
លោកបន្តថា «នេះគឺជាការគិតខុសឆ្គងដ៏គួរឲ្យភ័យខ្លាចរបស់សហរដ្ឋអាមេរិកដែលមានលក្ខណៈស្រដៀងទៅនឹងការគិតខុសនៃសង្គ្រាមប្រើអាវុធដែរ។ លោក Trum កំពុងបង្រៀនដល់ពិភពលោកមិនឲ្យទុកចិត្តធ្វើពាណិជ្ជកម្មជាមួយសហរដ្ឋអាមេរិក»។
អ្នកវិភាគបានបញ្ជាក់ថា គ្មានអ្នកដឹកនាំនយោបាយណាម្នាក់នៅទ្វីបអឺរ៉ុប ឬអាមេរិកឡាទីនបានធ្វើបែបនេះ “ការវាយប្រហារជាសាធារណៈទេ (វាយប្រហារអាជីវកម្មផ្ទាល់ខ្លួនរបស់ឯង)”៕
ប្រភព៖ RT
