ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្រ្តីក្រសួងសាធារណៈការ និងដឹកជញ្ជូន នៅចុងសប្ដាហ៍នេះ អះអាងថា តំបន់ប៉ោយប៉ែត នឹងប្រែក្លាយជាតំបន់អភិវឌ្ឍន៍យ៉ាងខ្លាំង ដោយមានមជ្ឈមណ្ឌលស្តុក និងចែកចាយទំនិញ និងជាតំបន់សេដ្ឋកិច្ចពិសេសដ៏រឹងមាំ បន្ទាប់ពីសាងសង់ច្រកទ្វារអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ៥រួចរាល់ ខណៈទទួលបានកម្ចីឥណទានសម្បទានពីរាជរដ្ឋាភិបាលថៃ។
ការលើកឡើងនេះ ក្នុងពិធីចុះហត្ថលេខាលើកិច្ចសន្យាស្តីពីការសាងសង់ច្រកទ្វារអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ៥ នៅទីស្តីការក្រសួងសាធារណការ និងដឹកជញ្ជូន ក្រោមអធិបតីភាពលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងក្រុមហ៊ុនទទួលការសាងសង់ពីប្រទេសថៃឈ្មោះ FIN TECHNIC។
លោក ស៊ុន ចាន់ថុល បានមានប្រសាសន៍ថា បន្ទាប់ពីគម្រោងសាងសង់អគារច្រកទ្វារព្រំដែនអន្តរជាតិស្ទឹងបត់-បានណងអៀន និងការតភ្ជាប់ផ្លូវភ្ជាប់ទៅផ្លូវជាតិលេខ៥ ដាក់ឲ្យដំណើរការតំបន់ប៉ោយប៉ែត នឹងប្រែក្លាយជាតំបន់អភិវឌ្ឍន៍មួយយ៉ាងខ្លាំង ដែលមានមជ្ឈមណ្ឌលស្តុក និងចែកចាយទំនិញ និងជាតំបន់សេដ្ឋកិច្ចពិសេស ដោយបង្កើតជាសក្តានុពលរូបវ័ន្តដ៏រឹងមាំសម្រាប់ទ្រទ្រង់ដល់គម្រោងវិនិយោគនានាក្នុងស្រុក និងក្នុងប្រទេសនៃមហាអនុតំបន់ទន្លេមេគង្គ។
លោកបន្តថា ស្ពានមិត្តភាពកម្ពុជា-ថៃ (ស្ទឹងបត់-បានណងអៀន) កសាងឡើងក្រោមជំនួយឥតសំណងពីរាដ្ឋាភិបាលប្រទេសថៃ ក្នុងទឹកប្រាក់ប្រមាណជាង ១៩លានដុល្លារអាមេរិក និងការចូលរួមថវិកាបដិភាគពីថវិកាបដិភាគសម្រាប់ការដោះស្រាយផលប៉ះពាល់ ការបោសសម្អាតមីន យុទ្ធភ័ណ្ឌមិនទាន់ផ្ទុះ និងពន្ធអាករផ្សេងៗ។
លោកបន្ថែមថា ស្ពាននេះជាស្ពានធំទី១ដែលបានកសាងពីខ្សែបន្ទាត់ព្រំដែនកម្ពុជា-ថៃ នៅចន្លោះបង្គោលខណ្ឌព្រំសីមាលេខ៥០ និងលេខ ៥១ ដោយមានប្រវែង៦២០ម៉ែត្រ ក្នុងនោះនៅផ្នែកទឹកដីកម្ពុជាមានប្រវែង២១៥ ម៉ែត្រ និងផ្នែកទឹកដីនៃប្រទេសថៃមានប្រវែង៤០៥ម៉ែត្រ ខណៈទទឹងនៃស្ពាន់នេះទំហំ១៧ម៉ែត្រ។
លោកបញ្ជាក់ថា៖«យើងនឹងប្រើប្រាស់ទឹកប្រាក់ប្រមាណជាង ៨រយលានបាតទៀត សម្រាប់ធ្វើបន្ទប់ការិយាល័យគយ អគាររដ្ឋបាល អគារអន្ដោប្រវេសន៍ បន្ទប់ស្នាក់នៅរបស់មន្រ្តី និងបន្ទប់ប្រជុំជាច្រើនទៀត។ ច្រកទ្វារនេះ នឹងទទួលទំនិញចេញ-ចូល និទទួលបើកមានមានភ្ញៀវទេសចរណ៍ ហើយនឹងមានការត្រួតពិនិត្យរួមគ្នា គម្រោងនេះ បែងចែកជាអគារផង និងធ្វើផ្លូវខ្លះ និងក្លោងទ្វារច្រកចេញផង»។
តំណាងក្រុមហ៊ុន FIN TECHNIC ដែលអ្នកទទួលការសាងសង់របស់ប្រទេសថៃបានលើកឡើងផងដែរថា កាលពីខែមេសាកន្លងទៅនេះ សម្តេច ហ៊ុន សែន នាយករដ្ឋមន្ត្រីកម្ពុជា និងលោក ប្រាយុទ្ធ ចាន់អូចា នាយករដ្ឋមន្ត្រីថៃ បានអញ្ជើញជាអធិបតីរួចរាល់ហើយ ដោយវាបានបង្ហាញពីភាពជោគជ័យរបស់ប្រទេសទាំងពីរ។
លោកបន្តថា ភាគីទាំងពីរ បានធ្វើការចាក់បេតុងតភ្ជាប់មុខតំណស្ពានមិត្តភាពកម្ពុជា-ថៃ (ស្ទឹងបត់-បានណងអៀន) បើកការដ្ឋានសាងសង់អគារច្រកទ្វារព្រំដែនអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ៥។«យើងក៏មានពិធីចុះហត្ថលេខាលើកិច្ចព្រមព្រៀងប្រតិបត្តិការរួមគ្នាលើការដឹកជញ្ជូនផ្លូវដែកឆ្លងកាត់ព្រំដែន និងពិធីប្រគល់-ទទួលក្បាលរថភ្លើង (DMU)ផងដែរ»។
គួររំឭកថា ការសាងសង់អគារច្រកទ្វារព្រំដែនអន្តរជាតិស្ទឹងបត់-បានណងអៀន និងសាងសង់ផ្លូវតភ្ជាប់ទៅផ្លូវជាតិលេខ៥វិញ រាជរដ្ឋាភិបាលកម្ពុជា ទទួលបានហិរញ្ញប្បទានសម្បទានពីរាជរដ្ឋាភិបាលថៃ ប្រមាណ ២៦,៤២លានដុល្លារអាមេរិក។ ថវិកានេះ នឹងប្រើប្រាស់សម្រាប់សាងសង់អគារច្រកទ្វារត្រួតពិនិត្យព្រំដែន និងផ្លូវតភ្ជាប់ សំណង់អគារអន្តេវាសិកដ្ឋាន ចំណតសម្រាប់ផ្ទេរទំនិញឆ្លងកាត់ «ឃ្លាំង និងទីលានកុងតែន័រ» ការជួសជុលកែលម្អផ្លូវចាស់ និងសំណង់កាត់បន្ថយគ្រោះទឹកជំនន់៕
