ភ្នំពេញ៖ រដ្ឋាភិបាលកម្ពុជា និងក្រុមហ៊ុនខ្នាតអន្តរជាតិចំនួន២ផ្សេងទៀត ចាប់ដៃគ្នាតំឡើងរោងចក្រអគ្គិសនីដើរដោយប្រេងខ្មៅ និងឧស្ម័ន ដែលមានអនុភាព ៤០០មេហ្គាវ៉ាត់ នៅពេលឆាប់ៗខាងមុខនេះ ខណៈគ្រោងបញ្ចប់នៅខែមេសា ឆ្នាំ២០២០ ស្ថិតនៅស្រុកល្វាឯម ខេត្តកណ្តាល ដើម្បីបិទបញ្ចប់ស្ថានភាពដាច់ភ្លើងនៅរដូវប្រាំងឆ្នាំក្រោយៗទៀត។
ការបង្ហាញគម្រោងនេះ បន្ទាប់ពីអាជ្ញាធរអគ្គិសនីកម្ពុជាបានចុះហត្ថលេខាលើការសាងសង់ ជាមួយក្រុមហ៊ុន CGGC-UN Power.co.ltd និងក្រុមហ៊ុន CHINA NATIONAL HEALY MACHINERY CORPORATION នៅសណ្ឋាគារឡឺរ៉ូយ៉ាល់។ រោងចក្រនេះ ត្រូវបានប្រើប្រាស់ម៉ាស៊ីន វ៉ាត់ស៊ីឡារបស់ប្រទេសហ្វាំងឡង់ និងម៉ាស៊ីនម៉ែន របស់ប្រទេសអាឡឺម៉ង់ ដែលនឹងត្រូវសាងសង់ស្ថិតក្នុងឃុំកោះរះ ស្រុកល្វាឯម ខេត្តកណ្តាល។
គម្រោងនេះ ចែកចេញជា២ផ្នែក៖ ទី១ រោងចក្រផលិតអគ្គិសនី ២០០មេហ្គាវ៉ាត់ ប្រើប្រាស់ម៉ាស៊ីន Wartsila របស់ប្រទេសហ្វាំងឡង់ សាងសង់ដោយក្រុមហ៊ុន CGGC-UN Power.co.ltd និងផ្នែកទី២ រោងចក្រផលិតអគ្គិសនី ២០០មេហ្គាវ៉ាត់ ប្រើប្រាស់ម៉ាស៊ីន MAN របស់ប្រទេសអាល្លឺម៉ង់ សាងសង់ដោយក្រុមហ៊ុន CHINA NATIONAL HEALY MACHINERY CORPORATION។
លោក កែវ រតនៈ អគ្គនាយកអគ្គិសនីកម្ពុជាបានបញ្ជាក់ថា ដើម្បីបង្ការឆ្នាំក្រោយនេះ និងឆ្នាំខាងមុខទៀត រោងចក្រផលិតអគ្គិសនីអានុភាព ៤០០មេហ្គាវ៉ាត់នេះ ជាចំណែកមួយនៃការប្រឹងប្រែងរបស់រាជរដ្ឋាភិបាល ក្នុងការប្រមូលឲ្យបានជាង ១,០០០មេហ្គាវ៉ាត់ថែម សម្រាប់មុនដាច់ឆ្នាំ២០២០ខាងមុខនេះ។
លោកបន្តថា វានឹងបំពេញការខ្វះខាតថាមពលបន្ថែម ព្រមទាំងជួយគាំទ្រដល់ការដាក់ពង្រាយ ស្ថានីយ៍ផលិតថាមពលអគ្គិសនី ដើរដោយពន្លឺព្រះអាទិត្យថ្មីក្នុងប្រទេស និងជួយពង្រឹងគុណភាពថាមពលផ្គត់ផ្គង់ ចូលរាជធានីភ្នំពេញ តាមរយៈការលើកកំពស់តុងស្យុងបានប្រសើរ។
តាមសេចក្ដីប្រកាសព័ត៌មានរបស់អគ្គិសនីកម្ពុជា គម្រោងសាងសង់រោងចក្រផលិតអគ្គិសនីនេះ ចំណាយថវិកាសរុបចំនួន ៣៨០លានដុល្លារអាមេរិក ដែលក្នុងនោះ ថវិកាសាងសង់រោងចក្រផលិត អគ្គិសនីទាំងពីរ ប្រមាណ ៣៥៥លានដុល្លារអាមេរិក និងថវិកាសាងសង់អនុស្ថានីយអគ្គិសនីរួម សម្រាប់រោងចក្រផលិតអគ្គិសនីទាំងពីរ ព្រមទាំងហេដ្ឋារចនាសម្ព័ន្ធផ្សេងៗ ប្រមាណ២៥លានដុល្លារអាមេរិក៕
