ភ្នំពេញ: រោងចក្រកែច្នៃកៅស៊ូរបស់ក្រុមហ៊ុន ទ្រី ភាព គ្រុប (Try Pheap Group Co.,Ltd) បាននិងកំពុងសាងសង់បានប្រមាណ ៧០ភាគរយហើយ នៅលើផ្ទៃដីជិត ២០ហិកតា ដោយគ្រោងនឹងបញ្ចប់ការសាងសង់ ព្រមទាំងបើកសម្ពោធដាក់ឲ្យប្រើប្រាស់កែច្នៃជ័រកៅស៊ូដែលក្រុមហ៊ុនបានប្រមូល នៅចុងឆ្នាំ២០១៩នេះ។
តាមគេហទំព័រហ្វេសប៊ុករបស់ក្រុមហ៊ុន Try Pheap Group Co.,Ltd បានបង្ហាញថា ក្រុមហ៊ុនបានដាំដុះកៅស៊ូរួចរាល់លើផ្ទៃដីចំនួន៤២០០ហិតា ក្នុងនោះផ្ទៃដីកៅស៊ូដែលកំពុងប្រមូលផលចំនួន ១.០៤២ ហិកតា ហើយនៅពេលថ្មីៗនេះ ក្រុមការងារបានចាប់ផ្តើមដាំបន្ថែមចំនួន ៥០០ហិកតាសម្រាប់ឆ្នាំ២០១។ ដោយឡែកនៅឆ្នាំ២០២០ខាងមុខនេះ ក្រុមហ៊ុននឹងបញ្ចប់ការដាំដុះឲ្យគ្រប់ទៅតាមចំនួនផ្ទៃដីដែលទទួលបានពីរាជរដ្ឋាភិបាល។
គេហទំព័របន្ដថា ក្នុងរយៈពេលដ៏ខ្លីខាងមុខនេះ រោងចក្រកែច្នៃកៅស៊ូដែលកំពុងសាងសង់បានប្រមាណ ៧០ ភាគរយលើផ្ទៃដីជិត ២០ហិកតា នឹងបញ្ចប់ការការសាងសង់ ព្រមទាំងបើកសម្ពោធដាក់ឲ្យប្រើប្រាស់សម្រាប់ការកែច្នៃជ័រកៅស៊ូដែលក្រុមហ៊ុនបានប្រមូលពីការជៀរជ័រលើផ្ទៃដីរបស់ក្រុមហ៊ុន នៅចុងឆ្នាំ២០១៩ នេះហើយ។
ជាមួយគ្នានេះដែរ នៅថ្ងៃទី១០ ខែមិថុនា ឆ្នាំ២០១៩ លោក ឃៀង សុជីវ័ន្ត អគ្គនាយករង នាយគ្រប់គ្រងទីស្នាក់ការកណ្តាល លោក ហាន់ ស៊ីណាត អគ្គនាយករង ទទួលបន្ទុកកសិឧស្សាហកម្ម និងអធិការកិច្ច តំណាងដ៍ខ្ពង់ខ្ពស់ លោក អគ្គនាយក និងលោក ហេង សំណាង នាយកគ្រប់គ្រងក្រុមហ៊ុនចំការកៅស៊ូ ទ្រី ភាព បឹងទន្លេម្រេច បានចូលរួមពិធីដាំកូនកៅស៊ូសម្រាប់ឆ្នាំ២០១៩ លើផ្ទៃដី ៥០០ហិកតា និងពិនិត្យមើលដំណើរការសាងសង់រោងចក្រកែច្នៃជ័រកៅស៊ូ។
ទន្ទឹមនឹងនោះ ផលប៉ះពាល់ដែលបណ្តាលមកពីបាតុភូតធម្មជាតិ ដូចជាខ្យល់កន្ទ្រាក់ បានបំផ្លាញដំណាំកៅស៊ូអស់ជាច្រើនហិកតា ដោយមានខ្លះរលំទាំងដើម ខ្លះបាក់ពាក់កណ្តាល ខ្លះបាក់មែកនិងទ្រេតជាដើម៕
