ភ្នំពេញ៖ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអ្នកតំណាងឲ្យរាជរដ្ឋាភិបាលកម្ពុជាលោក ហែម វណ្ណឌី បានចុះហត្ថលេខាលើកិច្ចព្រមព្រៀងឥណទានសម្បទានទឹកប្រាក់ចំនួន ៦០លានដុល្លារអាមេរិក ជាមួយតំណាងធនាគារវិនិយោគអឺរ៉ុប (EIB) សម្រាប់ការអនុវត្តគម្រោងសាងសង់រោចក្រប្រព្រឹត្តិកម្មទឹកស្អាតបាក់ខែង។
សេចក្តីប្រកាសប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ ដែលសារព័ត៌មាន The Plus News ទទួលបាននៅថ្ងៃទី២១មិថុនានេះបានឲ្យដឹងថា គម្រោងនេះមានរយៈពេលអនុវត្តចំនួន ៤ឆ្នាំ ចាប់ពីឆ្នាំ២០១៩ ដល់ឆ្នាំ២០២២ និងមានគោលដៅបង្កើនសមត្ថភាពផលិតទឹកស្អាតបន្ថែមរបស់រដ្ឋាករទឹកស្វយ័តក្រុងភ្នំពេញ ក្នុងបរិមាណ ១៩៥,០០០ម៉ែត្រគូប ក្នុង១ថ្ងៃ នៅក្នុងឆ្នាំ២០២២ បន្ថែមលើសមត្ថភាពផលិត ដែលមានស្រាប់បច្ចុប្បន្ន ៥៦០,០០០ ម៉ែត្រគូបក្នុង១ថ្ងៃ។
គម្រោងនេះមានទឹកប្រាក់សរុបចំនួន ២៤៧ លានដុល្លារអាមេរិក ក្នុងនោះ ឥណទានសម្បទានពីទីភ្នាក់ងារបារាំងសម្រាប់អភិវឌ្ឍន៍ (AFD) ចំនួន៨៥លានដុល្លារអាមេរិក, ឥណទានសម្បទានសរុបពី EIB ចំនួន១០០លានដុល្លារអាមេរិក ហិរញ្ញប្បទានឥតសំណងពីសហគមន៍អឺរ៉ុប (EU/Asian Investment Facility) ចំនួន១៥លានដុល្លារអាមេរិក និងថវិកាបដិភាគរបស់រដ្ឋាករទឹកស្វយ័តក្រុងភ្នំពេញចំនួន ៤៧លានដុល្លារអាមេរិក។
លោក ហែម វណ្ណឌី បានថ្លែងអរគុណ និងវាយតម្លៃខ្ពស់ចំពោះ EIB ដែលបានរួមចំណែកផ្តល់ហិរញ្ញប្បទានគាំទ្រគម្រោងនេះ ក៏ដូចជា កំពុងបន្តគាំទ្រដល់កិច្ចប្រឹងប្រែង របស់រាជរដ្ឋាភិបាលកម្ពុជា ជាមួយនឹងគម្រោងពង្រីកការផ្តល់ហិរញ្ញប្បទាន សហប្រតិបត្តិការដល់វិស័យផ្សេងទៀត ដែលបម្រើដល់អាទិភាព នៃការអភិវឌ្ឍរបស់រាជរដ្ឋាភិបាលកម្ពុជា៕
