ភ្នំពេញ: គម្រោងផ្លូវជាតិលេខ២ និងលេខ២២ គ្រោងនឹងបើកការដ្ឋានធ្វើឡើងក្នុងអំឡុងខែវិច្ឆិកា ឬខែធ្នូខាងមុខនេះ ដោយបានត្រៀមទឹកប្រាក់ចំនួនទឹកប្រាក់សរុប ៥៦លាន ១០ម៉ឺនដុល្លារ បន្ទាប់ពីក្រសួងសាធារណការ និងដឹកជញ្ជូន និងធនាគារនីហរ័ណអាហរ័ណកូរ៉េ (Export-Import Bank of Korea) នៃមូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF) បានចុះកិច្ចសន្យាជាមួយគ្នា។
ការបង្ហាញនេះ ក្នុងកម្មវិធីចុះហត្ថលេខាលើកិច្ចសន្យាផ្ដល់ឥណទានសម្បទាន សម្រាប់គម្រោងសាងសង់ និងធ្វើឲ្យប្រសើរឡើងវិញនូវផ្លូវជាតិលេខ២ និងលេខ២២ តាមរយៈក្រសួងសាធារណការ និងដឹកជញ្ជូន និងធនាគារនីហរ័ណអាហរ័ណកូរ៉េនៃមូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF) នៅទីស្ដីការក្រសួងសាធារណៈ និងដឹកជញ្ជូន នៅថ្ងៃទី ២៥ មិថុនានេះ។
សេចក្ដីប្រកាសព័ត៌មានរបស់ក្រសួងសាធារណការ និងដឹកជញ្ជូនបានបង្ហាញថា ការបើកការដ្ឋានសាងសង់ផ្លូវជាតិលេខ២ និងលេខ២២នេះ នឹងធ្វើឡើងក្នុងអំឡុងខែវិច្ឆិកា ឬខែធ្នូខាងមុខនេះ ដោយបានត្រៀមទឹកប្រាក់ចំនួនទឹកប្រាក់សរុប ៥៦លាន ១០ម៉ឺនដុល្លារ។
ក្នុងនោះថវិកាគ្រោងសម្រាប់ការសាងសង់ (Civil Works) មានចំនួន ៤៣លាន៦សែន១ពាន់ដុល្លារ និងថវិកាបម្រុង (Cortingencies) មានចំនួន ៨លាន ៩ម៉ឺន១ពាន់ដុល្លារ។
គម្រោងនេះ ឆ្លងកាត់រាជធានី-ខេត្តចំនួន៣រួមមាន រាជធានីភ្នំពេញ ខេត្តកណ្តាល និងខេត្តតាកែវ មានប្រវែងផ្លូវជាង ៧២គីឡូម៉ែត្រ«គម្រោងផ្លូវជាតិលេខ២ ចាប់ផ្តើមពីរង្វង់មូលតាខ្មៅ (ស្ថិតក្នុងក្រុងតាខ្មៅ ខេត្តកណ្តាល) ដល់រង្វង់មូលអូរចំបក់ (ស្ថិតក្នុងក្រុងដូនកែវ ខេត្តតាកែវ) និងផ្លូវជាតិលេខ២២ ពីរង្វង់មូលអូរចំបក់ ដល់ផ្លូវជាតិលេខ៣ ត្រង់ផ្សារអង្គតាសោម»។
លោក ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូន បានថ្លែងក្រោយពិធីចុះហត្ថលេខានេះថា គម្រោងនេះ ត្រូវបានបែងចែកជា ៣កំណាត់ផ្លូវធំៗមានដូចជា កំណាត់ទី១ ចាប់ផ្តើមចេញពីរង្វង់មូលតាខ្មៅ ដល់រង្វង់មូលស្ត្រីបីកួរស្រូវ ដែលមានប្រវែង ៨,៧៤គីឡូម៉ែត្រ កំណាត់ទី២ ចាប់ផ្តើមចេញពីរង្វង់មូលស្ត្រីបីកួរស្រូវ ដល់រង្វង់មូលអូរចំបក់ ដែលមានប្រវែង ៥៣,៨១៩គីឡូម៉ែត្រ ស្ថិតក្នុងតំបន់ជនបទ និងកំណាត់ទី៣ ចាប់ផ្តើមពីរង្វង់មូលអូរចំបក់ ដល់ផ្សារអង្គតាសោម (ផ្លូវជាតិលេខ២២) ដែលមានប្រវែង ៩,៦១១ គ.ម ស្ថិតក្នុងតំបន់ជនបទ។
តាមសេចក្ដីប្រកាសព័ត៌មានបញ្ជាក់ថា កិច្ចសន្យាសាងសង់ គម្រោងធ្វើឲ្យប្រសើរឡើងវិញនូវផ្លូវជាតិលេខ២ និងផ្លូវជាតិលេខ២២ ក្រោមឥណទានសម្បទានពីរដ្ឋាភិបាលកូរ៉េ ផ្ដល់ជូនរដ្ឋាភិបាលកម្ពុជា តាមរយៈក្រសួងសាធារណការ និងដឹកជញ្ជូនជាអ្នកអនុវត្ត ហើយក្រុមហ៊ុន HANSHIN Engineering & Construction Co. Ltd ជាអ្នកម៉ៅការសាងសង់ និងស្ថាបនា ក្នុងទំហំទឹកប្រាក់ ៤៥លាន ៧សែន ៥ម៉ឺនដុល្លារ ដោយមិនទាន់គិតពីថវិកាបម្រុង និងរយៈពេលសាងសង់ចំនួន ៣០ខែ៕
