ភ្នំពេញ៖ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ នៅថ្ងៃទី ០៤កក្កដានេះ ជំរុញឲ្យក្រុមហ៊ុនសាងសង់សំណង់ទាំងអស់ត្រូវតែពង្រឹងគុណភាព ជាពិសេសត្រូវគោរពច្បាប់បទដ្ឋានគតិយុត្ត និងបទដ្ឋានបច្ចេកទេសឲ្យបានត្រឹមត្រូវ។
ការថ្លែងនេះ ក្នុងឱកាសដែលក្រសួងរៀបចំដែនដី នគរូបនីយកម្ម និងសំណង់ បានរៀបចំកិច្ចប្រជុំស្ដីពីការងារសិក្សាគំរោងប្លង់ និងសាងសង់អគារ នៅសណ្ឋាគារសុខាភ្នំពេញ ដោយមានការចូលរួមពីប្រធានក្រុមហ៊ុនប្រកបអាជីវកម្មសាងសង់ ប្រធានក្រុមហ៊ុនប្រកបអាជីវកម្មសិក្សាគំរោងប្លង់ ប្រធានក្រុមជាងសំណង់ និងរូបវ័ន្តបុគ្គលសិក្សាគំរោងប្លង់ និងមន្ត្រីរាជការជាច្រើននាក់។
លោកឧបនាយករដ្ឋមន្ត្រី ជា សុផារ៉ា បានថ្លែងថា ក្រុមហ៊ុនសាងសង់ទាំងអស់ ទាំងមិនបានចុះបញ្ជី និងចុះបញ្ជី ត្រូវចូលរួមគោរពច្បាប់ បទដ្ឋានគតិយុត្ត និងបទដ្ឋានបច្ចេកទេស នៅក្នុងអាជីព ដោយមិនត្រូវប្រព្រឹត្តិ ប្រាសចាកអំពីក្រមសីលធម៌វិជ្ជាជីវៈ។
លោកបន្តថា ក្រុមហ៊ុនត្រូវបន្តសិក្សាស្វែងយល់បន្ថែមចំណេះដឹងថ្មីៗ ដូចជាបច្ចេកវិទ្យា និងបច្ចេកទេសថ្មីៗ ដើម្បីធានាដល់សោភ័ណភាព គុណភាពនៃសំណង់ និងសំណង់បៃតង។ ចំណុចនេះ លោកបានបង្ហាញពីបំណងចង់បានឯកសារ ដែលត្រូវបានឆ្លងកាត់ការសិក្សាច្បាស់លាស់របស់ក្រុមហ៊ុនប្រកបអាជីវកម្មសាងសង់ សិក្សាគម្រោងប្លង់ ជាងសំណង់ និងរូបវ័ន្តបុគ្គលសិក្សាគម្រោងប្លង់ទាំងអស់ ទៅតម្កល់ទុកនៅក្រសួងរៀបចំដែនដី ដើម្បីទុកឲ្យយុវជនជំនាន់ក្រោយ បានសិក្សាយល់ដឹងបន្ថែម។
លោកបញ្ជាក់ថា៖«ខ្ញុំចង់សុំការគាំទ្រពីក្រុមហ៊ុនប្រកបអាជីវកម្មសាងសង់ សិក្សាគម្រោងប្លង់ ជាងសំណង់ និងរូបវ័ន្តបុគ្គលសិក្សាគម្រោងប្លង់ទាំងអស់ ដើម្បីជាគុណប្រយោជន៍ សម្រាប់សង្គមជាតិ សម្រាប់បន្តចំណេះដឹង លើផ្នែកបច្ចេកទេស សោភ័ណភាព និងកិច្ចការងារសំខាន់ៗជាច្រើនទៀត»៕
