កម្ពុជាគ្រោងនាំចូលអំបិលពីចិនចំនួនជិត ៥ម៉ឺនតោន ខណៈកម្ពុជាសល់អំបិលក្នុងស្ដុកតែ៣ម៉ឺនតោនប៉ុណ្ណោះ

ខេត្តកំពត៖ ប្រទេសកម្ពុជា គ្រោង​នឹង​បន្ត​នាំចូល​អំបិលពីប្រទេសចិនប្រមាណចំនួន ៥ម៉ឺនតោន ​ដើម្បី​ផ្គត់ផ្គង់​ត​ម្រូ​វ​ការ​ក្នុង​ស្រុក​សម្រាប់ឆ្នាំ​ ២០១៩នេះ​ ខណៈ​ការ​ផលិត និង​អំបិលនៅក្នុងស្ដុកត្រឹម​​តែ​ ៣ម៉ឺនតោន​​ប៉ុណ្ណោះ ខណៈ​កម្ពុជាបាននាំចូល​អំបិលពីចិន​ ២ឆ្នាំ​ជាប់ៗ​គ្នា​ចាប់​តាំង​ពី​​ឆ្នាំ​ ២០១៨នេះ។

លោក ​ប៊ុន ​បារាំង​ សហប្រធាន​សហគមន៍​អ្នក​ផលិត​អំបិល​ខេត្ត​កំពត​-​កែបបានថ្លែងថា ផ្ទៃដី​ផលិត​អំបិល​នៅ​កម្ពុ​ជា​​ប្រមាណ​​ជាង​ ៤ ៥០០ ​ហិកតា ​ដែល​គ្រប​ដណ្តប់​​ក្នុង​ខេត្ត​កំពត-​កែប​ ហើយ​ការ​ផលិត​ឆ្នាំ​​នេះ​សម្រេច​បាន​ទិន្ន​ផល​​តែ​ជាង​ ៣ម៉ឺន​តោន​ប៉ុណ្ណោះ​ ក្នុង​ចំណោម​​​តម្រូវ​ការ​ប្រើប្រាស់​សរុប​​​ពី ៨-១០ ​​ម៉ឺន​តោន​ ​ក្នុង ​១ ​ឆ្នាំៗ​។

លោកបន្តថា ប្រសិន​បើ​អាកាសធាតុ​អំណោយ​ផល​ល្អ​ ​ក្នុង ​១ ​ហិកតា ​គេ​អាច​ផលិត​អំបិល​បាន​​ប្រហែល​ ​២០ ​តោន​​។​ ​លោកថា៖​ «​ការ​នាំចូល​អំបិល​ពី​​បរទេស​ ​គឺ​ជា​រឿង​ចៀស​មិន​ផុត​សម្រាប់​ឆ្នាំ​នេះ ព្រោះ​គិត​ត្រឹម​ពេល​នេះ ​អំ​បិ​ល​​នៅ​ក្នុង​ឃ្លាំង​ស្តុក​បាន​បញ្ចេញ​លក់​ទៅ​លើ​ទីផ្សារ​អស់​ច្រើន​មក​ហើយ​»។

​លោក​​លើក​ឡើង​ថា ទោះ​​ជា​ក្នុង​ឆ្នាំ ​២០១៩ នេះ​​កម្ពុជា​ជួប​ប្រទះ​នឹង​បាតុភូត​អាកាសធាតុ​ El Nino ដែល​ធ្វើ​ឲ្យ​​​អាកាស​ធាតុ​ក្តៅ​ខ្លាំង និង​​​អូស​បន្លាយ​យូរ​ តែ​សម្រាប់​តំបន់​ផលិត​អំបិល​ក្នុង​ខេត្ត​កំពត-​កែប បែរ​ជា​ទទួល​ភ្លៀង​ធ្លាក់​​​​ច្រើន ​ដែល​ធ្វើ​ឲ្យ​កសិករ​មិន​អាច​ធ្វើ​ស្រែ​អំបិល​បាន​​។​

​លោក​បន្ត​ថា​ កង្វះ​កម្លាំង​ពលកម្ម​ជា​មូលហេតុ​ចម្បង​ធ្វើ​ឲ្យ​ចំនួន​អ្នក​ផលិត​អំបិល​ធ្លាក់​ចុះ​ពី​ ១ ឆ្នាំ ​ទៅ ​១ ឆ្នាំ។ លោក​ថ្លែង​ថា៖ «​ការ​​ធ្វើ​ស្រែ​អំបិល​ត្រូវ​ការ​មនុស្ស​ដែល​មាន​​ភាព​អំណត់ និង​ធ្វើ​ការ​ក្រោម​កម្តៅ​ថ្ងៃ​ ​ហេតុ​​នេះ​ទើប​បច្ចុប្បន្ន​មាន​​​អ្នក​ផលិត​ជា​ច្រើន​​​បាន​នាំ​គ្នា​ងាក​ចេញ​ទៅ​ស្វែងរក​ការងារ​ផ្សេង​។​ នេះ​ជា​បញ្ហា​ប្រឈម​មួយ​ដែល​កំពុង​​បន្ត​កើត​មាន​ជា​រៀងរាល់​ថ្ងៃ​»។

កម្ពុជា​ផលិត​អំបិល​បាន​ច្រើន​ប្រមាណ ​១០ ​ម៉ឺន​តោន​ក្នុង ​១ ឆ្នាំ​រយៈពេល ​៣ ឆ្នាំ​ជាប់​ៗគ្នា​ គឺ​ពី​ឆ្នាំ ​២០១៤ ​ដល់ ​២០១៦។​ ប៉ុន្តែ​ទិន្នផល​​នេះ​បាន​ធ្លាក់ចុះ​ ​៣ ​ឆ្នាំ ​ជាប់​គ្នា​វិញ​ចាប់​ពី​ឆ្នាំ ​២០១៧​ មក​។ ​តម្លៃ​អំបិល​បច្ចុប្បន្ន​​មិនមាន​ការ​ប្រែប្រួល​ច្រើន​ទេ ដោយ​ក្នុង ​១ ​តោន ​មាន​តម្លៃ​ប្រមាណ​ ​១០០ ​ដុល្លារ​ ប្រហាក់​ប្រហែល​នឹង​ឆ្នាំ​មុន​ដែរ៕