ផ្លូវជាតិ​លេខ ៥៥ ចំណាយ​ខ្នង់ ១៣២លាន​ដុល្លារ​អាមេរិក គ្រោង​ដាក់​ឲ្យ​ប្រើប្រាស់ឆាប់ៗនេះ

ពោធិ៍សាត់៖ ផ្លូវជាតិ​លេខ៥៥ មាន​ប្រវែង​សរុប​ប្រមាណ ១៨០គីឡូម៉ែត្រ និង​ទទឹង៩ម៉ែត្រ មាន​ស្ពាន​ចំនួន៤៥ ក្រោម​ហិរញ្ញប្បទាន​សម្បទាន​ពី​រដ្ឋាភិបាល​ចិន​ រួមជាមួយ​ថវិកាបដិភាគ​របស់​រា​ជ​រដ្ឋាភិបាល​កម្ពុ​ជាស​រុ​ប​ជាង ១៣២.៨០លាន​ដុល្លារ ​ សហរដ្ឋអាមេរិក ត្រូវបាន​លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន ស្នើ​ទៅ​រដ្ឋាភិបាល ដើម្បី​ដាក់​ដំណើរការ។

ការលើកឡើង​នេះ នៅ​ថ្ងៃទី២២ ខែកក្កដា​នេះ ក្នុងអំឡុងពេល​លោក​ទេសរដ្ឋមន្ត្រី បាន​ដឹកនាំ​មន្ត្រី​ក្រសួង​អមដោយ​តំ​ណាង​ក្រុមហ៊ុន​ម៉ៅការ​សាងសង់ ក្រុមហ៊ុន​ទីប្រឹក្សាបច្ចេកទេស និង​មន្ត្រី នៃ​មន្ទីរ​សាធារណការ និង​ដឹកជញ្ជូន​ខេត្ត​ខេត្ត​ពោធិ៍សាត់ អញ្ជើញ​ចុះ​ត្រួតពិនិត្យ ស្ថានភាព​ផ្លូវជាតិ​លេខ៥៥ ដែល​សាងសង់​ដោយ​សាជីវកម្ម​ស្ពាន​ថ្នល់​ចិន (CRBC) ក្រោម​ការត្រួតពិនិត្យ​លក្ខណៈ បច្ចេកទេស​ពី​ក្រុមហ៊ុន Guangzhou Wanna Construction Supervision Co., Ltd នៃ​សាធារណរដ្ឋ​ប្រជាមានិត​ចិន។

លោក ស៊ុន ចាន់ថុល បាន​ថ្លែងថា ផ្លូវជាតិ​លេខ៥៥ មាន​ប្រវែង​សរុប​ប្រមាណ ១៨០គីឡូម៉ែត្រ និង​ទទឹង៩ម៉ែត្រ មាន​ស្ពាន​ចំនួន៤។ ផ្លូវ​នេះ​សាងសង់ឡើង​ក្រោម​ហិរញ្ញប្បទាន​សម្បទាន​ពី​រដ្ឋាភិបាល​ចិន រួមជាមួយ​ថវិកាបដិភាគ របស់​រាជ​រដ្ឋា​ភិបាល​កម្ពុជា​សរុប​ជាង ១៣២.៨០លាន​ដុល្លារ​សហរដ្ឋអាមេរិក ជា​ប្រភេទ​ផ្លូវ DBST គិត​ចាប់ពី​ផ្លូវ​ប្រសព្វ​ផ្លូវ ជាតិ​លេខ៥ (១៩១+១៥០) រហូតដល់​ភ្នំក្រវាញ-ទីរួមស្រុក​វាលវែង-ថ្មដា ខេត្តពោធិសាត់ (ព្រំដែន​កម្ពុជា-ថៃ ខេត្ត​ត្រា​ត​)​។

លោក​បន្តថា គម្រោង​ផ្លូវ​នេះ​បាន​ចាប់ដំណើរការ​បើក​ការដ្ឋាន​សាងសង់​នៅ​ថ្ងៃទី០៤ ខែឧសភា ឆ្នាំ២០១៥ ក្រោម​អធិ​ប​តី​ភាព​សម្តេច ហ៊ុន សែន ហើយ​រហូតមក​ដល់ពេលនេះ ក្រុមហ៊ុន​បានបញ្ចប់​ការសាងសង់ ១០០ភាគរយ​ហើយ ដោយ​ប្រើប្រាស់​រយៈពេល​សាងសង់​អស់​ចំនួន ៤២ខែ។ លោក​ថា ការចុះពិនិត្យ​ស្ថានភាព​ផ្លូវជាតិ​លេខ៥៥នេះ មាន​គោ​ល​បំណ​ង​ពិនិត្យមើល​ចំណុច​ខ្វះខាត​តិច​តូច ដែល​នៅ​សេសសល់។

លោក ស៊ុន ចាន់ថុល បាន​ណែនាំ​ក្រុមហ៊ុន​សាងសង់ និង​ក្រុមហ៊ុន​ត្រួតពិនិត្យ​បច្ចេកទេស​ឲ្យ​ពិនិត្យឡើងវិញ​លើ​ការដាក់​ភ្លើង​សញ្ញា​ប្រុងប្រយ័ត្ន​ជំនួស​ផ្លាកសញ្ញា​នៅត្រង់ចំណុច​កែង​ខ្លាំង ដើម្បី​ឲ្យ​ប្រជាពលរដ្ឋ​កំពុងធ្វើដំណើ​រ​តាមផ្លូវ​នេះ​ងាយ​មើល និង​មានការ​ប្រុងប្រយ័ត្ន​ខ្ពស់។
លោក​ទេសរដ្ឋមន្ត្រី ក៏បាន​ណែនាំ​ពី​ការធ្វើ​ជញ្ជាំង​លើ​ជម្រាលភ្នំ​ការពារ​ធ្លា​ក់ដី និង​ដុំថ្ម, ប្រមូល​គ្រួស​អណ្ដែត​នៅលើ​ថ្នល់ សំដៅ​ជៀសឲ្យ​ផុត​ពី​គ្រោះថ្នាក់​នានា​ដោយ​យថាហេតុ ព្រោះថា​ផ្លូវ​នេះ​សណ្ដូក​លើ​ដងភ្នំ​មានការ​បត់បែន​ខ្លាំង។

លោក​រដ្ឋមន្ត្រី ក៏បាន​ពិនិត្យ​លើ​បញ្ហា​បច្ចេកទេស​មួយចំនួន​ទាក់ទង​ការសាងសង់ ដើម្បី​ជំរុញ​ឲ្យ​ក្រុមហ៊ុន​ម៉ៅការ​សាង សង់​​ធ្វើការ​កែសម្រួល​បំពេញបន្ថែម​លក្ខណៈ​បច្ចេកទេស​ឱ្យបាន​ត្រឹមត្រូវ​សំដៅ​ធ្វើឱ្យ​ផ្លូវ​នេះ​មាន​គុណភាព រឹងមាំ អាច​ប្រើ​ប្រាស់​ជាប់​បានយូរ​អង្វែង មុនពេល​ស្នើសុំ​គោលការណ៍​ពី​រាជរដ្ឋាភិបាល​ក្នុង​ការដាក់​ដំណើរ ការ​ជា​ផ្លូវការ។

លោក​រដ្ឋមន្ត្រី បាន​គូសបញ្ជាក់ថា៖ «មាន​ផ្លូវ​មាន​ក្តីសង្ឃឹម ផ្លូវ​ល្អ​នាំមក​នូវ​ភ្ញៀវ​ទេសចរណ៍ វិនិយោគិន និង​ការ​ដឹក​​ជញ្ជូ​ន​​កើន​ឡើង ដែលជា​កត្តា ជំរុញ​ដល់​ការបង្កើត​ការងារ​ធ្វើ​ជូន​ប្រជាពលរដ្ឋ និង​ការរីកចម្រើន​សេដ្ឋកិច្ចជាតិ​កាត់បន្ថយ​ភា​ព ក្រីក្រ​ស្រប តាម​គោលនយោបាយ​របស់​រាជ​រដ្ឋាភិបាល ក្រោម​ការដឹកនាំ​​របស់​សម្តេច​​​តេ​​ជោ ហ៊ុន សែន»។

លោក​ទេសរដ្ឋមន្ត្រី ស៊ុន ចាន់ថុល បន្ថែមថា បន្ទាប់​ការកែលំអ​រលើប​ញ្ហា​សេសសល់​មួយចំនួន​ហើយ​នោះ លោក​នឹង​ដាក់​​សំណើសុំ​គោលការណ៍ និង​គោរព​អញ្ជើញសម្តេច ហ៊ុន សែន មក​សម្ពោធ​ដាក់​ឲ្យ​ប្រើប្រាស់​ផ្លូវ​នេះ​ជា​ផ្លូវការ​ក្នុង​ពេ​ល​ឆាប់ៗខាងមុខនេះ៕