កម្ពុជា កំពុង​ចរចា​ខ្ចីប្រាក់​ពី​ចិន​មក​សាងសង់​ផ្លូវជាតិ​លេខ១០ ពី​ស្រុក​សំឡូត បាត់ដំបង ទៅ​កោះកុង​ថែមទៀត

បន្ទាយមានជ័យ៖ លោក​ទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួង​សាធារណការ និង​ដឹកជញ្ជូន បាន​លើកឡើងថា កម្ពុជា កំពុង​ចរចារ​ថវិកា​ប្រមាណ ១៨៣លាន​ដុល្លារ​សហរដ្ឋអាមេរិក​ថែមទៀត ដើម្បី​យកមក​សាងសង់​ផ្លូវជាតិ​លេខ​១០ មួយ​ខ្សែ​បន្ថែមទៀត ដែល​ត​ភ្ជាប់​ពី​ស្រុក​សំឡូត ខេត្តបាត់ដំបង ទៅ​ខេត្តកោះកុង ដែលមាន​ប្រវែង​១៩៣​គីឡូ​ម៉ែត្រ​។

ទេសរដ្ឋមន្ដ្រី ស៊ុន ចាន់ថុល បាន​ថ្លែង​ពី​ខេត្តបន្ទាយមានជ័យ ក្នុងឱកាស​បន្ដ​ចុះ​ពិនិត្យ​ការសាងសង់​ផ្លូវជាតិ​លេខ៥ ពី​ខេ​ត្តបាត់ដំបង មក​ក្រុង​សិរីសោភ័ណ ខេត្ដ​បន្ទាយមានជ័យ នៅ​ថ្ងៃទី២២កក្កដា​នេះ​ថា សម្រាប់​ថវិកា​សាងសង់​ផ្លូវជាតិ​ថ្មី មួយ​ខ្សែ​នេះ គឺជា​ប្រាក់​កម្ចីសម្បទាន​ពី​ប្រទេស​ចិន មានតម្លៃ​ប្រមាណ១៨៣លាន​ដុល្លារ​សហរដ្ឋអាមេរិក ខណៈ​ការបើក​ការដ្ឋាន​សាងសង​ផ្លូវការ​នោះ នឹងធ្វើ​ព្រម​គ្នា​ជាមួយ​ការដាក់​សម្ពោធ​ឲ្យ​ប្រើប្រាស់​ផ្លូវជាតិ​លេខ៥៥ ដែល​អាច​នៅ​អំឡុង​ចុងឆ្នាំ២០១៩នេះ។

លោក​បញ្ជាក់ថា៖«ក្រៅពី​សម្ពោធ​ដាក់​ឲ្យ​ប្រើប្រាស់​ជា​ផ្លូវការ ក៏មាន​បើក​ការដ្ឋាន​សាងសង់​ផ្លូវ​លេខ១០ ចាប់ពី​សំឡូត ចុះមក​វាលវែង ទៅដល់​កោះកុង​តែម្ដង ចឹ​ង​កម្មវិធី​ធ្វើ​រួមគ្នា។ ផ្លូវ​លេខ១០នេះ គឺ​ទទួលបាន​ប្រាក់កម្ចី​សម្បទាន​ពី​ប្រទេស​ចិន​ដែរ ហើយ​ថ្ងៃនេះ​តាម​ខ្ញុំ​ដឹង រដ្ឋលេខាធិការ​ប្រចាំការ​ក្រសួង​សេដ្ឋកិច្ច និង​ហិរញ្ញវត្ថុ លោក​ធ្វើដំណើរ​ទៅ​ប្រទេស​ចិន ដើម្បី​ពិភាក្សា​លើ​ប្រាក់កម្ចី​នេះ»។

ចំពោះ​ពេលវេលា​ជាក់លាក់ ទេសរដ្ឋមន្ដ្រី ស៊ុន ចាន់ថុល មិនទាន់​អាច​បញ្ជាក់​ឲ្យ​ច្បាស់​នៅឡើយ​ទេ ដោយ​គ្រាន់តែ​បង្ហើ​ប​​ថា នឹងត្រូវ​ធ្វើឡើង​ក្រោម​អធិបតីភាព សម្ដេច ហ៊ុន សែន នាយករដ្ឋមន្ដ្រី​កម្ពុជា ហើយ​សម្ដេច​ជា​អ្នកសម្រេច​កំណត់​យក​​ថ្ងៃសម្ពោធ​ផ្លូវជាតិ​លេខ៥៥ និង​បើក​ការដ្ឋាន​សាងសង់​ផ្លូវជាតិ​លេខ១០។

លោក​ទេសរដ្ឋមន្ដ្រី​បញ្ជាក់ថា ការ​កម្ចី​ពី​បរទេស​នេះ​មិនមែន​បញ្ជាក់ថា ប្រទេស​កម្ពុជា​ខ្លួនឯង​មិនមាន​លុយ​នោះទេ ប៉ុន្ដែ​កម្ពុជា​ត្រូវការ​ថវិកា​ដើម្បី​បែងចែក​ទៅ​ផ្នែកផ្សេងៗ នៅក្នុង​ប្រទេស ខណៈដែល​ការកសាង​ហេដ្ឋារចនាសម្ព័ន្ធ គឺ​ត្រូវការ​ថវិកា​ច្រើន ហើយ​ទើប​ដៃគូ​អភិវឌ្ឍន៍​របស់​កម្ពុជា​បានអនុញ្ញាត​ឲ្យ​ខ្ចី ក្នុង​អត្រា​ការប្រាក់​ទាប។ ចំពោះ​ការខ្ចី​លុយ​នេះ ទេ​ស​រដ្ឋមន្ដ្រី​បាន​អះអាងថា កម្ពុជា​បាន​គ្រប់គ្រង​ថវិកា​ទាំងអស់នេះ បាន​យ៉ាង​ល្អ​ដោយ​ក្រសួង​សេដ្ឋកិច្ច និង​ហិរញ្ញវត្ថុ៕