កម្ពុជា​ត្រៀម​ស្នើសុំ​ប្រាក់កម្ចី​ពី​រដ្ឋាភិបាល​ចិន​បន្ថែម ដើម្បី​សាងសង់​ស្ពាន​ឆ្លងទន្លេ​មេគង្គ​មួយទៀតនៅខេត្តក្រចេះ

ក្រចេ៖ រដ្ឋមន្ត្រីក្រសួង​សាធារណការ និង​ដឹកជញ្ជូន លោក​ទេសរដ្ឋមន្ត្រី ស៊ុន ចាន់ថុល បាន​លើកឡើងថា កម្ពុជា​នឹង​ស្នើ​​ប្រាក់​កម្ចីសម្បទាន​ពី​រដ្ឋាភិបាល​ចិន​នៅពេល​ខាងមុខនេះដើម្បី​សាងសង់​ស្ពាន​ឆ្លងទន្លេ​មេគង្គ​មួយទៀត​នៅ​ខេត្ត​ក្រ​ចេះ ដែលមាន​ប្រវែង​សរុប១៧៦១ម៉ែត្រ។

ការ​ថ្លែង​នេះ ក្នុងអំឡុងពេល​លោក​រដ្ឋមន្ត្រី​បាន​ដឹកនាំ​ក្រុមការងារ​ចុះ​ពិនិត្យ​រក​ទីតាំង​សាងសង់​ស្ពាន​ឆ្លងទន្លេ​មេគង្គ នៅ​ខេត្ត​ក្រចេះ នៅ​ថ្ងៃទី២៣ ខែកក្កដា ឆ្នាំ២០១៩នេះ។

លោក ស៊ុន ចាន់ថុល បាន​បញ្ជាក់ថា បន្ទាប់ពី​ពិនិត្យ​នេះ លោក​នឹង​រៀបចំ​គម្រោង​សំណើ​នៅ​ឆ្នាំ២០២០ ហើយ​ការ​សា​ង់​សង់​អាច​នឹងធ្វើ​ឡើង​នៅ​ឆ្នាំ២០២។ លោក​ថា ស្ពាន​នេះ​នឹង​ផ្តល់​ភាពងាយស្រួល​ដល់ ប្រជា​ពល​ដ្ឋ ក្នុងការ​ធ្វើដំណើរ​ពី​ស្ទឹងត្រែង ទៅកាន់​ខេត្តកំពង់ធំ ដែល​ចំណេញ​ពេលវេលា និង​ថវិកា​ច្រើនជាង​មុន។

ពាក់ព័ន្ធ​នឹង​រឿង​ស្នើ​ហិរញ្ញប្បទាន​បរទេស​នេះ លោក ស៊ុន ចាន់ថុល បានស្នើ​សុំ​ដល់​ជន​ទាំងឡាយ កុំឱ្យ​អ្នក​រិះគន់​មក​លើ​​រាជរដ្ឋាភិបាល​កម្ពុជា។ លោក​អះអាងថា កម្ចី​នេះ គឺ​ដើម្បី​ចំណេញ​ជាតិ ចំណេញ​ប្រជាពលរដ្ឋ ហើយ​ខ្ចី​មក​សាងសង់​ហេដ្ឋារចនាសម្ព័ន្ធ។

លោក​បញ្ជាក់ថា ដោយសារតែ​រាចរដ្ឋាភិបាល​កម្ពុជា មាន​ភាពល្អប្រសើរ​មាន​ទំនុកចិត្ត​ខ្ពស់ ទើប​ប្រទេស​ដទៃ​ឱ្យ​ខ្ចីលុយ បើ​សិនជា​រាជរដ្ឋាភិបាល​កញ្ជើធ្លុះ គេ​មិន​ឲ្យ​កម្ពុជា​ខ្ចី​នោះទេ ហើយ​បើ​មិន​ចំណេញ​សេដ្ឋកិច្ចជាតិ ក៏​គេ​មិន​ឲ្យ​ខ្ចី​ទេ។

លោក​បាន​ច្រានចោល​នូវ​ការ​រិះគន់ថា បំណុល​ចិន​ជា​អន្ទាក់ ដោយ​ពន្យល់ថា ចិន​មិនបាន​ហៅ​កម្ពុជា​ឲ្យ​ខ្ចីលុយ​នោះទេ តែ​​កម្ពុជា​ជា​អ្នកស្នើសុំ ដើម្បី​ជំរុញ​ការអភិវឌ្ឍ​សេដ្ឋកិច្ចជាតិ៕