ម្ចាស់ថ្មីរបស់ ANZ Royal នឹងផ្អាកសេវាកម្មមួយចំនួន រួមទាំងសេវា ATM អំឡុងពេលផ្លាស់ប្ដូរឈ្មោះ

ភ្នំពេញ៖ បន្ទាប់​ក្លាយខ្លួន​ទៅជា​ម្ចាស់​ហ៊ុន​ធំ​ទៅលើ ធនាគារ ANZ Royal សម្រាប់​ប្រទេស​កម្ពុជា ធនាគារ J Trust កាលពី​ថ្ងៃទី ២៥ ខែកក្កដា ម្សិលមិញ​នេះ បានចេញ​សេចក្ដីជូនដំណឹង​ស្ដីពី​ការប្តូរឈ្មោះ​ផលិតផល និង​សេវាកម្ម​ធនាគារ ANZ Royal ទៅជា​ធនាគារ J Trust Royal វិញ ព្រម​ជាមួយនឹង​ការផ្អាក​ដំណើរ​សេវាកម្ម​មួយចំនួន ព្រមទាំង​ទូរ ATM ផងដែរ។

សម្រាប់​ដំណើរ​ផ្លាស់ប្តូរ​កម្មសិទ្ធិ​នេះ កំពុង​ប្រព្រឹត្ត​ទៅដោយ​រលូន ហើយ​ធនាគារ J Trust Royal នឹង​ចាប់ផ្តើម​បម្រើ​សេវាកម្ម ជូន​ទាំង​អតិ​ថ​ជន​សាជីវកម្ម និង​អតិថិជន​បុគ្គល នៅ​ទូទាំងប្រទេស​កម្ពុជា ចាប់ពី​ថ្ងៃ​ចន្ទ ទី១៩ ខែសីហា ឆ្នាំ២០១៩ ខាងមុខនេះ។

ជាមួយគ្នានេះ គណនី​ចាស់​នៅ​ធនាគារ ANZ Royal គី​នៅ​អាច​ប្រើ​ជាធម្មតា ពុំមាន​ការផ្លាស់ប្តូរ​ទៅលើ​លេខ​គណនី​ថ្មី​អ្វី​ទេ។ រីឯ​សៀវភៅ​មូលប្បទានប័ត្រ​នឹងត្រូវ​បាន​ផ្លាស់ប្តូរ តាម​លំដាប់​ពេលវេលា ដែល​សមស្រប ប៉ុន្តែ​ទោះជា​យ៉ាងណា សៀវភៅ​មូល​ប្ប​ទា​នប​ត្រ​ទាំងនោះ នឹង​នៅតែ​អាច​បន្ត​ប្រើប្រាស់​បាន រហូតដល់​រយៈពេល ១២ខែ បន្ទាប់ពី​ការផ្លាស់ប្តូរ។ ដោយឡែក សៀវភៅ​គណនី ដែល​ចេញ​ដោយ​ធនាគារ ANZ Royal ក៏​នៅតែ​ប្រើ​បាន​ធម្មតា​ដែរ។

ធនាគារ នឹង​ផ្អាក​ទទួល​ពាក្យ​បើក​គណនី​ថ្មី រួមទាំង​គណនី​ប្រាក់​បញ្ញើរ​មាន​កាលកំណត់ និង​គណនី ចរន្ត ព្រមទាំង​គណនី​ប្រាក់​បៀរ​វ​ត្យ​រ៍ ចាប់ពី​ថ្ងៃទី ១៤ ខែសីហា ឆ្នាំ ២០១៩ ម៉ោង ៤ ល្ងាច ប៉ុន្តែ​នឹង​បើក​ដំណើរ​ការធម្មតា​នៅ​ថ្ងៃទី ១៩ ខែសីហា ឆ្នាំ ២០១៩ វិញ។

ដោយឡែក ចាប់ពី​ល្ងាច​ថ្ងៃទី ១៣ ខែសីហា គ្រប់​សេវា ATM នឹងត្រូវ​ផ្អាក​ជា​បន្តបន្ទាប់ ហើយ​ត្រូវ​ផ្អាក់​ទាំងអស់​នៅ​ថ្ងៃទី ១៦ ខែសីហា ឆ្នាំ ២០១៩ ពី​ម៉ោង ៤ ល្ងាច។ ក្នុងនោះ សេវា​បញ្ចូល​ទឹកប្រាក់​តាម​ទូរស័ព្ទ នឹង​ផ្អាក ចាប់ពី​ថ្ងៃទី ២ ខែសីហា និង​សេវា​ទូទាត់​វិក​យ​ប័ត្រ​អគ្គិសនី នឹង​ផ្អាក​ចាប់ពី​ថ្ងៃទី ៩ ខែសីហា ឆ្នាំ ២០១៩ ខាង​មុន។

ចំពោះ​កាត​ឥណ​ពន្ធ​វី​សា និង​កាត​ឥណទាន​វិ​សា ក៏ត្រូវ​បាន​ផ្អាក​ដំណើរការ​ផងដែរ ចាប់ពី​ថ្ងៃទី ១៦ ខែសីហា ម៉ោង ៥ ល្ងាច ដោយ​មិនអាច​ប្រតិបត្តិការ​អ្វី​បាន​ទាំងអស់ រហូតដល់​ថ្ងៃទី ១៩ ខែសីហា ឆ្នាំ ២០១៩ ទើប​អាច​ប្រើប្រាស់​ធម្មតា​វិញ។ ជាមួយគ្នានេះ គ្រប់​កាត​ធនាគារ​របស់ ANZ Royal អាច​ប្រើប្រាស់​បានតែ ១២ ខែ​ប៉ុណ្ណោះ បន្ទាប់ពី​ការផ្លាស់ប្ដូរ​ទាំងស្រុង​ត្រូវបាន​ជំនួស ទៅ J Trust Royal។

ក្រៅពីនេះ សេវា​ធនាគារ​តាម​ប្រព័ន្ធ​អ៊ី​ន​ធឺ​ណេ​ត ក៏ត្រូវ​ផ្អាក​ដំណើរការ​ផងដែរ ចាប់ពី​ថ្ងៃទី ១៤ ខែសីហា ឆ្នាំ ២០១៩ ដោយ​នឹង​បើក​ឲ្យ​ដំណើរ​វិញ​នៅ​ថ្ងៃទី ១៩ ខែសីហា ប៉ុន្តែ​តម្រូវ​ឲ្យ​ទៅ Update លេខ​ទូរស័ព្ទ​ថ្មី និង​ទទួល​លេខ​សម្គាល់​ថ្មី ហើយ​សូម្បីតែ​សេវា​ទូទាត់​របស់ ANZ Royal ក៏ត្រូវ​បាន​ផ្អាក​ដែរ៖

  • ការផ្ទេរ​ប្រាក់​ទៅ​ក្រៅប្រទេស ត្រូវ​ផ្អាក​នៅ​ថ្ងៃទី ១៤ សីហា
  • ការផ្ទេរ​ប្រាក់​ក្នុងប្រទេស ត្រូវ​ផ្អាក​នៅ​ថ្ងៃទី ១៥ សីហា
  • ការផ្ទេរ​ប្រាក់​រវាង​គ​ណ​នី ANZ Royal នឹងត្រូវ​ផ្អាក​នៅ​ថ្ងៃទី ១៦ ខែសីហា ម៉ោង ១២ ថ្ងៃត្រង់។

ក្រៅពី​វេ​សា​ខាងលើ នៅមាន​សេវាកម្ម​មួយចំនួនទៀត ក៏​នឹង​ផ្អាក​ផងដែរ៕