ក្រោយសឹក នាយតាត់ស៊ី សល់តែមួយវ៉ាឡី ខណៈប្រពន្ធកូនក៏មិនទទួលយក

ភ្នំពេញ៖  ស្ថានភាព​ជំងឺ លោក​តាក់ ស៊ី កាន់តែ​ទ្រុឌទ្រោម​បន្ទាប់ពី​សឹករួច ហើយដោយពេលនេះលោកនៅ​សល់​​មួយតែសម្លៀកបំពាក់មួយ​វ៉ា​ឡីប៉ុណ្ណោះ គ្មានផ្ទះ គ្មានការងារធ្វើ និងគ្មានចំណូល ហើយ​ប្រពន្ធ​កូន​ក៏​មិន​ព្រម​ទទួលយក​វិញ​ទៀតដែរ។

តាមរយៈ​វីដេអូ Live ជាមួយ​លោក​ហេង ឡុង កាលពី​ប៉ុន្មាន​ថ្ងៃមុន លោក តាក់ ស៊ី បាន​ឲ្យ​ដឹងថា៖ ពេលនេះ លោកគ្មានសល់អ្វីទេ ទាំងផ្ទះ ការងារ និងប្រាក់កាសខ្លះសម្រាប់បន្តដំណើរជីវិត ក្រោយពេលសឹកវិញនេះ។ ក្នុងនោះ រូបលោកក៏មិនអាចត្រលប់ទៅរកប្រពន្ធកូនវិញបានដែរ ព្រោះថាយើងបានបែកផ្លូវការហើយ មុនពេលទៅបួស។

យ៉ាងណា ក្រោយ​ការ Live របស់​លោកតា​ត់ ស៊ី មហាជន​ជាច្រើន​បាន​ចោទ​ជា​សំនួររៀង​អាក់អន​ចិត្តនឹង​អ្នកនាង ភី​ម ខណៈ​មិន​យកចិត្តទុកដាក់ ធ្វើ​ដូច​អ្នកដទៃ។ តបនឹងរឿងនេះ អ្នកនាង ភីម និយាយថា រវាងអ្នកនាង និង នាយតាក់ស៊ីបានលែងលះគ្នាហើយ ដោយបានផ្ដិតមេដៃ ព្រមទាំងមានគ្រួសារ  និងមន្ត្រីអាជ្ញាធរដឹងឮនោះផង។ យ៉ាងណាមិញអ្នកនាងថា ហេតុផលផ្ដិតមេដៃលែងគ្នាមិនមែនជាមូលហេតុ ធ្វើអោយអ្នកនាង ឈប់ទទួលយកនាយតាក់ស៊ីក្រោយពេលសឹកនោះទេ ប៉ុន្តែបញ្ហាសំខាន់គឺលោកមានចំណុចជាច្រើនដែលមិនអាចឲ្យអ្នកនាងទទួលយកវិញតែម្ដង។

អ្នកនាង ភីម​ និយាយថារយៈពេលនៃការរួមរស់ជាមួយគ្នា នាយតាក់ស៊ីធ្វើឲ្យអ្នកនាង និងកូនប្រុសពិបាកផ្លូវចិត្តច្រើនសណ្ឋាន ជាពិសេសក្នុងពេលដែលលោកមានសតិអារម្មណ៍បន្តិចបន្តួច គឺចង់តែរត់ចោលប្រពន្ធកូន ធ្វើឲ្យអ្នកនាងមានអារម្មណ៍ខ្វះភាពកក់ក្ដៅ។ ជាក់ស្ដែង មុនពេលទៅបួសលើកចុងក្រោយ លោកនាយតាក់ស៊ី រត់ចោលផ្ទះសម្បែង ដោយអោយអ្នកនាង និងកូនទៅតាមរក និងអង្វរទម្រាំព្រមត្រលប់មកផ្ទះម្ដងជាពីរដងមកហើយ។  អ្នកនាងថាមានបញ្ហាជាច្រើនទៀត ដែលអ្នកនាងព្រលយថា ពិបាកនិយាយ។

អ្នកនាងបន្ថែមទៀតថា អ្នក​មិនដឹង​រឿង ប្រហែល​គិតថា ខ្ញុំ​មិន​ដាច់ចិត្ត ព្រោះ​គាត់​ឈឺ​ហើយ​បោះបង់​គាត់​ទៀត ប៉ុន្តែ​មុន​ទៅ​បួស ខ្ញុំ​អង្វរ​គាត់ ថា​កុំ​លែង បើ​ចង់ទៅ​បួស ទៅ​តែមួយ​រយៈ​បាន​ហើយ ប៉ុន្តែ​គាត់​មិន​ព្រម គាត់​បោះបង់​ខ្ញុំ និង​កូន ទៅដោយ​មិន​ខ្វល់​អ្វីសោះ។ សម្រាប់​ពេលនេះ ខ្ញុំ​មិនអាច​ទទួល​គាត់​ធ្វើជា​ប្ដី​វិញ​បានទេ បាន​ត្រឹម​រាប់អាន​គ្នា​ធម្មតាប៉ុណ្ណោះ៕