លោកគ្រូបង្រៀនម្នាក់សុខចិត្តអៀវសិស្សនិទ្ទេស A ពីផ្ទះដល់សាលា ព្រោះគោរពតាមសន្យា

ភ្នំពេញ: លោកគ្រូ​ម្នាក់​បង្រៀន​នៅ​វិទ្យាល័យ «ប្រមូល​ព្រហ្ម» ស្ថិតនៅ​ក្នុងស្រុក​ព្រះស្ដេច ខេត្តព្រៃវែង បាន​គោរព​តាម​ការសន្យា​ជាមួយ​សិស្ស​របស់ខ្លួន ក្រោយពី​លោក​បាន​និយាយ​លើក​ចិត្ត​សិស្ស​ឲ្យ​ខំ​ប្រឹងរៀន​ទាំងអស់គ្នា ហើយ​ថា បើ​យកបាន​និទ្ទេស A លោកគ្រូ​នឹង​អៀវ​សិស្ស​គាត់​ពី​ផ្ទះ​ដល់​សាលារៀន។

តាម​គណនី​ហ្វេ​ស​ប៊ុ​ក (Facebook) «ម៉ី៚ម៉ី» បានបង្ហាញ​រូបភាព​ជាច្រើន​សន្លឹក​ស្ដីពី​សកម្មភាព​លោកគ្រូ​ម្នាក់​អៀវ​កូនសិស្ស​របស់ខ្លួន ព្រមទាំង​មាន​មិត្ត​រួម​ថ្នាក់​ដើរ​អម​សើច​សប្បាយ​ពីក្រោយ។ យុវ​សិស្ស​រូបនេះ​បាន​សរសេរ​រៀបរាប់ថា៖«សិស្ស​ទិ​ន្ទេ​ស A ប្រចាំ​ប្រមូល​ព្រហ្ម លូ​យ​មែន បាន​លោកគ្រូ​អៀវ តាម​ការសន្យា​មែន ជួយ​ស៊ែ​ម្នាក់​មួយ​ផង​ឲ្យ​ពិភពលោក​បានឃើញ​បាន​ស្គាល់​ផង ok»។

ជាមួយគ្នានេះដែរ កាលពី​សម័យ​ប្រឡង​ឆ្នាំមុន មាន​សាស្ត្រាចារ្យ​គណិតវិទ្យា​ម្នាក់​ឈ្មោះ ទៀ សុធា បាន​រាំ​ពី​ខ្លោងទ្វារ​ដល់​ដងទង់​ជាតិ ក្រោយពី​លោកគ្រូ​បាន​ជាប់​ពាក្យសំដី​ថា ប្រសិនបើ សិស្ស​របស់ខ្លួន​ប្រឡង​ជាប់​និទ្ទេស A នៅក្នុង​ការប្រឡង​សញ្ញាបត្រ​មធ្យមសិក្សា​ទុតិយភូមិ លោកគ្រូ​នឹង​រាំ​ឲ្យ​មើល។

កាលពី​ឆ្នាំ២០១៧ កន្លងទៅ សាស្ត្រាចារ្យ ទៀ សុធា បានធ្វើ​ឲ្យ​សាធារណជន​ទូទៅ​ភ្ញាក់ផ្អើល ជាពិសេស​សម្ដេច ហ៊ុន សែន បាន​កោតសរសើរ​ចំពោះ​គ្រូបង្រៀន​មុខវិជ្ជា​គណិតវិទ្យា​រូបនេះ ដែល​គោរព​ពាក្យសន្យា​ជាមួយ​សិស្ស ដោយបាន​រាំ​ពី​ពី​ខ្លោងទ្វារ​ដល់​ដងទង់​ជាតិ។

គួ​រំឭកថា ការប្រឡង​សញ្ញាបត្រ​មធ្យមសិក្សា​ទុតិយភូមិ​សម្រាប់​ឆ្នាំ​សិក្សា២០១៨-២០១៩ បានធ្វើ​ឡើង​កាលពី​ថ្ងៃទី១៩-២០ ខែសីហា ឆ្នាំ ២០១៩កន្លងទៅនេះ មាន​បេក្ខជន​បាន​ចុះឈ្មោះ​ប្រឡង​សរុប​ចំនួន ១១៧,០៤៣ នាក់ ស្រី ៦០,៤២៧ នាក់ និង​មាន​មណ្ឌល​ប្រឡង​ចំនួន ២០២ មណ្ឌល។លទ្ធផល​ប្រឡង​សញ្ញាបត្រ​បាក់​ឌុប ឆ្នាំ ២០១៩ ជាប់​សរុប ៦៨.៦២ភាគរយ ស្មើរ​នឹង ៧៩,០៥២នាក់៕