កូន​ស្រី​តារា​ចម្រៀង ឆាយ វីរៈយុទ្ធ ត្រូវ​បាន​អ្នក​គាំទ្រ​សរសើរ​មិន​ដាច់​ពី​មាត់​ថា​ស្អាត និង​មាន​ឈ្មោះ​ពីរោះ​ ដូច​ទេវតា​

ក្រោយ​ពី​រៀប​អាពាហ៍ពិពាហ៍​បាន​ជាង ២ ឆ្នាំ​ កំពូល​តារា​ចម្រៀង​ប្រចាំ​ផលិតកម្ម​សាន់​ដេ លោក ឆាយ វីរៈយុទ្ធ ទើប​នឹង​ទទួល​បាន​កូន​ស្រី​ដែល​ជា​កូន​លើក​ដំបូង​ ជាមួយ​នឹង​ភរិយា​ ​អ្នក​នាង​សែន ចាន់ឌី។ កូន​ស្រី​សំណព្វចិត្ត​របស់តារា​ចម្រៀង​ដែល​មាន​ឈ្មោះ​ដើម​ថា​ឆាយ ចាន់​ឆោម ត្រូវ​បាន​លោក​ដាក់​​ឈ្មោះ​ថា វីរៈយុទ្ធ អភិ​ជា​តា​ទេវី ហៅ​អា​តា​រ៉ា កើត​ថ្ងៃ​អាទិត្យ ២រោច ខែភទ្របទ ឆ្នាំ កុរ ឯកស័ក ព.ស ២៥៦៣ ត្រូវ​នឹង​ថ្ងៃទី ១៥ ខែ​កញ្ញា ឆ្នាំ២០១៩ វេលា​ម៉ោង ៨.២៧ នាទី​ព្រឹក  និង​មាន​ទំងន់ ៣ គីឡូក្រាម។

អ្វី​ដែល​គួរ​ឲ្យ​ភ្ញាក់ផ្អើល​ទៀត​នោះ​គឺ​ថា ទារិការ វីរៈ​យុទ្ធ អភិជាតាទេវី ទើប​តែ​មាន​អាយុ​ត្រឹមតែ ៥ថ្ងៃក្តី តែ​បែ​ជា​មាន​គណនីហ្វេសបុក​ថែម​ទៀត​ផង​។ ប៉ុន្តែ​មហាជន​បាន​សន្និដ្ឋាន​ថា នោះ​គ្រាន់​តែ​ជា​គណនី​ហ្វេស​ប៊ុក​របស់​លោក​ឆាយ វីរៈយុទ្ធ​ ប៉ុណ្ណោះ ប្រហែល​ជា​លោក​ប្តូរ​ឈ្មោះ​ទុក​សម្រាប់​កូន​ជា​ទី​សំឡាញ់​របស់​លោក​ពេល​ចេញ​មក​កាន់​ពន្លឺ​ថ្ងៃ​។

ទោះ​ជា​យ៉ាង​ណា​ក្តី ចំណង​ដៃ​កូន​ដំបូង​នេះ​លោក​ ឆាយ វីរៈយុទ្ធ និង​ភរិយា បាន​ទទួល​នូវ​ការ​អបអរសាទរ​ពី​សំណាក់​មិត្តភ័ក្ដិ ​សាច់ញាតិ មិត្ត​រួម​អាជីព​ការងារ​សិល្បៈ និង​ហ្វេន​អ្នក​គាំទ្រ​ជា​ច្រើន ដោយ​ជូនពរ​ឲ្យ​លោក ភរិយា និង​កូន​ឲ្យ​ជួប​តែ​សុខ​សុវត្ថិភាព​ល្អ និងបន្ថែម​ថា​មាន​មុខ​មាត់​ស្អាត​ខ្លាំង ថែមទាំងមានឈ្មោះដូចទេវតា ​ផង​ដែរ​។ សារ​អបអរសាទរ​ទាំង​នេះ​បាន​នាំ​ឲ្យ​ លោក​ ឆាយ វីរៈយុទ្ធ ក៏​ធ្វើ​ការ​ថ្លែង​អំណរគុណ​តប​ទៅ​វិញ តាមរយៈ Status ដែល​បង្ហោះ​នៅ​លើ​ហ្វេសបុក​ផេក​ផ្លូវការ​របស់​លោក​ផង​ដែរ​៕ អត្ថបទដោយ៖ Vincent