កញ្ញា​ ហ៊ិន ចាន់​នី​រ័ត្ន​ មាន​សម្រស់​ស្អាត ឆ្លាត ថែម​ទាំង​ជោគជ័យ​ក្នុង​​អាជីព​ការងារ​ និងជំនួញ

មហា​ជន​ដែល​ចូលចិត្ត​តែ​តាម​ដាន​ព័ត៌មាន​បែប​កម្សាន្ត​ ​ច្បាស់​ជា​ស្គាល់​ កញ្ញា​ ហ៊ិន ចាន់និរ័ត្ន ដែល​ជា​ពិធីការ​នី មួយ​រូប​​មាន​សម្រស់​ស្រស់​ស្អាត​ពី​ធម្មជាតិ​ ថែម​ទាំង​​ពូកែ​ខាង​សាសព្ទ​ មិន​ចេះ​រីង​ស្ងួត ជា​ពិសេស​ មាន​អត្តចរិត​លក្ខណៈ​បែប​សុភាព​ សាក​សម​ជា​នារី​ខ្មែរ។

សូម​រំលឹក​ថា​ ពិធីការ​នី​ប្រចាំ​ស្ថានីយ​ទូរទស្សន៍​ បា​យ័ន្ត ​រូប​នេះ​ គឺ​ជា​អតីត​ជ័យ​លាភី​កញ្ញា​ឯក​លេខ១ Freshy Girl ឆ្នាំ ២០០៧។ មិន​ត្រឹម​តែ​ជា​ពិធីការ​នី​តែ​មួយ​មុខ​នោះ​ទេ នាង​ក៏​ជា​តារា​សម្ដែង​ទាំង​ខ្សែភាពយន្ត​ភាគ​ និង​ខ្សែភាពយន្ត​ខ្នាត​ធំ​សម្តែង​ជា​តួ​ឯក​ស្រី​​ រឿង ​“ធ្មប់”​ផង​ដែរ​ កាលពីឆ្នាំ២០១៨។

មិន​ត្រឹមតែ​ប៉ុណ្ណឹង​នោះ​ទេ​ នាង​ក៏​ជា​តារា​ថត​ ​​សម្អាងការ​ តាម​រយៈ​មូ៉ត​សម្លៀក​បំពាក់​មង្គលការ​ទាំង​បែប​បុរាណ​ និង​សម័យ​ យ៉ាង​ស្រស់​ស្អាត​ ស្ទើរ​មិន​រំលង​សម្អាង​ការដែល​មានឈ្មោះល្បីៗក្នុងប្រទេសកម្ពុជាឡើយ​។ យ៉ាង​ណា​មិញ​មួយ​រយៈពេល​ចុង​ក្រោយ​នេះ​ រូប​នាង​មិន​ត្រឹមតែ​ជា​ ​ពិធីការ​នី តារា​សម្តែង​ តារា​សម្អាង​ការ នោះ​ទេ គឺ​បាន​ក្លាយ​ជា​ម្ចាស់​ជំនួញ​មាន​សម្រស់​ស្អាត ​នៃ​ហាង​ថែរក្សា​សម្រស់​ មាន​ឈ្មោះ​ថា “U.ME Cosmetic” ថែម​ទៀត​ផង។​

សរុប​ជា​រួម កញ្ញា​ ហ៊ិន ចាន់​នី​រ័ត្ន​ ​ទទួល​នូវ​ភាព​ជោគជ័យ ទាំង​ពិធីការ​នី ​វិស័យ​សិល្បៈ​ និង​បាន​ក្លាយ​ជា​អ្នក​ជំនួញ​ផ្ទាល់​ខ្លួន​។ ទាំង​នេះ​ បាន​ធ្វើ​ឲ្យ​មហាជន​ជា​ច្រើន ក្នុង​ប្រទេស​កម្ពុជា​ស្ងើច​សរសើរ​ជា​ខ្លាំង​ចំពោះ​សមត្ថភាព​របស់​នាង​ ដែល​ជា​សមិទ្ធផល​ដ៏​ជោគជ័យ​ដែល​មនុស្ស​គ្រប់គ្នា​ពិបាក​នឹង​ធ្វើ​បាន​៕