គួរ​ឲ្យ​អាសូរ​ខ្លាំង​ណាស់!​ តារា​សម្តែង​វ័យ​ចំណាស់​ លោក​យាយ​ ផល្លា កំពុង​ជួប​ការ​ខ្វះខាត​ទី​ទាល់​ដល់​ថ្នាក់​ចង់​លោត​សម្លាប់​ខ្លួន ព្រោះ​គ្មាន​ប្រាក់​សម្រាប់​ជួល​ផ្ទះ (វីដេអូ)

លោក​អ្នក​ពិត​ជា​បាន​ស្គាល់​ជាក់​ជា​មិន​ខាន​នូវ តារា​សម្ដែង​វ័យ​ចំណាស់​មាឌ​ល្អិត ពោរពេញ​ដោយ​វ៉ោ​ហា លោក​យាយ ​ផល្លា ដែល​ជា​រឿយ​ៗ​ លោក​យាយ​តែងតែ​មាន​វត្ត​មាន​នៅ​ក្នុង​ការ​សម្តែង​ខ្សែភាពយន្ត​ វីដេអូ​កំប្លែង និង​វីដេអូ​ខ្លី​ៗ​បែប​អប់រំ​ជាដើម។

ប៉ុន្តែ​ស្រាប់​តែ​ថ្មី​ៗ​នេះ វត្ត​មាន​របស់​លោក​យាយ បាន​លេច​ឡើង​តាម​រយៈ​វីដេអូ​របស់​កម្មវិធី ជីវិត​តារា​កម្ពុជា របស់​លោក អឹម ​ជីវ៉ា ព្រម​ជាមួយ​ទឹកភ្នែក​រលីងរលោង​ ត្បិតអី​ជីវិត​របស់  តារា​សម្តែង​វ័យ​ចំណាស់​រូប​នេះ កំពុង​ជួប​បញ្ហា​ទី​ទាល់​បំផុត ដាច់​លោក​យាយ​ចិត្ត​កាត់​ខ្មាស់​ មក​សុំ​ជំនួយ​ពី​កម្មវិធី​របស់​លោក​ អ៊ឹម ជីវ៉ា ព្រោះ​ថា​លោក​យាយ​ពុំ​មាន​ថវិកា ក្នុង​ការ​បង់ថ្លៃ​ផ្ទះ​អស់​រយៈពេល​ជាង ៣​ខែ​ មក​ហើយ ខណៈ​ម្ចាស់​ផ្ទះ​បាន​ចាក់​សោ​មិន​ឲ្យ​លោក​យាយ​ចូល​ផ្ទះ​ឡើយ។

បើ​តាម​សារ​បង្ហោះ ព្រម​ជាមួយ​រូបថត​មួយ​ចំនួន​ នៅ​លើ​គណនី​ហ្វេសបុក​ របស់​លោក​ អ៊ឹម ជីវ៉ា​ បាន​សរសេរ​រៀប​ថា​ “ សូម​ជួយ​ស៊ែរ​ផងអាណិត​តារា​សម្ដែង​អ្នក​មីង​ផល្លា​ណាស់​ ត្រូវ​ម្ចាស់​ផ្ទះ​ចាក់​សោ​មិន​អោយ​ចូល​ដោយ​សារ​អត់​បង់ថ្លៃ​ផ្ទះ​អោយ​គេ ប៊ិះ​​និង​លោត​ទឹក​សម្លាប់​ខ្លួន​។!  អ្នក​មីង​ ផល្លា​គឺ​ជា​តារា​សម្ដែង​ជើងចាស់ ដែល​ទទួល​បាន​ការ​គាំទ្រ​ពី​ទស្សនិកជន​ ដោយ​អ្នក​ស្រី​ តែង​តែ​ថត​ខ្សែភាពយន្ត​ជា​ច្រើន​រឿង​រាប់​មិន​អស់ ដោយ​ដើរតួ​ជា​ម្តាយ​ មេដោះ អ្នក​បំរើ យាយ អក។ល។ អ្នក​មីង​ផល្លា​ តែងតែ​ដើរ​ថតកុន​ជួយ​គេ​បាន​មួយ​ថ្ងៃ​រស់​មួយ​ថ្ងៃ ពេល​ខ្លះ​មាន​ផលិតកម្ម​ខ្លះ​មិន​បើក​អោយ​អ្នក​មង​ផង តែ​មីង​ផល្លារ​មិន​ហ៊ាន​ទា​ទេ​ខ្លាច​គេ​លែង​ហៅ​ថត​ សុខ​ចិត្ត​ដើរ​ខ្ចី​ និង​សុំ​ពី​មិត្ត​សិល្បៈ​ពេល​ទៅ​ថត​ម្តង​ៗ ។ អ្នក​មីង​ផល្លា​ រាល់​ថ្ងៃ​ជួល​បន្ទប់​គេ​នៅ​ជាមួយ​កូន​នៅ​ម្តុំ​ផ្សារ​កណ្តាល​ជាន់​ទី​៣ ដោយ​អ្នក​ស្រី​មាន​ជីវភាព​ក្រីក្រ​ខ្វះខាត​ និង​មាន​ជំងឺ រហូត​កាល​ពី​ម្សិលមិញ​អ្នក​ស្រី​មក​ដល់​ផ្ទះ​ខ្ញុំ​បាទ​ ហើយ​ស្រែក​យំ​រៀបរាប់​ទាំង​ទឹកភ្នែក​ ដោយ​អោយ​ជួយ​ផ្សព្វផ្សាយ​ និង​ជួយ​ដល់​គាត់​ផង ។  ក្នុង​ឱកាស​នោះ​ដែរ​ ក៏​មាន​ការ​ឧបត្ថម្ភ​ពី​សំណាក់ លោក​ឧកញ៉ា អ៊ូ ឆាយ និង​លោកជំទាវ សុខ វាសនា ព្រម​ទាំង​ក្រុម​គ្រួសារ ចំនួន២០០$ ផង​ដែរ ។ អ្នក​ស្រី​ផល្លា​បាន​ថ្លែង​អំណរគុណ​ដល់​លោក​ឧកញ៉ា​និង​លោក​ជំទាវ​ទាំង​ទឹកភ្នែក​ដែល​បាន​ជួយ​អ្នក​ស្រី​នៅ​ពេល​អ្នក​ស្រី​ប៊ិះ​និង​ផុត​ដង្ហើម​ ។ ដោយ​ក្តី​គោរព​:​​​ អឹម ​ជីវ៉ា

បើ​ក្រឡេក​ទៅ​មើល​ សារ​ Comment ឆ្លើយ​តប​វិញ ​ក៏​មាន​មិត្ត​អ្នក​គាំទ្រ​ ព្រម​ទាំង​មហាជន​នានា​ មាន​សេចក្ដី​អាណិត​អាសូរ​ លោក​យាយ ​ផល្លា​ជា​ខ្លាំង​។ ត្បិតអី លោក​យាយ​មាន​វ័យ​កាន់​តែ​ចាស់​ ហើយ​មាន​ជម្ងឺ​ជាប់​ប្រចាំ​កាយ​ទៀត​ តែ​លោក​យាយ​នៅ​តែ​លះបង់​កម្លាំង​ចិត្ត កម្លាំង​កាយ​នៅ​ក្នុង​អាជីព​សិល្បៈ​ ដើម្បី​បម្រើ​ចំណី​ចក្ខុ​របស់​ទស្សនិកជន​ សម្រាប់​ប្រជាជាតិ​ខ្មែរ​ ព្រោះ​ថា​នេះ​ជា​ក្តី​ស្រលាញ់​របស់​លោក​យាយ​ពិត​ៗ​។

អត្ថបទដោយ៖ Vincent