អបអរ​សាទរ​អ្នក​នាង​ គីម លីហ្សា សម្រាល​បុត្រ​ទី​២ ដោយ​សុវត្ថិភាព​

កន្លង​មក​ អ្នក​នាង​ គីម លីហ្សា បាន​លា​ឈប់​ពី​វិស័យ​ សិល្បៈ​ដោយ​ស្រវា​ឧប​សុភមង្គល​ជា​មួយ​គ្រួសារ​ នៅ​ឯ​ប្រទេស​អូស្ត្រាលី​ ជាមួយ​នឹង​ស្វាមី​សំណព្វ​ចិត្ត​ រួម​នឹង​ចំណង​ដៃ​កូន​ប្រុស​មួយ​រូប​។ ហើយ​ជា​យូរ​ៗ​ម្ដង​ អ្នក​នាង​តែងតែ​បង្ហាញ​វត្ត​មាន​ ជា​តារា​កិត្តិយស​ នៅ​ក្នុង​កម្មវិធី​នានា តាម​រយៈ​កញ្ចក់​ទូរទស្សន៍​ផង​ដែរ​។


 
អតីត​តារា​ចម្រៀង​ នៅ​ផលិតកម្ម ​U2 ​រូប​នេះ​ ទើប​នឹង​សម្រាល​បាន​កូន​ប្រុស​ពៅ​ម្នាក់​ទៀត​កាល​ពី​ថ្ងៃ​ពេល​ថ្មី​នេះ​ នៅ​ឯ​ប្រទេស​អូស្ត្រាលី ​នេះ​បើ​តាម​គណនេយ្យ ​ហ្វេស​បុក​របស់​អ្នក​នាង​ផ្ទាល់​ “ Kim Liza”​។ ដោយ​អ្នក​នាង​បាន​បង្ហោះ​សារ​ជា​អក្សរ​ អម​ដោយ​រូបភាព​ថា “សូម​ស្វាគមន៍​កូន​ប្រុស​ពៅ​សម្លាញ់​មក​កាន់​ពិភពលោក​ដ៏​ស្រស់​ស្អាត​មួយ​នេះ​ សូម​អោយ​កូន​សុខភាព​ល្អ​ណា​”​។ ឆ្លើយ​តប​ទៅ​នឹង​ដំណឹង​ល្អ​ខាង​លើ​ ក៏​មាន​ការ​ជូនពរ​ និង​ត្រេក​អរ​ជា​ច្រើន​ ពី​ក្រុម​គ្រួសារ​របស់​អ្នក​នាង​ ព្រម​ទាំង​មិត្តភ័ក្ដិ​ រួម​ទាំង​ហ្វេន​ជា​អ្នក​គាំទ្រ​ផង​ដែរ​។


 
សូម​រំលឹក​ដែល​ថា​អ្នក​នាង​ គីម លីហ្សា បាន​ចាកចេញ​ពី​មាតុភូមិ​កម្ពុជា​ នៅ​ឆ្នាំ​២០១៣ ​ក្រោយ​ពី​បាន​រៀប​មង្គលការ​ជាមួយ​ស្វាមី​ជា​អនិកជន​ ហើយ​ទៅ​រស់​នៅ​ប្រទេស​អូស្ត្រាលី​។ ​ពី​ដំបូង​ឡើយ អ្នកនាងគីម លីហ្សា គឺ​ជា​តារា​ចម្រៀង​ នៅ​ក្នុង​ផលិតកម្ម​ U2​ តែ​ក្រោយ​មក​អ្នក​នាង ​បាន​ផ្លាស់ប្ដូរ​អាជីព​ ក្លាយ​ជា​តារា​សម្ដែង​វិញ ដែល​នេះ​មិនមែន​មាន​ថា អ្នក​នាង​ មាន​សំនៀង​មិន​ពីរោះ​នោះ​ទេ ប៉ុន្តែ​ដោយ​សារ​តែ​រូប​សម្រស់​ ដ៏​ស្រស់​សោភា​ បែប​កូន​កាត់​ចិន​ និង​ភាព​ប៉ិនប្រសព្វ​ក្នុង​ការ​សម្ដែង ​បាន​ធ្វើ​ឲ្យ​អ្នក​នាង​ មាន​ហុងស៊ុយ​ក្នុង​ការ​សម្ដែង​ជាង​។ តួយ៉ាង​ដូចជា​ ការ​សម្ដែង​ក្នុង​ខ្សែ​ចម្រៀង ​“ដើម្បី​ស្នេហ៍“ អ្នក​នាង​បាន​សម្ដែង​ជា​ តួរកាច និង​វិកលចរិត​ បាន​សម​ឥត​ខ្ចោះ​៕

អត្ថបទដោយ៖ Vincent