កវីនិពន្ធបទចម្រៀង កំពង់ធំជំរុំចិត្ត លោក ម៉ម ប៊ុតណារាយ បានទទួលមរណភាព ក្នុងវ័យ៨៥ឆ្នាំ នៅម៉ោង៩ព្រឹក ថ្ងៃទី៣ ខែកញ្ញា ។ នេះបើតាម ការបញ្ជាក់ពីលោក ម៉ម ប៊ុនណារា ត្រូវជាកូនប្រុសបង្កើតរបស់លោក ម៉ម ប៊ុតណារាយ នៅលើទំព័រហ្វេសប៊ុករបស់លោក នាព្រឹកថ្ងៃដដែល ។
គួរបញ្ជាក់ដែរថា ដោយពិធីបុណ្យសពលោក ម៉ម ប៊ុតណារាយ ត្រូវរៀបចំតម្កល់ ធ្វើបុណ្យនៅព្រះវិហារកាតូលិកផ្សារតូច ផ្លូវជាតិលេខ៥ ក្បែរសាលាប៊ែលធី។ គួររំលឹកផងដែលថា លោក ម៉ម ប៊ុតណារាយ ត្រូវបានគេស្គាល់ថាជាអ្នកសម្រួលតន្ត្រីឲ្យអធិរាជសំឡេងមាស លោក ស៊ិន ស៊ីសាមុត និង សរសេរបទចំរៀងដ៏ល្បីមួយរូប ដោយមានបទចម្រៀងល្បីៗដូចជា កម្មប្រចាំកាយ, មេត្តារៀមផង, កំពង់ធំជំរំចិត្ត, ស្ទឹងកែវ, បិសាចក្រមុំ និង ជើងមេឃពណ៌ខ្មៅ ជាដើម៕
