សូម​ប្រុង​ប្រយ័ត្ន​! ករុណា ពេជ្រ ត្រូវ​ជន​មិន​ស្គាល់​មុខ​គ្នា​៥​នាក់​ស្ទាក់​រថយន្ត​ប៉ង​ប្លន់​តែ​មិន​បាន​សម្រេច​ក៏​គប់​កញ្ចក់​រថយន្ត​

ភ្នំពេញ៖តារា​ចម្រៀង​និង​ជា​អ្នកគ្រប់គ្រង​ទូទៅ​របស់​ផលិតកម្ម​ថោន​ លោក ករុណា ពេជ្រ កាល​ពី​យប់មិញ​បាន​ជួប​រឿង​ស៊យ​រហូត​ធ្វើ​ឲ្យ​លោក​ភ័យ​ស្ទើរ​ព្រលឹង​រត់​បាត់​ពី​ខ្លួន​ខណៈ​ដែល​កំពុង​បើក​រថយន្ត​តាម​ផ្លូវ​ទាំង​កណ្ដាល​អាធ្រាត្រ​ហើយ​ស្ងាត់ផងនោះ​ក៏​ស្រាប់​តែមានជន​មិន​ស្គាល់​មុខគ្នា​ ៥ឬ៦នាក់​បានឈរស្ទាក់ឲ្យឈប់រថយន្តក្នុងគោលបំណងប្លន់យកទ្រព្យសម្បត្តិ។

លោក ករុណា ពេជ្រ បាន​បញ្ជាក់​ឲ្យ​ដឹងថា​គ្រា​ដែល​លោក​កំពុងបើករថយន្ត​ហើយ​ដល់​កន្លែងស្ងាត់​នោះ​ស្រាប់តែមានមនុស្ស៥នាក់បានឈរស្ទាក់​នៅមុខរថយន្តឲ្យលោកឈប់​ប៉ុន្តែដោយសារ​បារម្ភ​ពីសុវត្ថិភាពនោះខ្លួនក៏បានបើករថយន្តគេទើបធ្វើឲ្យពួកគេបានយកដុំថ្មគប់លើកញ្ចក់រថយន្តបណ្តាលឲ្យខូចខាតផ្នែកខាងក្រោយ។ដោយសារជួបហេតុការណ៍បែបនេះទើបលោក ករុណា ពេជ្រ បាន​ថ្លែង​សារអំពាវនាវឲ្យមហាជនមានការប្រុងប្រ័ត្នខ្ពស់លើករណីនេះ។

តារា​ប្រុស​លោក ករុណា ពេជ្រ សរសេររៀបភា្ជប់ជាមួយរថយន្តដែលរងការខូចខាតនោះ​ថា​ថ្ងៃនេះ​ខ្ញុំសូម​ចែករំលែកព័ត៌មាន ដែលជនឆ្លៀតឱ កាសគប់កញ្ចក់ឡានរបស់ខ្លួន ដើម្បីធ្វើសកម្មភាពនានា ពេលដែលមកដល់កន្លែងស្ងាត់ពេលយប់…។ ដូច្នេះពេលយប់ស្ងាត់សូមបងប្អូនប្រុងប្រយ័ត្ន អោយ​បានល្អ ព្រោះគ្រប់កាលះទេសះគ្រប់ទីកន្លែង និង គ្រប់​បណ្ដា​ប្រទេស​ទាំងអស់​លើពិភពលោកតែងតែ​មាន​ជនមួយចំនួនតូចតែងតែឆ្លៀតឱកា ពេលដែលយើងគ្រប់គ្នាខ្វះការប្រុងប្រយ័ត្ន និងនឹក​ស្មាន​មិន​ដល់…។

លោក ករុណា ពេជ្រ បន្តទៀតថានេះពិតជាសំណាងធំរបស់លោកហើយ ដែល​ជន​ឆ្លៀត​ឱកាស​មាន​គ្នា៥នាក់ ស្ទាក់ឡានលោកអោយឈប់ដល់លោក​អត់ឈប់ពួកគេក៏គប់​ឡាន​លោក​តែម្តង​ប៉ុន្តែលោក​មិន​ឈប់នៅតែបន្តបើកទៅមុខរហូត។ ហើយ​ក៏សំណាងដែលគប់មិនចំកន្លែងលោកបើក ហើយ​ត្រូវតែ​កញ្ចក់​ចំហៀង​ខាងក្រោយតៃកុងប្រសិនចំតួឡានវិញគឺរឹតតែចប់ហ្មង សរុបមក​ចុងក្រោយ​ដូរ​កញ្ចក់​អស់ ១០០ដុល្លារប៉ុន្តែព្រលឹងហោះទៅស៊ីព្រលិតបាត់ហើយ។

បន្ថែម​ពីលើនេះលោក ករុណា ពេជ្រ លើកឡើងដែរថាសារជាថ្មីពេលយប់សូមកុំជិះផ្លូវស្ងាត់ ហើយ​មាន​ហេតុការណ៍អ្វីកុំឈប់កន្លែងស្ងាត់អោយសោះ ហើយសូមប្រុងប្រយ័ត្នគ្រប់ពេលវេលា ព្រោះ​ជន​ឆ្លៀត​ឱកាស​មួយចំនួនតូច អាចឆ្លៀតធ្វើមកលើយើងបាន ពេលដែលយើងភ្លេចខ្លួនតែប៉ុណ្ណោះ។ ជុំវិញ​ករណី​នេះគេហទំព័រ Plus News នៅរសៀលថ្ងៃទី១៤ ខែវិច្ឆិកា នេះ​មិនទាន់អាច​ទំនាក់ទំនង​សួរនាំ​បន្ថែម​ពីលោក ករុណា បាននៅឡើយទេ។

ដោយ​ឡែកស្របពេលដែលលោក ករុណា ពេជ្រ បង្ហោះសារនេះដែរភ្លាមៗនោះអ្នកនាង ចន ច័ន្ទ​លក្ខិណា ក៏​បានថ្លែងសារអំពាវនាវដែរថាមួយរយៈនេះសំបូរករណីនេះណាស់ អាជ្ញារធរតាម​តំបន់​គួរ​ពង្រឹង​សន្តិសុខជូនប្រជាពលរដ្ឋអោយបានច្រើនផង ។ បើឃើញព័ត៌មាន មានករណីកើតឡើងនៅ​តំបន់​ណាអាជ្ញាធរតំបន់នោះគួរពង្រឹងនិងចុះសើបអង្កេតតំបន់នោះផង៕