តារាសម្តែង ឆឹម សក្កដា ដែលកំពុងតែមានប្រជាប្រិយភាព តាមរយៈការលេចមុខជារឿយៗក្នុងខ្សែភាពយន្តខ្មែរ និងជាពិសេសកំពុងចេញមុខជាតួអង្គដ៏សំខាន់នៅក្នុងរឿងភាគកំពុងល្បី «កូនពស់កេងកង» របស់ទូរទស្សន៍ហង្សមាស។ ឆឹម សក្កដា រងពាក្យនិន្ទាជាច្រើនថា បានបង្កាត់ភ្លើងក្លែងក្លាយជាមួយអ្នកមេម៉ាយស្តុក ពេជ្រ សោភា ដើម្បីតោងកាលីព តែតារានិយមច្រៀងបទពាក់ព័ន្ធសត្វឆ្កែ សោភា ធ្លាប់បានច្រានចោលដំណឹងនោះ ពីរបីដងហើយ ខណៈនាងថា «យើងមិនបានជួបគ្នា ព្រោះតែរវល់ការងាររៀងៗខ្លួន មិនមែនបែកគ្នា ឬ បង្កើតស្នេហ៍ក្លែងក្លាយទេ»។
ដើម្បីបញ្ជាក់បន្ថែមរឿងទំនាក់ទំនងស្នេហ៍ស្ថិតថេររួមតារាហង្សមាស ពេជ្រ សោភា, លោក ឆឹម សក្កដា ក៏ប្រឹងរំលេចទិដ្ឋភាពផ្អែមល្ហែមលើបណ្តាញសង្គម ខណៈដែលម្សិលមិញលោកបានបង្ហោះរូបនាង សោភា អង្គុយកៀកកើយពីក្រោយ បង្ហាញស្នាមញញឹមប្រកបដោយភាពជឿជាក់ថា គ្មានរឿងអ្វីកើតឡើងដូចពាក្យចរចាមអារាមនោះឡើយ៕
