តារាសម្ដែងឯកប្រុស Jame Jirayu បង្ហើបមានមនុស្សស្រីចូលក្នុងបេះដូងហើយ

តាំងពីតារាឯកប្រុសថៃរូបសង្ហា Jame Jirayu ចូលប្រឡូកក្នុពិភពសិល្បៈភាពយន្ដគេមិនដែលបានឃើញតារាប្រុសរូបនេះ បង្ហើបពីដំណឹងស្នេហាសូម្បីម្ដង។ បែបនេះហើយ ទើបធ្វើឱ្យហ្វេនជាច្រើនមានការសង្ស័យថា តើ Jame Jirayu កំពុងតែមានគូស្នេហ៍ហើយមែនទេ?  យ៉ាងណាមិញ តារាប្រុសវ័យក្មេងរូបនេះ បានបកស្រាយប្រាប់អ្នកគាំទ្រខ្លួន ក្នុងថ្ងៃចូលរួមសម្ពោធរបស់ក្រុមហ៊ុនមួយ។

ពាក់ព័ន្ធជាមួយរឿងរ៉ាវស្នេហា លោក Jame Jirayu បានអះអាងថា «ការពិតទៅ សព្វថ្ងៃនេះ មានឆាតជាមួយស្រីៗខ្លះដែរ ក៏ប៉ុន្ដែ គ្រាន់តែនិយាយគ្នាបែបធម្មតាទៅវិញទៅមក។ ចំពោះលក្ខណៈបែបស្នេហា នៅមិនទាន់មានឆាតជាមួយសង្សារនៅឡើយទេ»។ លោកបានបន្ដថា​«មិនមែនដោយសារខ្ញុំជាតារាល្បីឈ្មោះ ទើបប្រាប់រឿង រ៉ាវស្នេហាខ្លួនមិនបាននោះទេ តែការពិតទៅ ខ្ញុំក៏អាចនិយាយ និងបង្ហាញដូចបងៗអ្នកសារព័ត៌មានដូចគ្នាដែរ។ គ្រប់គ្នាកើតមកសុទ្ធតែមានសេចក្ដីស្រឡាញ់ និងសេចក្ដីស្នេហា គ្រាន់តែថា នៅរកអ្នកច្បាស់លាស់មិនទាន់បាន»។

សូមជម្រាបផងដែរថា លោក Jame Jirayu ធ្លាប់បានបង្ហាញវត្តមានក្នុងប្រទេសកម្ពុជាជាច្រើនលើកណាស់មកហើយ ធ្វើឱ្យហ្វេនៗគ្រប់រំជើបរំជួលក្នុងអារម្មណ៍ ទៅស្វាគមន៍វត្តមានរបស់លោក តាំងពីព្រលានយន្ដអន្ដរជាតិភ្នំពេញ រហូតដល់ឆាកសម្ដែងតែម្ដង៕