តាមរយៈការចេញផ្សាយរបស់សារព័ត៌មានក្នុងស្រុកមួយបានឱ្យដឹងថា មានការបើកប្រតិបត្តការបង្ក្រាបដ៏ក្តៅគគុក លើករណីជួញដូរនិងរក្សាទុកគ្រឿងញៀនមួយ បានឃាត់ខ្លួនជនសង្ស័យប្រុស-ស្រីចំនួន4នាក់ កាលពីវេលាម៉ោង2 និង20ចូលថ្ងៃទី19 ខែធ្នូ ម្សិលមិញនេះ ស្ថិតនៅមជ្ឈមណ្ឌលកម្សាន្តរ៉ុក ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ដោយកម្លាំងសមត្ថកិច្ចនគរបាលការិយាល័ទី6នៃមន្ទីរប្រឆាំងគ្រឿងញៀន ។ អ្វីដែលភ្ញាក់ផ្អើលបំផុត គឺជនសង្ស័យម្នាក់ក្នុងចំណោម4នាក់នេះ គឺជាពិធីករទូរទស្សន៍ល្បីម្នាក់ និងដកហូតបានថ្នាំញៀនបានជាង1គីឡូក្រាម ។
សេចក្តីរាយការណ៍បន្តថា ជនសង្ស័យទាំង៤នាក់ ១-ឈ្មោះ ហែម បូរិទ្ធ ភេទប្រុស អាយុ៣៣ឆ្នាំ ជាពិធីករទូរទស្សន៍ (ឌីជេឡាយអិន) ស្នាក់នៅផ្ទះលេខ៦៣ ផ្លូវសុធារស សង្កាត់ទន្លេបាសាក់ ខណ្ឌចំការមន ។ ២-ឈ្មោះ វ៉ា ស្រីណា ភេទស្រី អាយុ៣៨ឆ្នាំ មុខរបរមិនពិតប្រាកដ ស្នាក់នៅផ្ទះជួល ក្នុងសង្កាត់បឹងត្របែក ខណ្ឌចំការមន ។ ៣-ឈ្មោះ អុិន សាខន ភេទប្រុស អាយុ៥១ឆ្នាំ ស្នាក់ផ្ទះជួលលេខ៦A ផ្លូវលំ សង្កាត់ស្ទឹងមានជ័យ ខណ្ឌមានជ័យ (មេក្លោង) និង៤-ឈ្មោះស៊ិន សំភ័ស្ត ភេទប្រុស អាយុ៣៣ឆ្នាំ មានអាសយដ្ឋានស្នាក់នៅភូមិ៤ សង្កាត់បឹងស្រឡាង ខណ្ឌទួលគោក រាជធានីភ្នំពេញ (ឈ្មោះនេះទើបចេញពីពន្ធនាគារ ពាក់ពន្ធករណីជួញដូរគ្រឿងញៀន) និងត្រូវជាក្មួយនាយករងមន្ទីរគ្រឿងញៀនម្នាក់ ហើយក៏ជាម្ចាស់អាវុធខ្លី១ដើមនោះផង ។
ប្រភពបន្តថា ជាមួយការឃាត់ខ្លួនជនសង្ស័យទាំង4នាក់ សមត្ថកិច្ចដកហូតវត្ថុតាងនៅ ក្នុងបន្ទប់108 ក្នុងមជ្ឍមណ្ឌលកម្សាន្តរ៉ុក រួមមាន 1-ថ្នាំមេតំហ្វេតាមីន(ICE)ទម្ងន់374.39ក្រាម
2-សារធាតុញៀនប្រភេទអ៊ិចស្តាស៊ីចំនួន1562គ្រាប់ ស្មើទម្ងន់ និង609.33ក្រាម (សរុបជាង1គីឡូក្រាម) 3-អាវុធខ្លី1ដើម (ឡុក) 4-ជញ្ជីងថ្លឹងគ្រឿងញៀនធំ1គ្រឿង និងតូច2គ្រឿង ៕
