ខេត្តព្រះសីហនុ: នាវាទេសចណ៍បរទេសមួយគ្រឿងមានឈ្មោះ COTA FORTUNA បាននាំភ្ញៀវទេសចរបរទេសចម្រុះជាតិសាសន៍ជិត ៤.០០០នាក់ ចូលចតនៅកំពង់ផែអន្តរជាតិក្រុងព្រះសីហនុប្រកបដោយសុវត្ថិភាពនៅថ្ងៃទី ២៥ ខែធ្នូនេះ ដើម្បីធ្វើទស្សនកិច្ចរយៈពេលមួយថ្ងៃនៅព្រះរាជាណាចក្រកម្ពុជាមុននឹងចាកចេញទៅកាន់ប្រទេសថៃ។
មន្ត្រីនគរបាលប៉ុស្តិ៍ច្រកទ្វារកំពង់ផែអន្តរជាតិក្រុងព្រះសីហនុបានឱ្យដឹងថា នាវាទេសចរណ៍ COTA FORTUNA មានសញ្ជាតិ ITALY មានបណ្តោយប្រវែង ២៧២.១៥ម៉ែត្រ ទទឹង ៣៥.៥០ ម៉ែត្រ ជម្រៅទឹក ៨ម៉ែត្រ បាននាំភ្ញៀវទេសចរបរទេសចម្រុះជាតិសាសន៍មកពីប្រទេសសិង្ហបុរី ចូលចតនៅកំពង់ផែអន្តរជាតិក្រុងព្រះសីហនុ នៅវេលាម៉ោង៨ ព្រឹកថ្ងៃទី២៥ ខែធ្នូ ឆ្នាំ២០១៨នេះ ហើយនាវាមានគម្រោងចាកចេញពីកំពង់ផែអន្តរជាតិក្រុងព្រះសីហនុឆ្ពោះទៅកាន់ប្រទេសថៃនៅវេលាម៉ោង១៨យប់ថ្ងៃដដែលនេះ។
មន្ត្រីនគរបាលដដែលបន្តថា ភ្ញៀវទេសចរដែលធ្វើដំណើរតាមនាវា COTA FORTUNA ក្នុងនោះ ភ្ញៀវទេសចរសរុបចំនួន ២.៧៩៥នាក់ ស្រី១.៤៩៩នាក់ មាន៥៨សញ្ជាតិ និងមាននាវិកសរុបចំនួន ៩៧៥នាក់ ស្រី១៥០ នាក់ មាន ៣៥សញ្ជាតិ។ ក្នុងចំណោមភ្ញៀវទេសចរដែលធ្វើដំណើរតាមនាវា COTA FORTUNA មានសញ្ជាតិច្រើនជាងគេ មានដូចជា Italy ៧៤៥នាក់, France ២៨២នាក់, Romany ១០៥នាក់ និងក្រៅពីនោះមានភ្ញៀវទេសចរសញ្ជាតិផ្សេងៗទៀត៕
