នាយ កុយ និង នាយក្រិន ជួបគ្រោះថ្នាក់ចរាចរណ៍នៅខេត្ត ត្បូងឃ្មុំនៅពេលនាយកុយដែលជាអ្នកបេីកបរចាកចេញពីខេត្តរតនគិរីឆ្ពោះមកភ្នំពេញបានរេចង្កូតជ្រុលទៅបុកដេីមឈេី បណ្តាលឲ្យរបួសកែងដៃស្តាំលក្ខណៈស្រាលនិង នាយក្រិនគ្មានរបួស ចំណែករថយន្តខូចខាតគួរសម ។
ហេតុការណ៍នេះកើតឡើងនៅព្រឹកថ្ងៃទី២០ ខែមករា ឆ្នាំ២០១៩ វេលាម៉ោង០៥និង៥០នាទីព្រឹក នៅលើផ្លូវលេខ ៧៣ ភូមិថ្នល់ ឃុំតំបែរ ស្រុកតំបែរ ខេត្តត្បូងឃ្មុំ ។
បើតាមលោកឧត្តមសេនីយ៍ស្នងការ ហេតុការណ៍គ្រោះថ្នាក់ចរាចរណ៍នេះ បណ្ដាលមកពីរថយន្តបែកកង់រ៉េ ទៅបុកដើមឈើ។ ដោយរថយន្ដដែលតារាកំប្លែងទាំងពីរនាក់ធ្វើដំណើរនេះ ម៉ាកឡង់គ្រីស័រ ពណ៌ស ពាក់ផ្លាកលេខភ្នំពេញ2AR-9968។
លោកឧត្តមសេនីយ៍ បែន រ័ត្ន បានបញ្ជាក់ទៀតថា រថយន្ដនេះបើកបរដោយឈ្មោះ ជួង ជី (ហៅនាយកុយ) អាយុ៦៤ឆ្នាំ រស់នៅរាជធានីភ្នំពេញ រងរបួសកែងដៃស្តាំ និងអ្នករួមដំណើរឈ្មោះ ទេស សុជន (នាយក្រិន) អាយុ៣៩ឆ្នាំ រស់នៅសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ដោយជនរងគ្រោះទាំងពីរធ្វើដំណើរ មកពីខេត្តរតនគរី ទៅរាជធានីភ្នំពេញ៕
