ខណៈពេលដែលក្រសួងវប្បធម៌ និងវិចិត្រសិល្បៈបានចេញសេចក្តីណែនាំស្តីអំពាវនាវ និងការទប់ស្កាត់ទង្វើរអសីលធម៌ផ្សេងៗដែលខុសទៅនឹងប្រពៃណីខ្មែរ នៅថ្ងៃ 14 ខែកុម្ភៈ ស្របពេលដែលយប់មិញនេះតារាចម្រៀងល្បីឈ្មោះគឺលោក ថេណា បានបញ្ចេញបទចម្រៀងក្តៅសាច់មួយបទ ដែលមានចំណងជើងថា «អេម» ដែលស្ដាប់ទៅមានអត្ថន័យស្រើបស្រាវ និងធ្វើឱ្យមហាជនក្ដៅសាច់។ បទនេះដែរ លោកមិនបានបង្ហាញពាក្យពេចន៍ចំៗ ដើម្បីឱ្យទាក់ទាញកាមារម្មណ៍នោះទេ តែលោកបានដាក់បម្រាមចំពោះមនុស្សឱ្យក្រោមអាយុ 18 ឆ្នាំក្នុងការស្ដាប់។
ស្របគ្នានោះដែរ អ្នកលេងបណ្ដាញសង្គមមួយចំនួនបានលើកឡើងថា ការបញ្ចេញបទចម្រៀងថ្មីអត្ថន័យស្រើបស្រាល របស់លោក ថេណា នៅមុនថ្ងៃ 14 កុម្ភៈ ហាក់ដូចជាចង់ឱ្យយុវវ័យមួយចំនួនយកគំរូនេះទៅអនុវត្តន៍ ដែលវាផ្ទុយទៅនឹងការណែនាំរបស់ក្រសួង។ មិនខុសគ្នានោះទេ អ្នកសិល្បៈ មួយចំនួនក៏បានបង្ហោះសាររិះគន់រូបលោកផងដែរ ដែលបានបញ្ចេញបទចម្រៀងដែលមានអត្ថន័យមិនអាចទទួលយកបាន សម្រាប់វប្បធម៌ខ្មែររបស់យើង។
យ៉ាងណាមិញ លោក ថៃ នរៈសត្យា រដ្ឋលេខាធិការក្រសួងវប្បធម៌ និង វិចិត្រសិល្បៈបានសរសេរនៅលើបណ្តាញទំនាក់ទំនងសង្គមនៅមុននេះបន្តិចថា ទស្សនៈយ៉ាងម៉េចហ្នឹង ដែលអាចបង្កើតគំនិតផលិតស្នាដៃរបៀបនេះ ?! ជាអ្នកនិពន្ធ ជាអ្នកចម្រៀង ជាអ្នកសិល្បៈ ជាសាធារណៈបុគ្គល គួរតែជាគម្រូល្អជាសាធារណៈជាពិសេស ចំពោះប្អូនៗយើងជំនាន់ក្រោយ ! តែនេះមិនអ៊ីចឹងទេ បែជាបន្ទាបបន្ថោកខ្លួនឱ្យក្លាយជាអ្នកបំពុល និងបំផ្លាញខ្លួនក្នុងវិស័យវប្បធម៌របស់ជាតិខ្លួនទៅវិញ ។ លោកបានបន្តថា មិនយល់ សង្ឃឹមមានអ្នកគាំទ្រភាពលីលានេះបានប៉ុន្មាននាក់ទៅហ្នឹង ? បើគ្រាន់តែតែងើបក្បាលមកត្រូវមហាជនសំពងយ៉ាងតំណំទៅហើយនោះ ! យករឿងដាក់ខ្លួនមែន !!!! ថនស.11.2.2019 ។
សូមជម្រាបថា ខណៈនេះ វីដេអូចម្រៀងរបស់ ថេណា បានលុបចេញពីបណ្ដាញសង្គមយូធូបហើយ៕
