ភ្នំពេញ៖ តំណាងទីភ្នាក់ងារសហប្រតិបត្ដិការអន្ដរជាតិនៃប្រទេសជប៉ុនប្រចាំនៅកម្ពុជា (JICA) នៅថ្ងៃទី ១៤ កុម្ភៈនេះ បានមកផ្ដល់បទពិសោធន៍ និងប្រឹក្សាយោបល់ស្ដីពីការទប់ស្កាត់ករណីគ្រោះថ្នាក់ចរាចរណ៍ផ្លូវគោក ខណៈករណីគ្រោះថ្នាក់ចរាចរណ៍នៅកម្ពុជាកើតឡើងជារៀងរាល់ថ្ងៃគួរឲ្យព្រួយបារម្ភ។
ការលើកឡើងនេះ ក្នុងសិក្ខាសាលាមួយស្តីពី«សុវត្ថិភាពចរាចរណ៍ផ្លូវគោក» ដោយបានអញ្ជើញអ្នកជប៉ុនមកផ្តល់ប្រឹក្សា និងបទពិសោធន៍ ដើម្បីទប់ស្កាត់ការគ្រោះថ្នាក់ចរាចរណ៍នៅកម្ពុជា។
លោក SOGANO Yuichi ប្រធានតំណាងទីភ្នាក់ងារសហប្រតិបត្ដិការអន្ដរជាតិនៃប្រទេសជប៉ុនប្រចាំនៅកម្ពុជា (JICA) បានថ្លែងថា រដ្ឋាភិបាលធ្លាប់បានគាំទ្រចំពោះសុវត្ថិភាពចរាចរណ៍នៅកម្ពុជា តាមរយៈការជួយលើកម្មវិធីផ្សេងៗការជួយកែសម្រួលនូវហេដ្ឋារចនាសម្ព័ន្ធ ផ្លូវថ្នល់ និងបង្ការ ទប់ស្កាត់នូវគ្រោះថ្នាក់ចរាចរណ៍នៅទូទាំងប្រទេសកម្ពុជា។
លោកបន្តថា ខណៈនេះ JICA បានអញ្ជើញអ្នកជំនាញផ្នែកអប់រំ វិស្វកម្ម និងអ្នកជំនាញផ្នែកបង្ការទប់ស្កាត់សុវត្ថិភាពចរាចរណ៍ ដើម្បីចែករំលែកនូវចំណេះដឹងក៏ដូចជាជំនាញក្នុងការផ្ដល់ជូនដល់មន្រ្ដីកម្ពុជាដែលធ្វើការងារផ្នែកសុវត្ថិភាពចរាចរណ៍នេះឱ្យកាន់តែប្រសើរឡើងថែមទៀត។
លោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូនបានលើកឡើងថា រាជរដ្ឋាភិបាលជប៉ុនបានជួយជាប្រចាំដល់កម្ពុជាលើគ្រប់វិស័យដោយឡែកជួយដល់ការអភិវឌ្ឍផ្លូវ ស្ពាន កំពង់ផែ និងធនធានមនុស្សរបស់ក្រសួងសាធារណៈការនិងដឹកជញ្ជូន។
លោកស្រីបន្តថា នេះជាការចូលរួមចំណែកជាមួយរាជរដ្ឋាភិបាលក្នុងការកាត់បន្ថយទុក្ខលំបាក និងភាពក្រីក្ររបស់ប្រជាពលរដ្ឋយ៉ាងពិតប្រាកដ និងបានវាយតម្លៃខ្ពស់ចំពោះអ្នកជំនាញផ្នែកសុវត្ថិភាពចរាចរណ៍ជប៉ុនដែលបានចំណាយពេលវេលាធ្វើដំណើរវែងឆ្ងាយ ដើម្បីនាំមកនូវបទពិសោធននិងបច្ចេកទេស វិធានការដែលពិតជានឹងអាចជួយឱ្យអ្នកជំនាញ និងអ្នកពាក់ព័ន្ធលើការងារសុវត្ថិភាពចរាចរណ៍កម្ពុជា អាចទទួលបានបន្ថែមនូវធាតុល្អសម្រាប់ការបន្ថយគ្រោះថ្នាក់ចរាចរណ៍បានប្រកបដោយប្រសិទ្ធភាពខ្ពស់។
លោកស្រីបន្ថែមថា បច្ចុប្បន្នគ្រោះថ្នាក់ចរាចរណ៍នៅតែជាកង្វល់របស់រាជរដ្ឋាភិបាលកម្ពុជា ដោយសារតែបញ្ហានេះនៅតែកើតមានជារៀងរាល់ថ្ងៃបណ្តាលឱ្យស្លាប់របួសពិការ និងខូតខាតទ្រព្យសម្បត្តិរដ្ឋ និងឯកជន ខណៈដែលផ្លូវស្ពានគ្រប់ទីកន្លែងត្រូវបានសាងសង់ខ្វាត់ខ្វែងសម្រួលដល់ចរាចរណ៍ដឹកជញ្ជូនបម្រើនឱ្យគ្រប់វិស័យនៃតម្រូវការរបស់ប្រជាពលរដ្ឋ និងរបស់ប្រទេសទាំងមូល។
លោកស្រីក៏បានលើកឡើងថា គ្រោះថ្នាក់ចរាចរណ៍កើតឡើងពីការមិនគោរពច្បាប់ចរាចរណ៍របស់អ្នកប្រើប្រាស់ផ្លូវដែលរាជរាជរដ្ឋាភិបាលចាំបាច់ស្វះស្វែងប្រមូលផ្តុំគ្រប់អ្នកពាក់ព័ន្ធឱ្យចូលរួមចំណែកធ្វើយ៉ាងណាទប់ស្កាត់កាត់បន្ថយគ្រោះថ្នាក់ចរាចរណ៍ឱ្យនៅកម្រិតទាបបំផុត ឬលុបបំបាត់តែម្តងតាមដែលអាចធ្វើបាន៕
