គណកម្មការរៀបចំព្រឹត្តិការណ៍មហោស្រពភាពយន្តអន្តរជាតិ បានប្រកាសកាលពីថ្ងៃទី៥ មីនាថា ព្រឹត្តិការណ៍មហោស្រពភាពយន្តក្នុងឆ្នាំនេះ នឹងមានភាពយន្តកម្ពុជារហូតដល់ជាង២០រឿងគឺច្រើនជាងលើកមុនៗ នឹងបង្ហាញខ្លួនជាមួយនឹងភាពយន្តបរទេស។ មានការសន្និដ្ឋានថាភាពយន្តទាំងជាង130 រឿង មកពី 37 ប្រទេសនៅទូទាំងពិភពលោក នៅក្នុងឆ្នាំនេះ នឹងធ្វើអោយមហោស្រពភាពយន្តនៅក្នុងឆ្នាំនេះទទួលបានការចាប់អារម្មណ៍ខ្លាំង។
លោក ស៊ុន ខេមរ៉ា ជាអ្នកសម្របសម្រួលកម្មវិធីមហោស្រពភាពយន្តអន្តរជាតិកម្ពុជា បានថ្លែងប្រាប់”ផុសញូ”ថា មហោស្រពមួយនេះធ្វើឡើងរាល់ឆ្នាំ ដោយក្នុងឆ្នាំនេះ ខ្សែភាពយន្តរឿងល្បីៗដូចជារឿង «ហ៊្វូណន» ដែលជាភាពយន្តជាប់ពានរង្វាន់ក្នុងមហោស្រពភាពយន្តគំនូរជីវចលទីក្រុងអានស៊ី កាលពីឆ្នាំ 2018 រឿង«ផ្នូរគ្មានឈ្មោះ»ដែលឈ្នះមហោស្រពភាពយន្តនៅទីក្រុងវេនីស, និងជាបេក្ខភាពក្នុងពានរង្វាន់អូស្ការ កាលពីឆ្នាំ 2019ក្ដៅៗតំណាងឲ្យកម្ពុជា រឿង «តន្ត្រីជីវិត»របស់មហោស្រពភាពយន្តអន្តរជាតិទីក្រុងតូក្យូ និង រឿង «The Prey» របស់មហោស្រពភាពយន្តអន្តរជាតិទីក្រុងប៊ូសាន កាលពីឆ្នាំ 2018 ក៍នឹងបង្ហាញខ្លួន។ មហោស្រពក្នុងឆ្នាំនេះ លោកថាធ្វើឡើងស្របពេលខួប៤០ឆ្នាំនៃការដួលរលំរបបខ្មែរក្រហម ទើបមានភាពយន្តខ្នាតធំ ក៏ដូចជាភាពយន្តឯកសារល្បីៗជាច្រើន និយាយអំពីរបបប្រល័យពូជសាសន៍នៅកម្ពុជា នឹងបញ្ចាំងជូន។ កម្មវិធីដ៏ពិសេសនេះក៏រួមបញ្ចូលផងដែរនូវការតាំងពិព័រណ៍ស្នាដៃសិល្បៈ ព្រមទាំងកិច្ចពិភាក្សា ដែលនឹងប្រព្រឹត្តទៅនៅឯមជ្ឈមណ្ឌលបុប្ផាណា។
ក្នុងព្រឹត្តិការណ៍នេះ ធ្វើឡើងពីថ្ងៃទី៩ ដល់ថ្ងៃ១៤ មីនា ដោយកម្ពុជាមានភាពយន្ត26ចូលរួម ដែលគិតជាភាគរយគឺមានចំនួនច្រើនបំផុតធៀបទៅនឹងមហោស្រពភាពយន្តអន្តរជាតិនៅបរទេស។ មហោស្រពភាពយន្តរបស់យើងនឹងធ្វើការចាក់បញ្ចាំងខ្សែភាពយន្តចំនួន ១៥០ លើក នៅតាមរោងភាពយន្តធំៗមួយចំនួនក្នុងរាជធានីភ្នំពេញ ក្នុងនោះរួមមាន រោងភាពយន្តលេជេន, រោងភាពយន្តម៉េជ័រស៊ីណេផ្លិច, រោងភាពយន្តប្រែមស៊ីណេផ្លិច, មជ្ឈមណ្ឌលបុប្ផាណា, សាលមហោស្រពចតុម្មុខ, និងសណ្ឋាគាររ៉ូសវូដ៕
