ខណៈកំពុងតែកាន់ទុកប្អូនស្រី លោក ខេមរៈ សិរីមន្ត បានបោះបង់ការសម្តែងប្រមាណជិត50កម្មវិធី ព្រមទាំងមិនទាន់គិតពីកម្មវិធីថ្មីៗមួយចំនួនផង។ លោកក៏លុបកុងត្រាចោលពីក្រុមហ៊ុនផ្សេងៗហើយខាងភាគីទៀតម្នាក់ៗសុទ្ធតែយោគយល់ មិនឱ្យលោកសងសំណង អំឡុងពេលបាត់បង់មនុស្សជាទីស្រឡាញ់ពេញចិត្តពេញថ្លើម។ តែយ៉ាងណាមិញ នៅព្រឹកថ្ងៃទី 19 ខែមីនា នេះលោកបានត្រៀមត្រឡប់មកទីលានដ៏ភ្លឺចិញ្ចាចឡើងវិញហើយ បើនិយាយពីសិល្បៈវិញ ឃើញថា លោកមានតំណែងជាគណៈកម្មការធំមួយជាមួយហង្សមាស ក្នុងកម្មវិធីប្រឡងចម្រៀងខ្នាតអន្តរជាតិ ព្រមទាំងទើបតែរំលេចការងារជាម្ចាស់គម្រោងពុះដីឡូត៍ថ្មីនៅក្រុងប៉ោយប៉ែតក្បែរព្រំដែនថៃ។
ការចេញមុខបើកមុខជំនួញធំផ្ទាល់ខ្លួននេះ ដោយសារតែកន្លងមកថ្មីៗ លោកធ្លាប់បានចាប់ដៃគូជាមួយកំពូលតារាចម្រៀងលោក ព្រាប សុវត្ថិ និងម្ចាស់ផលិតកម្ម Galaxy លើគម្រោងដីពុះឡូត៍។ ម្ដងនេះលោកបានបញ្ជាក់ថា៖ ”គម្រោងដ៏ធំនេះខ្ញុំទិញដីបានប្រមាន 10 ហិចតា ដោយគ្រោងពុះជាដីឡូត៍។ ដូច្នេះហើយបងប្អូនទិញបន្តពីខ្ញុំ មិនខុសបំណងទេ ព្រោះមានសិទ្ធពិសេសជាងគេ ក្នុងគម្រោងនេះ”។ លោកថា ខំធ្វើយ៉ាងណា ដើម្បីសិល្បៈ បើកាលណាលោកមានលុយ លោកចង់បង្កើតសិល្បៈឲ្យល្អ ដាក់ការផលិតចេញចម្រៀងជាមួយបច្ចេកវិទ្យាទំនើបៗ ដូចប្រទេសជិតខាង ដោយយកធនធានមនុស្សឲ្យកាន់តែល្អចូលរួម។ ដូចនេះបើចង់រីកចម្រើន ទាល់តែមានលុយជាមុនសិន ទើបយើងធ្វើអ្វីៗបាន។
ទាក់ទងគម្រោងពុះដីឡូតិ៍លក់នៅក្រុងប៉ោយប៉ែតលោក សិរីមន្ត ថា ជាចំណែកមួយ ដែលលោកដាក់ទុនតែម្នាក់ឯង គ្មានអ្នកណា ឬឧកញ៉ាណានៅពីក្រោយទេ។ លោក បានលុយកាក់សន្សំពីសិល្បៈ និងការរកស៊ីដី និងមុខរបរលក់ទឹកអប់ ទើបអាចធ្វើគម្រោងពុះដីថ្មី នៅតំបន់ជាយដែននេះបាន។
លោក ថា ដីឡូតិ៍នៅប៉ោយប៉ែតស្ថិតក្នុងដំបន់ China Poipet Satellite City មានចម្ងាយ៣គីឡូម៉ែត្រ ពីជាយដែនខ្មែរ-ថៃ ដោយពុះជាឡូតិ៍៨០០ប្លង់ ចាប់ពីតម្លៃ២៩៥០ដុល្លារឡើងទៅ មានទំហំ៥គុណ២០ម៉ែត្រ។ នេះជាតម្លៃមួយសមរម្យបំផុត ដែលគិតថា ចុះថ្លៃរួចរាល់ បើតម្លៃត្រឹមត្រូវខ្ទង់៥ពាន់ឡើងឯណោះ។ លោកសម្លឹងឃើញតំបន់នេះ ល្អមិនចាញ់កំពង់សោម ឬភ្នំពេញ ហើយគម្រោងពុះដីនេះ ចាប់បើកលក់ពីថ្ងៃ២៣ មីនា ២០១៩ខាងមុខនេះតទៅ ដោយមានអ្នកខ្លះកក់ ឬទិញរួចរាល់ហើយ៕
