មួយបទនេះ អ្នកគាំទ្រភាគច្រើនសរសើរថា ង៉ែត សុភ័ក្រ ច្រៀងបានពិរោះ និងប្លែកត្រចៀក មានមនោសញ្ចេតនាស៊ីអារម្មណ៍ គឺបទ “សាងស្នេហ៍ខុសសាសន៍” បន្ទាប់ធ្លាប់ទទួលការចាប់អារម្មណ៍ក្នុងបទ “បែកគ្នាទៅបងចេកទេ”។ អ្វីដែលកាន់តែធ្វើឲ្យគេមើលឃើញ ពីការវិវត្តនៃទឹកដមសំឡេងរបស់លោក និងស្នាដៃផលិតអឹមវីរបស់លោក។
លោក ង៉ែត សុភ័ក្រ និយាយថា ដោយសារតែលោកធ្លាប់ បានទៅដើរកម្សាន្តនៅក្នុងប្រទេសសិង្ហបុរី ទើបលោកនឹកឃើញផលិតបទនេះ ដោយខ្លឹមសារបទនេះ រំលេចពីស្នេហាមួយ ដែលផ្ដើមចេញពីបុរសម្នាក់ ទៅកម្សាន្តនៅក្នុងប្រទេសសិង្ហបុរី ហើយក៏ជួបនារីបរទេសនៅទីនោះ ធ្វើឲ្យតួអង្គបុរសជាប់ចិត្តស្រទ្បាញ់។ លោកថាសប្បាយចិត្ត ដែលខ្លួនទើបតែបានបង្ហោះចម្រៀងមួយបទនេះ មិនទាន់បានប៉ុន្មានម៉ោងផង ប៉ុន្តែមានអ្នកស្ដាប់ច្រើននៅលើយូធូប។ នេះជាចម្រៀងទី១៨ហើយ ដែលលោកបានច្រៀងផ្ទាល់ខ្លួន ដោយរាប់បញ្ចូលទាំងបទនិពន្ធថ្មី និង Cover ម្ចាស់ដើម។ យ៉ាងណាមិញ លោកថា នៅមិនទាន់ពិចារណា ចូលច្រៀងប្រចាំផលិតកម្មនោះទេ ដោយសារតែហេតុផលរវល់ខ្លាចឲ្យពេលវេលាគេមិនបាន និង គិតថានៅឯករាជបែបនេះ ស្រួលចេញបទជាង។
តារាចម្រៀង និងសម្ដែងប្រុសរូបនេះបានបន្តថា នឹងគ្រោងបោះទុនចេញផលិតបទនេះ នៅក្នុងប្រទេសសិង្ហបុរីតែម្ដង ដើម្បីរំលេចបទទាំងមូល ឲ្យកាន់តែមានភាពទាក់ទាញ នៅក្នុងអាជីពចម្រៀង។ ក្នុងនោះលោក ក៏នឹងចាប់ផ្ដើមចេញប្រូម៉ូតបទនេះ ក្នុងកម្មវិធីផ្សេងៗឲ្យកាន់តែខ្លាំងផងដែរ មុនចេញMV៕
