« ផឹកមិនកើត » បទចម្រៀងថ្មីថ្វីត្បិតតែបទនេះពីរោះ និងមានការចាប់អារម្មណ៍ច្រើនមែន ប៉ុន្តែមនុស្សជាច្រើននៅពុំទាន់ដឹងនៅឡើយទេថា ម្ចាស់សំនៀងលាក់មុខទាំងពីររូបនៅក្នុងបទនេះជាអ្នកណា ដោយសារតែនៅក្នុងវីដេអូចម្រៀងដាក់រូបភាពតុក្កតា និងពុំទាន់បានបង្ហាញអត្តសញ្ញាណអ្នកច្រៀងនៅឡើយ។ ការពិតម្ចាស់សំឡេងទាំងពីររូបនៅក្នុងចម្រៀងនេះ គឺជាអតីតបេក្ខជនរបស់កម្មវិធី The Voice Cambodia កាលពីប៉ុន្មានឆ្នាំមុន គឺលោក អ៊ិន សេរីវង្ស និងលោក ជឿន ចិត្ត។
បើតាមការឲ្យដឹងពីលោក អ៊ិន សេរីវង្ស បានប្រាប់ថា កម្លាំងចិត្តដែលនាំឲ្យលោកចាប់ដៃគ្នាជាមួយ ជឿន ចិត្ត ដែលជាមិត្តនឹងគ្នាដើម្បីធ្វើបទនេះ គឺបន្ទាប់ពីចម្រៀងមួយបទ «កាលណាយកប្ដី» ដែលលោកទើបចេញប៉ុន្មានសប្តាហ៍មុន ទទួលបានការគាំទ្រយ៉ាងខ្លាំង ដោយបទនោះជាប្រភេទចម្រៀង Cover ដែលលោកសរសេរប៉ារ៉ូលថ្មី និងមានន័យចាក់ដោត ឬដុតអារម្មណ៍មនុស្សស្រីអាយុច្រើនតែមិនទាន់រៀបការ។ ហេតុនេះទើបលោកចាប់ផ្ដើមបន្តធ្វើបទទី២ ផឹកមិនកើត នេះជាបន្តទៀត ក្នុងន័យផ្ដល់ការកម្សាន្តភាគច្រើនទៅដល់ទស្សនិកជន និងអ្នកគាំទ្រដែលតែងតែចូលចិត្តស្ដាប់ចម្រៀងរបស់លោក។ ម្យ៉ាងទៀតបទ ផឹកមិនកើត នេះដែរ ពុំមានបំណងចង់បំផុសពីការផឹកស៊ីអ្វីទៅដល់យុវជនឡើយ គឺគ្រាន់តែចង់ផ្ដោតសំខាន់លើការកម្សាន្ត និងចង់ឲ្យអ្នកដែលចូលចិត្តពិសាគ្រឿងស្រវឹង ឲ្យងាកមកយកចិត្តទុកដាក់គិតគូរពីសុខភាពរបស់ខ្លួនផង។
គួរបញ្ជាក់ថាបទ ផឹកមិនកើត ទើបតែបញ្ចេញវីដេអូខ្លីតែប៉ុណ្ណោះ ហើយបើតាមម្ចាស់បទបង្ហើបឲ្យដឹងថា នឹងបញ្ចេញពេញជាផ្លូវការនៅក្នុងពេលឆាប់ៗនេះហើយ។ ចង់ដឹងថា ចំណងដៃទី២ បន្ទាប់ពីបទ ពេលណាយកប្ដី របស់លោក អ៊ិន សេរីវង្ស ដែលបកស្រាយរួមគ្នា ជាមួយលោក ជឿន ចិត្ត ពីរោះ និងកំប្លុកកំប្លែងប៉ុណ្ណា? សូមរីករាយស្ដាប់ដូចតទៅ៖
