ប្រទះឃើញគ្រាប់ចំនួន 54 កេសក្បែរអូរព្រំដែនកម្ពុជា-ថៃ

បាត់ដំបង៖ ម្សិលមិញនេះ ​ប្រជាពលរដ្ឋ​កាប់​គាស់​ដី​ធ្វើចំការ​បាន​ប្រទះ​ឃើ​ញ​កេស​​គ្រាប់​កាំ​ភ្លើងនៅ​ក្បែរ​អូរ​ព្រំដែន ​ក្នុង​ចំណុច ​39TV 163635 ស្ថិត ក្នុង​ក្រុមទី 03 ភូមិ អូរ ឃុំ ពេជ្រ​ចិន្តា ស្រុកភ្នំព្រឹក ខេត្តបាត់ដំបង។

ក្រោយទទួលដំណឹងនេះ លោក​វរសេនីយ៍ទោ សារ៉េត វិ​សេដ្ឋ អធិការនគរបាល​ស្រុក​ភ្នំព្រឹក បាន​ដឹក​នាំ​កម្លាំង​​ជីក​គាស់​ក្នុង​ដីព្រៃ​មួយកន្លែងនោះ បានរកឃើញកេសគ្រាប់ចំនួន 54 កេស ដោយ​មាន​កេស​គ្រាប់៖
គ្រាប់កាំភ្លើង​ប្រភេទ RPK ចំនួន 09 កេស
គ្រាប់កាំភ្លើង​ប្រភេទ AK47 ចំនួន 01 កេស
គ្រាប់កាំភ្លើង​ប្រភេទ 12,7 ចំនួន 44 កេស

ក្រោយហេតុការណ៍នេះ សមត្ថកិច្ច​នគរ​បាល​បានដាក់​ខ្សែ​បម្រាម​ហាម​ប៉ះពាល់ និង​បាន​រាយការណ៍​ជូនទៅ​អង្គភាព​កម្ចាត់​ម៉ី​ន​កម្ពុជា CMAC ដើ​ម្បី​បន្ត​រុករក​តាម​ជំនាញ។ លោក​វរសេនីយ៍ទោ សារ៉េត វិ​សេដ្ឋ បាន​បញ្ជាក់ថា យុ​ទ្ឋ​ភ័​ណ្ឌ​ទាំង 54 កេស​នោះ ​ទំនង​ត្រូវកប់ទុកអំឡុងពេល​​សម័យ​សង្គ្រាម​បង្ហូរ​ឈាម​​​ពី​អតីតកាល ហើ​យ​ទីតាំង​នេះ​ស្ថិតនៅ​កៀក​បំផុត​ពី​ខ្សែបន្ទាត់​ព្រំដែន​កម្ពុជាថៃ។

លោក​បន្តថា តាម​ប្រភពពី​បងប្អូន (អតីត​ជា​ទា​ហ៊ាន) ដែល​រស់នៅ​ទីនេះ​ពី​ពេលមុន​ធ្លាប់បាន​និយាយថា មាន​ទីកន្លែង​ផ្សេងទៀត​ក្នុងភូមិ​សាស្ត្រ​ជាប់​ព្រំដែន ជា​ចំណុច​លាក់​កប់​យុ​ទ្ឋ​ភ័​ណ្ឌ​ពី​អតិ​ត​កាល ហើយ​រហូតមក​ដល់ពេលនេះ មិនអាច​នៅចាំ​ទីកន្លែង​នោះ​ដោយ​ជាក់លាក់​បានទេ។

ទោះជា​យ៉ាងណាក៏ដោយ យុ​ទ្ឋ​ភ័​ណ្ឌ​ជា​គ្រាប់​កាំ​ភ្លើ​ង​ចំរុះ​ទាំងនេះ មានតែ​គ្រាប់​ប្រភេទ 12,7 ប៉ុណ្ណោះ​ដែល អាច​នៅ​ប្រើ​ប្រាស់​បាន​ខ្លះ ឯ​គ្រាប់​កាំ​ភ្លើ​ង​ផ្សេង​ពីនេះ​មាន​សភាព​ពុកផុយ​ប្រើ​ការលែង​កើ​តទៅ​ហើយ៕

ប្រភព៖ ស្នងការដ្ឋាននគរបាលខេត្តបាត់ដំបង