សព លោក នួន ជា នឹងត្រូវតម្កល់នៅវត្តមួយតាមបណ្ដាំកាលនៅរស់

ភ្នំពេញ: សព​អតីត​បងធំ​ទី ២ នៃ​របប​ខ្មែរក្រហម​លោក នួន ជា ត្រូវបាន​ដឹក​ទៅដល់​គេហដ្ឋាន​របស់គាត់​នៅ​ផ្សារ​ព្រំ ស្រុក​សាលា​ក្រៅ ខេត្ត​ប៉ៃលិន នៅ​ថ្ងៃទី០៥ ខែសីហា​នេះ ដោយ​នឹងត្រូវ​បូជា​នៅ​វត្ត​ព្រំ​គិរី​មរកត តាម​បណ្ដាំ​កាលពី​គាត់​នៅរស់​ដែលមាន​ទីតាំងនៅ​ភូមិ​ផ្សារ​ព្រំ​ជើង ឃុំ​ស្ទឹង​កាច់ ស្រុក​សាលា​ក្រៅ នៅ​ខេត្ត​ប៉ៃលិន ដើម្បី​ធ្វើបុណ្យ​តាម​ប្រពៃណី។

ព្រះ​តេជគុណ វ៉ែន ចាន់​សុ​ម៉ៃ ព្រះចៅអធិការ​វត្ត​ព្រំ​គិរី​មរកត បាន​មាន​សង្ឃដីកា​ឲ្យ​ដឹងថា សព​លោក នួន ជា ត្រូវ​បានរៀបចំ​ធ្វើបុណ្យ​នៅក្នុង​វត្ត​ព្រំ​មរកត ដោយ​កូនចៅ​នាំគ្នា​រៀបចំ​ធ្វើ​បុណ្យសព​ក្នុង​វត្ត​ខាងលើនេះ​តាម​បណ្តាំ​របស់លោក​នួន ជា កាលពី​នៅរស់ ដោយ​ប្រាប់ថា ពេល​គាត់​អស់​ជីវិត​ទៅ​ត្រូវតែ​យក​សព​របស់គាត់​មក​បូជា​នៅ​វត្ត​នេះ ព្រោះ​គាត់​ធ្វើបុណ្យ​ទាន​នៅ​វត្ត​នេះ​តាំងពីដើម​មក ។

ព្រះចៅអធិការ​វត្ត​ព្រំ​គិរី​មរកត បាន​មាន​សង្ឃដីកា​បន្ត​ឱ្យដឹងថា ម្យ៉ាងវិញទៀត នៅ​ទីធ្លា​ផ្ទះ​របស់លោក​នួន ជា តូចចង្អៀត ពិបាក​ក្នុងការ​ទទួលភ្ញៀវ ខណៈ​បងប្អូន​កូនចៅ និង​សាច់ញាតិ​មក​ចូលរួម​បុណ្យសព​មាន​ចំនួន​ច្រើន។

ជាមួយគ្នានេះ នេះ​បើតាម​លោក នេត្រ ភក្ត្រា អ្នកនាំពាក្យ​សាលាក្តី​ខ្មែរក្រហម បាន​ឲ្យ​ដឹង​ដែលថា៖ «សាកសព នួន ជា ត្រូវបានធ្វើ​នីតិវិធី​ប្រគល់ជូន​ដល់​ក្រុមគ្រួសារ និង​បាន​ដឹក​ចេញពី​មន្ទីរពេទ្យ​មិត្តភាព​ខ្មែរ​សូ​វៀត​នៅ​ម៉ោង ៤៖៤៧ នាទី​ព្រឹក​ព្រលឹម​ថ្ងៃទី៥ ខែសីហា ឆ្នាំ ២០១៩។ សព​ជនជាប់ចោទ នួន ជា ត្រូវបាន​ក្រុមគ្រួសារ​យកទៅ​ធ្វើបុណ្យ​តាម​ប្រពៃណី នៅ​វត្ត​មួយ​ស្ថិតក្នុង​ទីលំនៅ​របស់គាត់​នៅ​ខេត្ត​ប៉ៃលិន។ សព​បាន​ទៅដល់​ទីកន្លែង​ពិធីបុណ្យ​នៅ​ម៉ោង ១២៖៣០នាទី»

ជនជាប់ចោទ នួន ជា បានទទួល​មរណភាព​នៅវេលា​ម៉ោង ៦៖០០ល្ងាច ថ្ងៃទី៤ ខែសីហា ឆ្នាំ២០១៩ នៅ​មន្ទីរពេទ្យ​សហភាព​ខ្មែរ -សូ​វៀត ក្នុង​ជន្មាយុ៩៣ឆ្នាំ បន្ទាប់ពី​បាន​បញ្ជូន​ពី​មន្ទីរឃុំឃាំង ដើម្បី​សម្រាក​ព្យាបាល​នៅ​មន្ទីរពេទ្យ​នេះ អស់​រយៈពេល១ខែ។

លោក នួន ជា កើត​នៅ​ថ្ងៃទី០៧ ខែកក្កដា ឆ្នាំ១៩២៦ មាន​តួនាទី​ជា​អនុ​លេខា​បក្ស​កុម្មុយនីស្ត​កម្ពុជា សមាជិក​គណៈកម្មាធិកា​រ​អចិ​ន្រៃ្ត​យ៍ និង​គណៈកម្មាធិការ​ម​ជ្ឈិ​ម​បក្ស​កុម្មុយនីស្ត​កម្ពុជា និង​ជា​ប្រធានសភា​តំណាង​ប្រជាជន​នៃ របប​កម្ពុជា​ប្រជាធិបតេយ្យ។

លោក នួន ជា ត្រូវបាន​រកឃើញថា មាន​ពិរុទ្ធភាព​ពីបទ​ឧក្រិដ្ឋ​កម្ម​ប្រឆាំងនឹង​មនុស្សជាតិ និង​ត្រូវបាន​ផ្តន្ទាទោស​ដាក់ពន្ធនាគារ​អស់​មួយជីវិត​នៅក្នុង​សំណុំរឿង ០០២/០១ ។ នៅ​ថ្ងៃទី២៣ ខែវិច្ឆិកា ឆ្នាំ២០១៦ អង្គជំនុំជម្រះ​តុលាការ​កំពូល បាន​បដិសេធ​ពិរុទ្ធភាព​មួយចំនួន ប៉ុន្តែ​តម្កល់​ការផ្តន្ទាទោស​របស់​អង្គជំនុំជម្រះ​សាលាដំបូង​ឲ្យ​ជាប់ពន្ធនាគារ​អស់​មួយជីវិត។ នៅ​ថ្ងៃទី១៦ ខែវិច្ឆិកា ឆ្នាំ២០១៨ នួន ជា ត្រូវបាន​ផ្តន្ទាទោស​ពីបទ​ប្រល័យពូជសាសន៍ ឧក្រិដ្ឋកម្ម​ប្រឆាំងនឹង​មនុស្សជាតិ និង​ការរំលោភបំពាន​យ៉ាងធ្ងន់ធ្ងរ​ទៅលើ​អនុសញ្ញា​ទីក្រុង​ហ្សឺ​ណែវ ឆ្នាំ១៩៤៩ នៅក្នុង​សំណុំរឿង ០០២/០២ ជាមួយ ខៀវ សំផន។ នេះ​បើតាម​ការប្រកាស​របស់ សាលាក្តី​ខ្មែរក្រហម។

អង្គជំនុំជម្រះ​សាលាដំបូង បានរួម​បញ្ចូល​ទោស​ជាប់ពន្ធនាគារ​អស់​មួយជីវិត​នៅក្នុង​សំណុំរឿង ០០២/០១ និង​សំណុំរឿង ០០២/០២ ទៅជា​ការផ្តន្ទាទោស​ដាក់​ពន្ធនាគារ​អស់​មួយជីវិត​តែមួយ៕