ក្រសួងធនធានទឹក និងឧតុនិយម ព្រមានពីការជន់លិចខេត្តព្រះសីហនុ និងរតនគីរី ដោយឥទ្ធិពលទឹកភ្លៀង

ភ្នំពេញ៖ ក្រសួងធនធានទឹក និងឧតុនិយម នៅថ្ងៃទី០៩ ខែសីហានេះ បានចេញសេចក្ដីប្រកាសព័ត៌មានថ្មីមួយ​ទៀត ដោយព្រមានពីការបន្ដជន់លិចនៅខេត្តព្រះសីហនុ និងខេត្តរតនគីរី ដោយសារតែឥទ្ធិពលភ្លៀងទឹក ព្រោះ​ភ្លៀង​នឹងនៅតែបន្ដធ្លាក់យ៉ាងគំហុកជាប់ៗគ្នាទៅប៉ុន្មានថ្ងៃខាងមុខទៀត។

ក្រសួងធនធានទឹក និងឧតុនិយម បានឲ្យដឹងថា គិតចាប់ពីថ្ងៃទី០១ ដល់ថ្ងៃទី០៩ ខែសីហានេះ ភ្លៀងធ្លាក់​គំហុក​ជាប់​ៗគ្នា ក្នុង​កម្រិ​តខ្លាំងមានបរិមាណជាងរយមីលីម៉ែត្រស្ទើររៀងរាល់ថ្ងៃ ហើយបរិមាណសរុបរហូតដល់ ៨១៤​មី​លី​​ម៉ែត្រ និងបន្ដធ្លាក់ទៅប៉ុន្មានថ្ងៃខាងមុខទៀត ដែលនេះជាហេតុបណ្ដាលឲ្យមាន​ជំនន់ទឹកភ្លៀង​ធ្ងន់ធ្ងរកើត​មាន​ឡើង​។

ការជន់លិចនេះ សម្រាប់ខេត្តព្រះសីហនុ ក្រសួងធនធានទឹក និងឧតុនិយម ក៏បានបញ្ជូនគ្រឿងចក្រធុនធ្ងន់ រួមស​ហ​កា​រជាមួយអាជ្ញាធរខេត្តដើម្បីជួយអន្ដរាគមន៍រំដោះទឹកផងដែរ។ ចំណែក​ខេត្តរតនគរី តាមរយៈនៃទន្លេស្រែពក ដែល​ផ្ទៃរងទឹកភ្លៀងប្រមាណ ៦០ភាគរយ ស្ថិតក្នុងទឹកដី​​ប្រទេសវៀតណាម ធ្វើឲ្យទឹកទន្លេស្រែពកឡើង​យ៉ាង​គំហុ​ក បណ្ដាលឲ្យមានការប៉ះពាល់ដល់ស្រុកចំនួន២ គឺស្រុកកូនមុំ និងស្រុកលំផាត់។

​លោក គួច ចំរើន អភិបាលខេត្តព្រះសីហនុបានឲ្យដឹងថា រហូតមកដល់ពេលនេះ ស្ថានភាពទឹក​ភ្លៀង​នៅតែ​បន្ដ​គំ​រា​មកំហែងយ៉ាងខ្លាំងដល់ខេត្តព្រះសីហនុ ខណៈដែលស្ថានភាពមិនដែលធ្លាប់កើតមានពីមុននោះឡើយ សម្រាប់​ខេត្ត​តំបន់ទេសចរណ៍មួយនេះ។

លោកបន្ដថា ​នៅផ្លូវជាតិលេខ៤ ចន្លោះគីឡូមែត្រលេខ៧-៨ ស្ថិតនៅភូមិអុង ឃុំរាម ស្រុកព្រៃនប់ ខេត្តព្រះ​សី​ហ​នុ ទឹកជំនន់ទឹកភ្លៀង បានទឹកហូរច្រោះបាក់ផ្លូវអស់មួយចំហៀង ប៉ុន្ដែបច្ចុប្បន្ននេះកងកម្លាំងមូលដ្ឋានសមុទ្រ កង​ទ័ព​ជើង​ទឹកកំពុងធ្វើការជួសជុល។

លោកបញ្ជាក់ថា៖«សម្រាប់ប្រជាពលរដ្ឋដែលត្រូវធ្វើដំណើរឆ្លងកាត់ សូមមានការប្រុងប្រយ័ត្នខ្ពស់ ជាពិសេស​សុំ​ផ្អា​កធ្វើចរាចរណ៍ជាបណ្តោះអាសន្នចំពោះរថយន្តដឹកជញ្ជូនធុនធ្ងន់»៕