ស្ពានឆ្លងកាត់ស្ទឹងសង្កែ និងស្ទឹងផ្សេៗទៀតចំនួន ៤ ត្រូវបានប្រកាសបើកឲ្យធ្វើចរាចរណ៍ជាផ្លូវការ

បាត់ដំបង: ស្ពាន​ច្រាំង​ចោត ស្ថិតនៅ​ស្រុក​បាណន់ និង​ស្ពាន​ចំនួន៤ទៀត នៅ​ស្រុក​សំឡូត ស្រុក​ប​វិល ស្រុក​ឯក​ភ្នំ និង​ស្រុក​កំរៀង ខេត្តបាត់ដំបង ត្រូវបាន​ប្រកាស​បើក​ឲ្យ​ពលរដ្ឋ​ធ្វើ​ចរាចរណ៍​ជា​ផ្លូវការ ក្រោយពី​ចំណាយពេល​សាងសង់២ឆ្នាំ និង​ចំណាយ​ទឹកប្រាក់​រាជរដ្ឋាភិបាល​ស​រុ​បប្រមាណ​ជា ៤ ៩៧១ លាន​រៀល។

នៅ​ថ្ងៃទី១៤ ខែសីហា​នេះ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង​សាធារណការ និង​ដឹកជញ្ជូន បាន​អមដំណើរ​សម្ដេច ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ ក្នុង​ពិធី​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​ស្ពាន​ច្រាំង​ចោត ស្ថិតនៅ​ភូមិ​រូង ឃុំ​ចែង​មានជ័យ ស្រុក​បាណន់ និង​ស្ពាន​ចំនួន៤ទៀត នៅ​ស្រុក​សំឡូត ស្រុក​ប​វិល ស្រុក​ឯក​ភ្នំ និង​ស្រុក​កំរៀង ដែល​ឆ្លងកាត់​ស្ទឹង​សង្កែ និង​ស្ទឹងផ្សេៗទៀត ក្នុងភូមិ​សាស្ត្រ​ទឹកដី​ខេត្តបាត់ដំបង។

លោក ស៊ុន ចាន់ថុល បាន​ថ្លែងថា ស្ពាន​ច្រាំង​ចោត មាន​ប្រវែង​សរុប ១៦២ម៉ែត្រ ទទឹង០៨ម៉ែត្រ ស្ថិតនៅ​ភូមិ​រូង ឃុំ​ចែង​មានជ័យ ស្រុក​បាណន់ ត្រូវបាន​អនុវត្ត​ការសាងសង់​ដោយ​បញ្ជាការដ្ឋាន​វិស្វកម្ម អគ្គបញ្ជាការដ្ឋាន​នៃ​ក្រសួងការពារជាតិ និង​ត្រូវបាន​ត្រួតពិនិត្យ​ការសាងសង់​ដោយ​នាយកដ្ឋាន​ហេដ្ឋារចនាសម្ព័ន្ធ​សាធារណៈ​នៃ​ក្រសួង​សាធារណការ និង​ដឹកជញ្ជូន ដោយ​ចំណាយពេល​សាងសង់​ចំនួន ២ឆ្នាំ ចាប់ពី​ថ្ងៃទី២២ ខែកុម្ភៈ ឆ្នាំ ២០១៧ និង​បញ្ចប់​ជា​ស្ថាពរ​នៅ​ថ្ងៃទី៣០ ខែកក្កដា ឆ្នាំ២០១៩ និង​ចំណាយ​ថវិកា​រាជរដ្ឋាភិបាល​សរុប​ប្រមាណ​ជា ៤ ៩៧១លាន​រៀល។

លោក​បន្តថា ចំណែក​ស្ពាន​ចំនួន៤ផ្សេងទៀត​រួមមាន៖ ស្ពាន​ប្រវែង ៤៥ ម៉ែត្រ ទទឹង០៨ម៉ែត្រ ស្ថិតនៅ​ភូមិ​ម៉ាក់​ឃ្លឿ ឃុំ​ព្រៃ​ខ្ពស់ ស្រុក​ប​វិល ស្ពាន​ប្រវែង៧២ម៉ែត្រ ទទឹង១០ម៉ែត្រ ស្ថិតនៅ​ភូមិ​ព្រែក​កញ្ច្រែង ឃុំ​ព្រែក​នរិន្ទ ស្រុក​ឯក​ភ្នំ ស្ពាន​ប្រវែង៥៤ម៉ែត្រ ទទឹង០៨ម៉ែត្រ ស្ថិតនៅ​ភូមិ​បឹង​អូរ​ជាង ឃុំ​កំរៀង ស្រុក​កំរៀង និង​ស្ពាន​ប្រវែង១០២ ម៉ែត្រ ទទឹង០៨ម៉ែត្រ ស្ថិតនៅ​ភូមិ​អូរ​រំចេក​ក្រោម ឃុំ​អូរ​សំរិល ស្រុក​សំឡូត ត្រូវបាន​អនុវត្ត​ការសាងសង់​ដោយ​បញ្ជាការដ្ឋាន​វិស្វកម្ម អគ្គបញ្ជាការដ្ឋាន​នៃ​ក្រសួងការពារជាតិ និង​ត្រួតពិនិត្យ​ការសាងសង់​ដោយ​នាយកដ្ឋាន​ហេដ្ឋារចនាសម្ព័ន្ធ​សាធារណៈ​នៃ​ក្រសួង​សាធារណការ និង​ដឹកជញ្ជូន​ក្រោម​គម្រោង​ថវិកា​រាជរដ្ឋាភិបាល។

គិត​ត្រឹម​ឆ្នាំ២០១៨ កន្លងទៅនេះ​កិច្ចការ​នៅ​ខេត្តបាត់ដំបង​រួមមាន៖ ការងារ​ស្តារ និង​ស្ថាបនា​ហេដ្ឋារចនាសម្ព័ន្ធ​ផ្លូវជាតិ និង​ផ្លូវ​ខេត្ត​បាន​ប្រវែង​ចំនួន ១៦ ២៩២ គ.ម បាន ក្រាល​កៅស៊ូ និង​បេតុង ប្រវែង ៨ ៦២០គ.ម ស្មើនឹង ៥៣ភាគរយ ក្នុងនោះ​ផ្លូវជាតិ​កម្រិត១លេខ ក្រាល​កៅស៊ូ និង​បេតុង​បាន ១០០% ផ្លូវជាតិ​កម្រិត២លេខ បាន៧២,៣០ភាគរយ និង​ផ្លូវ​ខេត្ត​បាន ៣០,៤០ភាគរយ។

ដោយឡែក ផ្លូវជាតិ​ដែល​ត្រូវ​ពង្រីក​ជា៤គន្លង​បានបញ្ចប់​មាន​ប្រវែង១៥៧គ.ម កំពុង​សាងសង់​ពង្រីក បន្ថែម​មាន​ប្រវែង​សរុប ៤៣១ គ.ម ស្ពានធំៗ ដែល​បាន​សាងសង់​រួច​មាន​ចំនួន ១៧ ស្ពាន ប្រវែង​សរុប ១៦ ០៦៧ ម៉ែត្រ និង​ស្ពាន​កំពុង​សាងសង់​ចំនួន១ ប្រវែង ១ ១៣១ ម៉ែត្រ៕